रवीन्द्र मिश्रमाथि प्रकाशमानको टिप्पणी– दुई वर्ष पनि आफ्नो दल टिकाउन नसक्नेबाट देश विकास सम्भव छैन

रवीन्द्र मिश्रमाथि प्रकाशमानको टिप्पणी– दुई वर्ष पनि आफ्नो दल टिकाउन नसक्नेबाट देश विकास सम्भव छैन

A+ A A-

नेपाली कांग्रेसका नेता प्रकाशमान सिंहले रवीन्द्र मिश्रलाई इंगित गर्दै दुई वर्ष पनि दल टिकाउन नसक्नेहरूले देशको विकास गर्ने कुरा सम्भव नरहेको टिप्पणी गरेका छन् । शनिबार बानेश्वरमा कुमाले धारा मर्मतसम्भार तथा पार्क सौन्दर्यीकरण उद्घाटन कार्यक्रमलाई सम्बोधन गर्दे उनले विवेकशील साझा पार्टीका पूर्वअध्यक्ष रवीन्द्र मिश्रविमाथि व्यंग्य गरेका हुन् ।

नेता सिंहले पार्टी खोल्नु नाङ्लोमा पसल खोलेर चलाउनु जस्तो नभएको भन्दै मिश्रप्रति पार्टी टिकाएर देखाउन चुनौती दिए । उनले आफ्नो निर्वाचन क्षेत्रमा नयाँ पार्टीको हावा चाँडै फैलिने गरेको उल्लेख गर्दै विचार गरेर मात्रै भोट हाल्न मतदाताहरूसँग आग्रह गरे ।

नेता सिंहले परिवर्तन गर्छु भनेर आएको दल अहिले कहाँ छ भन्दै प्रश्नसमेत गरे । ‘यहाँ पुराना दलहरूले केही गर्न सकेनन् भने अरू कसले गर्न सक्ला त’, उनले भने, ‘गर्न सकेन भनेर कराउने अधिकार कसले दियो ? त्यही पुराना दल कांग्रेसले नै नेतृत्व गरेर जनआन्दोलनबाट मौका पाएको होइन ?’

उनले भने, ‘स्थापना गरेको दललाई एक वर्ष टिकाउन नसक्नेहरूले परिवर्तनको नारा दिँदैमा परिवर्तन हुन्छ ? नारा दिँदैमा परिवर्तन हुने भए त सबैले दिन्थे नि १ नाराले केही काम हुँदैन । पुराना दललाई त जनतालाई चित्त बुझाउन धौधौ भइरहेको छ भने भर्खरका दलले गर्छौं भनेर गर्न सकिन्छ र ? परिवर्तन गर्ने नारा बोकेर आयो एउटा दल। आफूले खोलेको दललाई सम्हाल्न सक्नुपर्छ नि परिवर्तन गर्न त । सम्हाल्न सकेको छ ?’

सिंहले आगामी निर्वाचनमा पनि हल्लाको पछि नलागी विवेकले देश विकास गर्न सक्षम उम्मेदवारलाई मतदान गर्न आग्रह गरे । ०७४ को निर्वाचनमा तत्कालीन विवेकशील साझा पार्टीका संयोजक रवीन्द्र मिश्रसँग ८१९ मतान्तरले मात्रै सिंह विजयी भएका थिए ।

प्रकाशित मिति: शनिबार, भदौ २५, २०७९ १४:५६