'ब्रम्हास्त्र' सेन्सर नभएका कारण नेपाली फिल्ममाथि अन्याय, हलवालाले खुलाएनन् शो

'ब्रम्हास्त्र' सेन्सर नभएका कारण नेपाली फिल्ममाथि अन्याय, हलवालाले खुलाएनन् शो

A+ A A-

शुक्रबारबाट प्रदर्शनमा आउन लागेका दुई नेपाली फिल्मले अहिलेसम्म शो प्राप्त गरेका छैनन् । शुक्रबारबाटै प्रदर्शनमा आउन लागेको हिन्दी फिल्म ‘ब्रम्हास्त्र’को बलिउडमा सेन्सर नभएका कारण दुई नेपाली फिल्म मारमा परेका हुन् ।

फिल्म निर्देशकहरूले नेपाली फिल्ममाथि ज्यादती गरेको भन्दै आपत्ति जनाइरहेका छन् । ‘गोरखा विनिथ द व्रेभरी’ र ‘ऐना झ्यालको पुतली’को निर्माण टिम यतिबेला अन्योलमा छ । ‘फिल्म ऐना झ्यालको पुतली’का निर्देशक सुजित बिडारीले शो टाइम नपाएका कारण आफूहरू तनावमा रहेको बताए ।

‘साथीहरूले कुन हलमा कुन टाइममा छ भनेर म्यासेज गरिरहेका छन् । तर साथीभाइलाई जवाफ दिन सकिरहेका छैनौँ,’ उनले चिन्ता व्यक्त गरे । यसबारे चलचित्र विकास बोर्ड, निर्माता संघ र निर्देशक समाज मौन बसेको भन्दै फिल्म निर्देशक निश्चल बस्नेतले गुनासो गरेका छन् ।

उनले फेसबुकमा लेखेका छन्, ‘चलचित्र विकास बोर्ड, निर्माता संघ र निर्देशक समाज यो विषयमा मौन हुनु खेदजनक । भोलि रिलिज हुने फिल्मको आजसम्म शो खुलेको छैन, कारण प्रष्ट छ, प्रायोरिटी,’ निश्चलले लेखेका छन् ।

फिल्म निर्देशक दीपेन्द्र के खनालले पनि शो समय हलहरूले नखुलाएकोप्रति आपत्ति जनाएका छन् । 'भोलि प्रदर्शन हुने चलचित्रको आज यो समयसम्म पनि किन शो समय निस्किएको छैन ? सम्बन्धित सबैमा चाँडो भन्दा चाँडो प्रदर्शन समय उपलब्ध गराउन माग गर्दछु,' उनले फेसबुकमा लेखेका छन् ।

चलचित्र निर्माता संघका नवनिर्वाचित अध्यक्ष नवल खड्का भने हलवालाहरूले गरेको अन्यायविरुद्ध लागिपरेको बताए । ‘हामीले यसबारे बुझिरहेका छौँ । जसरी पनि नेपाली फिल्मले शो पाउनुपर्‍याे । अब एकताबद्ध भएर कदम चाल्नेछौँ,’ खड्काले भने ।

हिन्दी फिल्म ‘ब्रम्हास्त्र’ र ‘ऐना झ्यालको पुतली’को वितरक प्रचण्डमान श्रेष्ठका अनुसार शो खुल्ने नखुल्ने भन्ने कुरा हलको नितान्त व्यक्तिगत अधिकारको कुरा हो । ‘मेरो तर्फबाट मैले हलहरूलाई नेपाली फिल्मलाई राम्रो शो उपलब्ध गराउन इमेल हिजै गरेको छु । फोनबाट पनि भनेको छु । हिन्दीको मुभी कोड जुन बेला आउँछ त्यही बेला गर्दा हुन्छ भनेर । तर यो शो समय कुन बेला खुल्ने भनेर कुनै नीति नियम पनि अहिलेसम्म छैन । हलहरूले आफ्नोअनुसार क्याल्कुलेसन गरिरहेका हुन्छन्,’ श्रेष्ठले भने ।

नेपाली फिल्मका मुभी कोडहरू भने सबै हलहरूले पाइसकेका छन् । नेपाली फिल्मले अहिलेसम्म शो प्राप्त नगर्नुको कारण 'ब्रम्हास्त्र' सेन्सर नहुनुमात्र पनि नभएको उनले बताए । ‘हलहरूले क्याल्कुलेसन गरिरहेका होलान् । अघिल्ला फिल्महरू पनि राम्रो चलिरहेका छन् । उनीहरूलाई कति शो दिने, ब्रम्हास्त्रलाई कति दिने, र भोलिबाट रिलिज हुन लागेका नेपाली फिल्मलाई कति दिने भनेर । यसको प्रक्रिया निर्माताहरूले बुझिदिनुपर्‍याे', श्रेष्ठले भने । यसअघि अधिकांश हलले बुधबारसम्ममा नै शो समय खुलाउने गरेका थिए । यसपालि शो समय नखुलाउनुमा ब्रम्हास्त्र सेन्सर नहुनु नै कारक रहेको निर्देशकहरूको ठम्याइ छ ।

प्रकाशित मिति: बिहीबार, भदौ २३, २०७९ १२:४६