बाइककाे ‘मोबाइल होल्डर’ हटाउने ट्राफिककाे अभियान आवश्यकता कि ‘स्टन्ट ?

A+ A A-

राइड शेयर कम्पनीमा काम गरिरहेका राइडर दिपु चौलागाईंलाई अचानक ट्राफिक प्रहरीले रोके । रोकेलगत्तै उनले चौलागाईंको मोटरसाइकलमा राखिएको मोबाइल होल्डर गैरकानुनी भएको भन्दै झिक्न भने ।

‘मलाई यो नियम थाहा थिएन भनेर आफ्नो कुरा राख्दा पुलिस बोलाएर समाउन लगाउँछुजस्तो कुरा गरेर होल्डर नै निकालेर लग्यो । के हामीलाई केही काम नै नगर, विदेश जाऊ भन्नु । गरी खान पनि दिँदैनन् यो देशमा,’ उनी सामाजिक सञ्जालमा लेख्छन् ।

काठमाडौं उपत्यका ट्राफिक प्रहरी कार्यालयले राइड शेयर कम्पनी पठाओका प्रतिनिधिलाई बोलाएरसमेत राइडरहरूको होल्डर हटाउन भनेको थियो । निर्देशनपछि सबै राइडरलाई सूचना पठाइएको पठाओ नेपालका प्रबन्ध निर्देशक असीममान सिंह बस्न्यातले जानकारी दिए । बाइकमा मोबाइल होल्डर राख्नुलाई मोडिफिकेसन भन्न नमिल्ने उनको तर्क छ ।

‘नियममा बाइकमा सवार दुई जनाले नै हेल्मेट लगाउनुपर्छ । यस्तो महत्त्वपूर्ण कुरा किन लागू नभएको ? होल्डरलाई मोडिफिकेसन भन्ने हो भने त गाडीभित्र राखिएको पर्फ्युम, प्रहरीकै गाडीपछाडि राखेको स्पेयर टायर, हुटमा राखिएको बत्ती पनि मोडिफिकेसन हो,’ उनले तर्क गर्दै भने ।

यो कुनै स्टन्ट नभई दुर्घटना न्यूनीकरणकै लागि दुईपाङ्ग्रे सवारीसाधनबाट मोबाइल होल्डर हटाउने अभियान चलाएको काठमाडौं उपत्यका ट्राफिक प्रहरी कार्यालयका प्रवक्ता राजेन्द्रप्रसाद भट्टले बताए ।

‘यसरी राखेको स्ट्याण्ड नेभिगेसनका लागि प्रयोग हुने रहेछ । मोबाइलमा हेर्दा ध्यान भड्किने र दुर्घटना पनि हुन सक्छ । त्यही भएर यो अभियान चलाएका हौँ,’ उनले भने ।

यो कुनै नयाँ नियम नभएर यातायात ऐनमै भएको कुरालाई व्यवहारमा ल्याइएको उनले बताए ।

‘सवारीसाधन किनिसकेपछि कुनै चीज थप्न वा घटाउन मिल्दैन । होल्डर जोडेको फेला पारे लापर्वाही वा मोडिफाईमा जरिवाना गर्छौं,’ उनले भने । चारपाङ्ग्रे सवारीसाधनको डिस्प्लेको हकमा भने गाडीमै इन्बिल्ट हुने भएकाले नहटाइने उनले स्पष्ट पारे ।

‘हामीले नयाँ नियम बनाउने होइन, नियम पालना गराउने मात्र हो । गाडीको डिस्प्ले इन्बिल्ट भएका कारण हामीले कारबाही गर्न मिल्दैन । यदि मोटरसाइकलमै इन्बिल्ट डिस्प्ले भयो भने पनि ऐन संशोधन नभई हामीले केही गर्न मिल्दैन,’ उनले शिलापत्रसँग भने ।

प्रविधिको जमानामा जीपीएसलाई बन्देज गर्न नहुने यातायातविद् आशिष गजुरेल बताउँछन् ।

‘सडक सुरक्षाको दृष्टिले मात्रै हेर्ने हो भने मोबाइलले ध्यान भङ्ग गराएर दुर्घटना निम्त्याउन सक्छ भन्ने तथ्य पनि ठीक हो तर संसार नै जीपीएसको भरमा चलेको छ, नेपालमा पनि गाडीमा जीपीएस प्रयोग हुन्छ भने मोटरसाइकललाई मात्र रोक्नु पनि उचित होइन,’ उनले भने ।

यस विषयमा निश्चित मापदण्ड बनाएर बीचको बाटो प्रयोग गर्नुपर्ने उनको सुझाव छ । ‘राइड शेयर, डेलिभरीलगायतमा काम गर्नेहरूको रोजगारीमै जीपीएसबाट चलेको छ । यसलाई एकैचोटि रोक्नुभन्दा विस्तृत अध्ययन गरेर, निश्चित मापदण्ड बनाएर जानुपर्छ,’ उनले भने ।

प्रकाशित मिति: बिहीबार, भदौ २३, २०७९ १७:५५