२४ घण्टामा 'ऐना झ्यालको पुतली'लाई आर्टमान्डुको गीत 'कन्ट्रिब्यूट'

A+ A A-

फिल्मको शक्ति भनेको कस्तो हुँदो रै‍'छ ?

‘घुमीघुमी’, ‘तीनपाते’ जस्ता चर्चित म्युजिकल फिल्मका निर्देशक नवीन चौहानको दुई दिनको निद्रा ‘ऐना झ्यालको पुतली’ हेरेपछि बिथोलियो । जब सोमबार उनी फिल्मको ग्रान्ड प्रिमियर सो हेरेर फर्किँदै थिए, एउटा अथाह आनन्द मनमा फैलिरहेको थियो । ‘मैले हेर्न चाहेको, बनाउन चाहेको नेपाली फिल्म पनि त यस्तो हो,’ नवीनले सोचे ।

हुन त अन्य नेपाली फिल्मकै पूर्वाग्रह बोकेर हलभित्र प्रवेश गरेका थिए नवीन । ‘फर्किँदा त तिनछक परेँ । कति फिल्ममा समीक्षकले क्राफ्टको कुरा गर्छन् । जब कि नेपाली सिनेमा हेर्दै पनि नेपाली लाग्नुपर्छ । सायद सैद्धान्तिक बहसबाट निचोरिएर स्वरुपमै आउने हो भने यस्तो फिल्म बन्छ होला,’ नवीनले भने ।

तर, फिल्मको त प्रचार पुगेकै छैन । फिल्मका निर्देशक सजित बिडारीसँग एउटै सुत्र थियो, ‘फिल्म वर्ड अफ माउथले नै चल्छ ।’ तर वर्ड अफ माउथलाई प्रभाव पार्ने कुरा पनि हुन्छन् । नवीनले आफ्नो कार्यालय आर्टमान्डु पुगेपछि साथीहरूलाई भने, ‘हामीले यो फिल्मका लागि के योगदान गर्न सक्छौँ ?’

‘ऐना झ्यालको पुतली’लाई धुनमा सम्झनुपर्‍याे भने त यसको टाइटल गीत त छैन । ‘यसको प्रचारको लागि आर्टमान्डुले टाइटल गीत योगदान गर्नसक्छ,’ नवीनले साथीहरूलाई प्रस्ताव राखे ।

लगत्तै मङ्गलबार दिउँसो फिल्मका निर्देशक सुजितलाई भेटेर नवीन र सुजितकै विद्यार्थी रोशन अधिकारीले प्रस्ताव पनि राखे । आफ्नो फिल्मको प्रचारमा निश्वार्थ ढङ्गले कसैले सहयोग गर्छु भन्दा उनी हर्षित देखिए । ‘हुन्छ गरौँ । यसमा म खुसी हुन्छु,’ सुजितले भने ।

साँझ ६ बजे आर्टमान्डुको टिमले सँगै बसेर फिल्म हेरिसिध्यायो । ‘गीतकार हर्क साउँद, संगीतकार सुशान्त गौतम, संगीत प्रोडुसर रिकेश गुरुङ, गायिका विद्या तिवारी लगायतक टिमले जब फिल्म हेर्नुभयो, सबैमा अनौँठो ऊर्जा आयो,’ नवीन भन्छन् ।

अब फिल्म प्रदर्शनमा आउन ७२ घण्टा बाँकी थियो । उनीहरूले २४ घण्टामा काम सिध्याउनु थियो ।

तुरुन्तै सुशान्तले गितार समातेर धुन बनाउन थाले । त्यही धुनलाई कृष्ण र नवीले सम्पादन गर्न थाले । हर्क साउँद केही नबोली घर गए, र भटाभट गीत लेख्न थाले । उता हर्क गीत लेख्दै थिए, यता बाँकी टिम संगीतमा काम गरिरहेको थियो ।

हर्कले रातको २ बजे फाइनल शब्द पठाए । बिहान ४ बजे फाइनल कम्पोजिसन सकियो । ‘त्यसपछि एउटा फ्रेम बनायौँ, बिहान पाँच बजे एडिट सकियो । एरेजमेन्टको ड्राफ्ट बनाएर ३ घण्टा सुत्यौँ । अनि फेरि उठेर काम गर्न थाल्यौँ,’ नवीन भन्छन् ।

रात अनिँदो कटाएको त्यही टिम दिनभरि गीत तयार गर्न लागि परिरहेको थियो । जबकि अर्को हप्ताबाट सुरु हुन लागेको मुख्य प्रोजक्टको तयारी छाडेर । ‘दलदलमा फूलेको कमलको फूल हो यो फिल्म । नेपाली सिनेमाको सुरुवात बन्न सक्छ भन्ने सम्भावना देखाएको छ । त्यसकारण हामीले यसलाई सहयोग गर्नैपर्‍याे', नवीनले भने ।

बुधबार साँझ गीत आर्टमान्डुको युट्युव च्यानलबाट उनीहरूले सार्वजनिक गरे । गीतको टाइटल गीतलाई धेरैले रुचाएका छन् ।

कैले पूरा कैले आधा जिन्दगी नाथे
कैले जाती कैले नजाती ओइ मेरो साथी
ज्यानै थापी भिडेर, कैले मुटु छिनेर
पाइलाका डोबाहरु पुरिँदै जालान्
थोरै बदमासीहरू, हुर्रिदैँ आउलान्
त्यतिबेला लाग्ला नजाती
ऐना झ्यालैको पुतली...

गीतमा हर्क साउँदको शब्द, सुशान्त गौतमको स्वर र संगीत तथा विद्या तिवारी र सजना सोरीको भोकल सपोर्ट रहेको छ ।