शून्य लागतमा पठाउने भनेको मुलुकमा जान पनि जताततै पैसा उठाइएको छः श्रममन्त्री कुँवर

शून्य लागतमा पठाउने भनेको मुलुकमा जान पनि जताततै पैसा उठाइएको छः श्रममन्त्री कुँवर

A+ A A-

वैदेशिक रोजगारीमा भइरहेको ठगी नियन्त्रण गर्छौं : श्रममन्त्री कुँवर

श्रम, रोजगार तथा सामाजिक सुरक्षामन्त्री शेरबहादुर कुँवरले वैदेशिक रोजगारीमा श्रमिक पठाउने नाममा भइरहेको ठगी नियन्त्रण गर्ने बताएका छन् ।

आइतबार मन्त्रालयको कल सेन्टरमा श्रमिकहरूको गुनासो सुनेपछि सञ्चारकर्मीहरूसँग कुराकानी गर्दै कुँवरले सरकारले शून्य लागतमा पठाउने भनिएका देशहरूमा समेत एजेन्टहरूले जताततै श्रमिकहरू ठगेको भन्दै तत्काल नियन्त्रण गर्ने बताएका हुन् ।

शून्य लागतमा वैदेशिक रोजगारीमा जान सक्ने सम्झौता भएका देशहरूमा समेत एजेन्टहरूले साढे ३ लाखसम्म लिएको गुनासो आएकाले मन्त्रालयले त्यसको अनुगन सुरु गरेको कुँवरले बताए ।

‘कल सेन्टरमा श्रमिकका समस्या तत्काल पनि समाधान गरेका छौँ । कल सेन्टर कल सेन्टरको लागि मात्रै होइन । तत्काल समाधान गर्ने माध्यम पनि भएको छ,’ उनले भने, ‘श्रमिकहरूबाट आएका जटिल खालका गुनासा भए केही समय लाग्छ । सामान्य प्रकारका गुनासा कल सेन्टरले पनि गर्छ । बाँकी विभागहरू र मन्त्रालयले गर्ने गरेको छ ।’

मन्त्रालयमा ठगिएको भनेर आएका गुनासोहरूलाई मन्त्रालयले सहजीकरण गर्ने कुँवरले बताए । वैदेशिक रोजगारीमा पठाउने नाममा जताततै ठगी हुदाँ सरकारलाई अफ्ठ्यरो लागेको उनले बताए । ठगी भएको जानकारी मन्त्रालयमा नआउँदा अनुगमन गर्न समेत नसकिएको उनले बताए ।

‘रोमनियाको लागि साढे ३ लाख लिएर पठाइँदै छ भनेर सुन्यौँ । शंका लागेको व्यक्तिलाई मन्त्रालयले १ घण्टाभित्र बोलाएर स्पष्टीकरण सोधेका छौँ । शंका गरेको व्यक्तिहरूले अन्त पनि देखाएको छ । मन्त्रालयका यस्ता जानकारी आउँदैन,’ उनले भने ।

अनुगनको लागि अनुगमन टोलीले प्रमाण र पैसा केही नभेट्ने गरेको उनले बताए । ठगी भएको प्रमाण नभएकाले कारबाहीको दायरामा ल्याउन नसकिएको कुँवरले बताए ।

अब सरकारले ठगी गर्ने एजेन्टहरू कहाँ बस्छन् खोज अनुसन्धान गरेर कानुनी कारबाही गरिने उनले बताए । मन्त्री कुँवरले कल सेन्टरमार्फत श्रमिकका गुनासाहरू तत्काल र केही समय लगाएर भए पनि समाधान मन्त्रालयले गरिरहेको दाबी गरे ।

‘शून्य लागतमा पठाउने भनेका छौँ जताततै पैसा असुल भएको छ । त्यसको नियन्त्रण भएको छैन । त्यसको नियन्त्रणको लागि अनुगमन टोली पठायौँ । टोलीले केही पनि भेटाउँदैन । पैसा र प्रमाण केही भेटाउँदैन । प्रमाण नभई कारबाहीको दायरामा कसरी ल्याउने सरकारलाई समस्या परेको छ,’ कुँवरले भने, ‘त्यस्तो भइरहेको सबै ठाँउबाट जानकारी आउनुपर्‍यो । सबै मन्त्रालय, प्रहरी पत्रकार सबै जना जाऔँ मेनापावरले अफिसमा पैसा असुल गर्दैन । त्यस्ता एजेन्टका कहाँ छ बस्ने ठाँउहरू त्यसको सोधि खोजी गरौँ । वैदेशिक रोजगारीमा पठाउने नाउँमा जताततै ठगीको कामलाई नियन्त्रण गर्नुपर्छ ।’

पछिल्लो समय वैदेशिक रोजगारको क्षेत्र, घरजग्गा कारोबार हुँदाहुँदै फोहोर व्यवस्थापनमा समेत दलाली हुन थालेको उनले बताए ।

मन्त्री कुवरले आइतबार चार जना श्रमिकहरूको गुनासो सुने । वैदेशिक रोजगारीमा लैजान्छु भनेर महिनौँ नलगिएको, वैदेशिक रोजगारीमा गएर घर आउन नदिएको जस्ता गुनासा श्रमिकहरूले मन्त्री कुँवरलाई गरेका थिए ।

श्रममन्त्री कुँवरले हेरक हप्ताको आइतबार १ घण्टा कल सेन्टरमा श्रमिकको गुनासो सुन्ने गरिरहेका छन् ।

प्रकाशित मिति: आइतबार, भदौ १९, २०७९ १४:२३