आईएमएस ग्रुपले ल्यायो ‘सेलपे’, वालेटमा पैसा नराखी बैंक खाताबाटै भुक्तानी

A+ A A-

भुक्तानीलाई प्रविधिमार्फत सञ्चालन गर्ने उद्देश्यसहित भुक्तानी सेवा प्रदायक कम्पनी ‘सेलपे’ सार्वजनिक गरिएको छ । व्यावसायिक समूह आईएमएस ग्रुपले सेलपे सेवा सञ्चालनमा ल्याएको हो ।

नेपाल राष्ट्र बैंकका गभर्नर डा. चिरञ्जीवी नेपालले पेमेन्ट गेटवे सार्वजनिक गरेका हुन् । सेलपे सेवा मोबाइल तथा वेब एप्लिकेसनको माध्यमबाट आफ्नै बैंक खाताबिना प्रयोग गरी विभिन्न भुक्तानी तथा रकम स्थानान्तरण गर्न सकिनेछ ।

यसमा अन्तर्राष्ट्रिय स्तरको सुरक्षा प्रणाली अपनाइएको बताइएको छ । कम्पनीका प्रमुख कार्यकारी अधिकृत पवन प्रधानले बजारमा सञ्चालितभन्दा फरक र नवीन प्रविधिसहित सेलपे सार्वजनिक गरिएको जानकारी दिए ।

सेलपेमार्फत दूरसञ्चार सेवा, बिजुली, खानेपानी, टिभी, इन्टरनेट शुल्क भुक्तानी, विभिन्न पसल, रेस्टुरेन्ट, सिनेमा हलहरुमा भुक्तानी, एक बैंक खाताबाट अन्य बैंक खातामा रकम स्थानान्तरण, स्वदेशभित्र गरिने मनी ट्रान्सफरलगायत सबैखालका विद्युतीय भुक्तानी गर्न सकिने जारी विज्ञप्तिमा उल्लेख छ ।

विक्रेताहरुले पनि आफ्नो व्यवसाय सेलपेमा आबद्ध गरी ग्राहकले सेलपेमार्फत गरेको भुक्तानी रकम तत्काल आफ्नो बैंक खातामा प्राप्त गर्न सक्नेछन् ।

नेपाल राष्ट्र बैंकबाट अनुमति प्राप्त भुक्तानी सेवा प्रदायक सेलकम प्राइभेट लिमिटेडले सञ्चालन गरेको विभिन्न किसिमका भुक्तानीहरु गरिने सेवा हो । सेलपे सेवाबाट मोबाइल तथा वेबको माध्यममार्फत आफ्नै बैंक खाता प्रयोग गरी विभिन्न भुक्तानी तथा रकम स्थानान्तरण गर्न सकिनेछ ।

सेलपे सेवा विभिन्न अन्तर्राष्ट्रिय स्तरको सुरक्षा प्रणाली अनुपालन गरी विकसित गरिएको छ । सेलपेबाट भुक्तानी गर्दा छुट्टै वालेट बनाउनुपर्दैन ।

भुक्तानी गर्दा वालेटमा रकम स्थानान्तरण गर्नुपर्ने जस्ता झन्झटिला प्रक्रिया अपनाउनुपर्दैन । सेलपे सेवा एक किसिमको डिजिटल डेबिट कार्ड हो । यसमा ग्राहकले आफ्नो एक वा एकभन्दा बढी बैंक खाताहरु जोड्न सक्नेछन् ।

सेलपे सेवाबाट मोबाइल फोन रिचार्ज, टेलिफोन, बिजुली, खानेपानी, इन्टरनेट महसुल भुक्तानी, रकम स्थानान्तरण, विक्रेता भुक्तानी, ई–कमर्स तथा अनलाइन भुक्तानीहरु गर्न सकिने विज्ञप्तिमा उल्लेख छ । सेलपेमार्फत रकम ट्रान्सफर गर्दा न्यूनतम २ रुपैयाँदेखि २० रुपैयाँसम्म लाग्नेछ ।

सेलपे सेवामार्फत हुने सम्पूर्ण कारोबार बैंकिङ प्रणालीअन्तर्गत नै हुनेछ । यसमा आबद्ध ग्राहकले सहज रुपमा यो सेवा लिन सक्नेछन् । सेलपे सेवा गुगल प्ले स्टोर तथा एप्पल एप स्टोरमा उपलब्ध छ ।

प्रकाशित मिति: बुधबार, साउन १५, २०७६ २०:४४