राष्ट्रपति नागरिकता विधेयकलाई ठूलै राजनीतिक विषय बनाउने मुडमा रहेकाे देखेँः प्रचण्ड

राष्ट्रपति नागरिकता विधेयकलाई ठूलै राजनीतिक विषय बनाउने मुडमा रहेकाे देखेँः प्रचण्ड

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रपति विद्यादेवी भण्डारी नागरिकता विधेयकलाई राजनीतिक विषय बनाउने मुडमा देखिएको जिकिर गरेका छन् । प्रेस सेन्टर, नेपाल कास्कीले शुक्रबार पोखरामा आयोजना गरेको पत्रकार सम्मेलनमा उनले आफूले राष्ट्रपतिसँग भेट्दा त्यस्तो देखिएको बताएका हुन् ।

राष्ट्रपति भण्डारी र अध्यक्ष प्रचण्डबीच गत १५ भदौमा भेटघाट भएको थियो । ‘हुन त केही दिनअगाडि राष्ट्रपतिलाई भेटेर कुरा गर्दा उहाँ यो विषयलाई ठूलै राजनीतिक विषय बनाउने मुडमा भएको देखेको थिएँ । नगर्ने सम्भावना (प्रमाणीकरण) पनि छ,’ अध्यक्ष प्रचण्डले भने, ‘मैले दोस्रोपटक पनि प्रमाणीकरण भएन भने राजीनामा दिनुपर्ने स्थिति आउँछ या अदालतमा जान्छ भनेको थिएँ । यी दुईवटामा एउटा हुनसक्छ । अनुमानको कुरा हो ।’

राष्ट्रपति भण्डारीले २९ साउनमा नागरिकता विधेयक पहिलो पटक फिर्ता गरेकी थिइन् । फिर्ता गरिएको विधेयकलाई जस्ताको तस्तै फेरि प्रतिनिधिसभा र राष्ट्रिसभाबाट पारित गरेर २० भदौमा दोस्रोपटक राष्ट्रपति कहाँ पठाइएको छ । राष्ट्रपतिले त्यसबारे १५ दिनभित्र निर्णय लिनुपर्छ ।

नागरिकता विधेयक रोकिँदा ६–७ लाख युवाहरूको भविष्य अन्योलमा रहेको बताउँदै प्रचण्डले राष्ट्रपतिले विधेयक प्रमाणीकरण गर्नुपर्ने बताए । वैवाहिक अंगीकृत नागरिकता तत्काल दिने विषयमा भने अर्को विधेयक ल्याउनुपर्ने पक्षमा आफूहरू रहेको उनको भनाइ छ ।

‘भारतमा सात वर्षपछि नागरिकता पाउने प्रावधान छ । नेपालमा आउनेबित्तिकै भन्ने कुराले तालमेल भएन । त्यो तालमेल हुनुपर्छ भन्नेमा हामी कायम छौँ । त्यो नीति परिवर्तन गरेको र छोडेका छैनौँ,’ अध्यक्ष प्रचण्डले भने, ‘वैवाहिक अंगीकृतबारे सहमति बनाएर अर्को विधेयक बनाएर टुंगो लगानुपर्छ भनेपछि हामीले जन्मसिद्दका छोराछोरीलाई ढोका खोल्नेमा सहमति भएको हो ।’