एसिया कप फाइनल: उपाधिका लागि भिड्दै पाकिस्तान र श्रीलंका

A+ A A-

टी-२० एसिया कप क्रिकेटको फाइनलमा आज पाकिस्तान र श्रीलंकाबीच प्रतिस्पर्धा हुँदैछ । खेल नेपाली समयअनुसार राति ७ः४५ बजे सुरु हुनेछ ।

यसअघि भएको सुपर-फोरको खेलमा श्रीलंकाले पाकिस्तानलाई पाँच विकेटले पराजित गरेको थियो । पाकिस्तान र श्रीलंका प्रतिस्पर्धा गर्नुअघि नै फाइनलमा पुगिसकेकाले त्यो खेल एउटा प्रतिष्ठाको लडाइँ मात्रै थियो । १२२ रनको सामान्य लक्ष्य पछ्याउँदै जवाफी ब्याटिङमा उत्रिएको श्रीलंकाले १७ ओभरमा पाँच विकेटको क्षतिमा लक्ष्य भेट्टाएको थियो । टस हारेर पहिले ब्याटिङ गरेको पाकिस्तान १२१ रनमा अलआउट भएको थियो ।

दुबई इन्टरनेसनल क्रिकेट स्टेडियममा हुने खेलमा सुपर–फोरकै जस्तो नतिजा निकाल्दै उपाधि चुम्ने लक्ष्यमा श्रीलंका रहेको छ । यता, पाकिस्तान भने सुपर–फोरमा हारेको बदलासहित च्याम्पियन बन्ने दाउमा हुनेछ ।

पाकिस्तान

समूह ‘ए’ मा रहेको पाकिस्तानले एसिया कपमा आफ्नो पहिलो खेलमै भारतसँग पाँच विकेटले पराजित भएको थियो । तर, दोस्रो खेलमा एसोसिएट राष्ट्र हङकङलाई १५५ रनले पराजित गर्दै सुपर-फोरमा स्थान बनाएको हो । फराकिलो अन्तरले पराजित गर्ने क्रममा हङकङलाई मात्र ३८ रनमा अलआउट गरेको थियो ।

सुपर-फोरमा फेरि पहिलो खेलमा नै भारत र पाकिस्तानबीच प्रतिस्पर्धा भयो । जुन खेलमा पाकिस्तानले भारतलाई पाँच विकेटले पराजित गर्दै यसअघि हारको बदला लियो । सुपर–फोरको आफ्नो दोस्रो खेलमा अफगानिस्तानलाई एक विकेटले हराएसँगै पाकिस्तान एक खेलअघि नै फाइनलमा पुगेको हो ।

पाकिस्तान सन्तुलित टिम हो । ब्याटिङ, बलिङ र फिल्डिङ उतिकै राम्रो छ । कप्तन बाबर अजाम, मोहम्मद रिजवान, फखर जमान, इफ्तिखर अहमद, खुस्दिल शाहले राम्रो सुरुआत दिलाए आशिफ अली, हैदर अली, मोहम्मद नवाजजस्ता फिनिसर छन् । बलिङतर्फ पनि नासिम शाह, हरिस राउफ, हसन अली, मोहम्मद हसनैनजस्ता बलर छन् ।

श्रीलंका

समूह ‘बी’ को उपविजेता बनेको टिम श्रीलंकाको पहिलो खेललाई मूल्यांकन गर्ने हो भने समूह चरणबाटै बाहिरिने टिम हो । तर, त्यसपछिका खेलमा उत्कृष्ट प्रदर्शन गर्दै श्रीलंका सुपर–फोरमा पुगेको हो । पहिलो खेलमा पाकिस्तानसँग श्रीलंका आठ विकेटले पराजित भएको थियो । तर, आफ्नो दोस्रो खेलमा बंगलादेशलाई दुई विकेटले पराजित गर्दै सुपर–फोरमा पुगेको हो ।

सुपर–फोरमा श्रीलंकाले अफगानिस्तानलाई चार विकेटले पराजित गर्दै समूह चरणमा ब्यहोरेको हारको बदला लियो । त्यसपछि भारतलाई ६ विकेटले पराजित गर्दै श्रीलंका एक खेलअघि नै फाइनलमा पुगेको थियो । श्रीलंकाले अन्तिम खेलमा पनि पाकिस्तानलाई हराउँदै सुपर-फोरको शीर्ष स्थानमा रहेको हो ।

प्रकाशित मिति: आइतबार, भदौ २६, २०७९ १२:१०