शहरमा पनि होमस्टे विकास गराउने पर्यटनमन्त्रीको योजना, नागार्जुनमा तालिम सञ्चालन

शहरमा पनि होमस्टे विकास गराउने पर्यटनमन्त्रीको योजना, नागार्जुनमा तालिम सञ्चालन

A+ A A-

संस्कृति, पर्यटन तथा नागरिक उड्डयनमन्त्री जीवनराम श्रेष्ठले पर्यटन क्षेत्रको विकास गर्न ग्रामिण क्षेत्रसँगै शहरी क्षेत्रमा पनि घरवास (होमस्टे) सञ्चालन गर्न सकिने बताएका छन् ।

मन्त्रालय र नेपाल पर्यटन तथा होटल व्यवस्थापन प्रतिष्ठानले नागार्जुन नगरपालिकामा आयोजना गरेको होमस्टे सञ्चालन तालिम उद्घाटन गर्दै मन्त्री श्रेष्ठले शहरी क्षेत्रमा रहेका घरहरूमा पनि आगन्तुक पाहुनालाई खाना र बासको व्यवस्था मिलाउने तथा सत्कार सेवाबापत निश्चित रकम लिने गरी होमस्टे सञ्चालन गर्न सकिने बताए ।

आफ्ना पाहुनालाई आतिथ्य गर्न घरघरमा रहेका खाली कोठालाई व्यवस्थापन गरी आर्थिक उपार्जन गर्न सकिने उनको भनाइ छ । स्थानीय समुदायको आर्थिक विकासका लागि होमस्टेलाई प्रवर्द्धन गर्नुपर्नेमा मन्त्री श्रेष्ठले जोड दिए । स्थानीय जीवनशैली, संस्कृति तथा कलाको प्रवर्द्धन गर्न समेत होमस्टेले सहयोग पुर्‍याउने उनको भनाइ छ ।

स्थानीय समाज, रहनसहन, संस्कृति र बोलीचालीलाई नजिकबाट साक्षात्कार गर्न चाहने पर्यटकको रोजाइमा होमस्टे पर्ने भएकोले शहरी क्षेत्रमा समेत यसको सम्भावना रहेको उनले बताए । पर्यटकीय सम्भावना भएका गाउँ-शहरको पर्यटन प्रवर्द्धनका लागि होमस्टेलाई उपयोग गर्नुपर्ने उनले बताए ।

नागार्जुन नगरपालिकाको शरणपुर क्षेत्र पर्यटकीय सम्भावनायुक्त क्षेत्र भएकोले सो क्षेत्रको धार्मिक, सांस्कृतिक तथा पर्यावरणीय पर्यटनको सम्भावना उजागर गर्न होमस्टे तालिम आयोजना गरिएको हो ।

तालिममा अतिथि सत्कार, बजारीकरण, व्यवस्थापन र खाना बनाउन सिकाउनुका साथै होमस्टे सञ्चालन सम्बन्धी कानुनी तथा अन्य व्यवस्थाहरूबारे प्रशिक्षकहरूले तालिम दिनेछन् । तालिममा ३५ जना स्थानीय बासिन्दा सहभागी छन् ।

प्रकाशित मिति: आइतबार, भदौ २६, २०७९ १७:४८