दुई वर्षभित्र पूर्ण विद्युतीकरण गर्ने लक्ष्य छ : मन्त्री भुसाल

A+ A A-

ऊर्जा, जलस्रोत तथा सिँचाइ मन्त्री पम्फा भुसालले आगामी दुई वर्षभित्र मुलुकमा पूर्ण विद्युतीकरण गर्ने लक्ष्य रहेको जनाउँदै सोहीअनुसार काम भइरहेको बताएकी छन् ।

प्रतिनिधिसभाको आजको बैठकमा सांसद भीमबहादुर रावलले, ‘माथिल्लो कर्णाली जलविद्युत् आयोजना विकास सम्झौताको कार्यान्वयन गर्न गराउन तथा राष्ट्रिय हितमा प्रयोग हुने गरी संरक्षण र संवर्द्धन गर्न आवश्यक भएकाले’ भन्ने जरुरी सार्वजनिक महत्त्वको विषयमाथि छलफलका क्रममा भुसालले सो कुरा बताएकी हुन् ।

मुलुकभित्र उपलब्ध जलविद्युत्‌को उत्पादन तथा समुचित विकासबाट उज्यालो नेपाल बनाउन सरकारसँग स्पष्ट मार्गचित्र रहेको उल्लेख गर्दै भुसालले आर्थिक र प्राविधिक कारणले अपेक्षाअनुसार उत्पादन गर्न नसकिएको उल्लेख गरिन् । मुलुकभित्र लोडसेडिङ अन्त्य भएको जनाउँदै भुसालले जलविद्युत् उत्पादनका क्षेत्रमा निजी क्षेत्रले गरेको भूमिका प्रसंशनीय रहेको टिप्पणी गरिन् ।

जलाशययुक्त जलविद्युत् आयोजनामध्ये धेरैको अध्ययन भइरहेको र बूढीगङ्गा र दूधकोसी आयोजना निर्माणको अन्तिम चरणमा पुगेको भुसालको भनाइ थियो । माथिल्लो कर्णाली आयोजनाका सन्दर्भमा जीएमआर कम्पनीसँग भएको सम्झौताका बारेमा जानकारी गराउँदै यसबाट उत्पादित विद्युत् बङ्गलादेशसम्म निर्यात गर्न सकिने मन्त्री भुसालले जानकारी दिइन् ।

यसैगरी पश्चिम सेती जलविद्युत् आयोजनाका विषयमा हालसम्म भएका कामका बारेमा सदनलाई जानकारी गराइन् । सांसद रावलले उक्त जरुरी सार्वजनिक महत्त्वको विषयमाथि ऊर्जा, जलस्रोत तथा सिँचाइ मन्त्रीको ध्यानाकर्षण गराएका थिए ।

माथिल्लो जलविद्युत् आयोजना भारतीय जीएमआर कम्पनीले बनाउने गरी आजभन्दा १४ वर्षअगाडि गरिएको सम्झौता आजसम्म पनि अगाडि बढ्न नसकेको र अहिले आएर अर्को कम्पनीसँग थप सम्झौता गरेको जनाउँदै त्यस्ता काम नगर्ने तथा आयोजना ओगटेर मात्र राख्ने सम्झौता खारेज गर्न रावलको माग थियो ।

प्रस्ताव प्रस्तुत गर्दै उनले जलविद्युत्‌ यथेष्ट लाभ लिन नसकेको बताउँदै इन्धन आयातमा बर्सेनि अर्बौं रुपैयाँ विदेशिने गरेको तथ्याङ्क पेस गरे । नेपालमा हाल प्रतिव्यक्ति विद्युत् प्रयोग निकै कम रहेको सन्दर्भमा विद्युत् निर्यात नीति प्रवर्द्धन गर्दा मुलुकभित्रको व्यवसाय कसरी आत्मनिर्भर होला भनी रावलले प्रश्न गरे ।

प्रकाशित मिति: बुधबार, भदौ २२, २०७९ १५:४२