टानका नवनिर्वाचित पदाधिकारीले ग्रहण गरे शपथ

A+ A A-

संस्कृति,पर्यटन तथा नागरिक उड्डयन मन्त्रालयका सचिव सुरेश अधिकारीले पर्यटन क्षेत्रको विकासको लागि निजी क्षेत्रले पर्यटन बजारको बढवा र प्रचारप्रसार गर्नुपर्ने बताएका छन् । शुक्रबार ट्रेकिङ एजेन्सिज एसोसिएसन अफ नेपाल (टान) का नवनिर्वाचित कार्यसमितिको शपथ ग्रहण तथा पदभार हस्तान्तरण कार्यक्रममा बोल्दै सचिव अधिकारीले यस्तो बताएका हुन् ।

उनले पर्यटन व्यवसायीहरूलाई पर्यटन क्षेत्रमा हुने गतिविधिमा निजी क्षेत्रलाई बाहिर राखेर काम गर्छ भन्ने चिन्ता हटाउनुपर्ने बताए । सचिव अधिकारीले पर्यटन क्षेत्रको विकासका लागि निजी क्षेत्रले लगानी, रोजगारी सिर्जना गर्ने, पर्यटन गतिविधिहरू सञ्चालन गर्ने, बजारको विस्तार र प्रचारप्रसार गर्ने काम गर्नुपर्ने उल्लेख गरे । उनले निजी क्षेत्रबिना सरकारले मात्रै पर्यटन क्षेत्रको विकास गर्ने कल्पना गर्न नसक्ने उल्लेख गर्दै राष्ट्रिय अर्थतन्त्रमा ५५ प्रतिशत निजी क्षेत्रको योगदान रहेकोले ५५ प्रतिशत योगदान गर्ने निजी क्षेत्रलाई बाहिर राखेर सरकार अगाडि बढ्न नसक्ने बताए ।

टानका नवनिर्वाचित अध्यक्ष नीलहरि बास्तोलाले ट्रेकिङ व्यवसायीहरूले दिएको मतलाई घात नगरी दुई वर्षमा बोलेका कुराहरू पूरा गर्ने प्रतिबद्धता जनाए । उनले टानलाई टे«किङ व्यवसायीहरूले समय सापेक्ष अनुसारको टान चाहेकाले समय सापेक्ष अनुसारको टान बनाउन लागिपर्ने बताए । उनले टानलाई व्यवसायीहरूको चाहेको जस्तो टान बनाउनको लागि सबै व्यवसायीहरूको साथ चाहिने उल्लेख गरे । उनले अहिलेको नेतृत्व गफमा भन्दा पनि काममा विश्वास गर्ने भएकाले काम गरेर सबै टे«किङ व्यवसायीहरू माझमा जाने बताए ।

प्रकाशित मिति: शुक्रबार, भदौ १७, २०७९ १६:५८