ऊर्जामन्त्री भुसाल भन्छिन्– १५ सय मेगावाट क्षमताका आयोजना कसको झोलामा छन्, थाहा छैन

ऊर्जामन्त्री भुसाल भन्छिन्– १५ सय मेगावाट क्षमताका आयोजना कसको झोलामा छन्, थाहा छैन

A+ A A-

ऊर्जा, जलस्रोत तथा सिंचाईमन्त्री पम्फा भुसालले बहुउद्देश्य बुढीगण्डकी जलविद्युत आयोजना यही वर्ष अगाडि बढाउने बताएकी छन् । उनले बुढीगण्डकी विद्युत उत्पादन कम्पनी बनाएर आयोजना अगाडि बढाउने बताइन् ।

आइतबार मन्त्रालयको पत्रकार सम्मेलनमा एक वर्षको मन्त्रालयको कार्य प्रगति सार्वजनिक गर्दै मन्त्री भुसालले यस्तो बताइन् । उनले बुढीगण्डकी जलविद्युत आयोजना १२ सय मेगावाटको स्टोरेज आयोजना भएको उल्लेख गर्दै उक्त आयोजना निर्माणको लागि जग्गा मुआब्जा, पुनर्बास लगायतको काम सकिन लागेको जानकारी दिइन् ।

उनले नेपालमा वर्षाको समयमा विद्युत धेरै हुने र हिउँदा कम हुने भएकाले ६५ दिन भरपर्दो विद्युत निर्माणका लागि स्टोरेजमा जानुपर्ने आवश्यकता रहेको बताइन् ।

मन्त्री भुसालले आयोजनाको जडित विद्युत क्षमता ८५.४ प्रतिशत बढाउनको लागि सरकारले विद्युत उत्पादकहरूलाई ‘डिजाइन डिस्चार्ज’ (क्यू) निःशुक गरेको बताइन् । उनले अहिले नेपालको विद्युत उत्पादन ८३ हजार भने पनि आर्थिक रुपमा ४३ हजार हिसाव गरिएको बताइन् ।

मन्त्री भुसालले सरकारको तथ्याङ्कमा ६ हजार ५ सय मेगावाट क्षमताका आयाेजनाकाे पीपीए भएको देखिए पनि १५ सय कसैको झोला रहेको बताइन् । उनले १५ सय मेगावट विद्युत कसको झोलामा रहेको छ राज्यको स्रोत भएकाले सरकारले अनुसन्धान गर्ने जनाइन् ।

मन्त्री भुुसालले चार वर्षदेखि रोकिएको पीपीए अहिले खुला गरिएको र तत्काल बन्द नगर्ने पक्षमा सरकार रहेको जानकारी दिइन् । उनले विद्युत उत्पादनमा निजी क्षेत्र प्रवेश गरेकाले मुलुकमा लोडसेडिङको अन्त्य र विदेशमा विद्युत निर्यात गर्न सरकार सफल भएको दाबी गरिन् ।

\मन्त्री भुसालले गत आर्थिक वर्षमा मन्त्रालयको वित्तीय र भौतिक प्रगित क्रमशः ७६.६६ र ८० प्रतिशत उपलब्धि हासिल गरेको बताइन् । गत आवमा विद्युत उत्पादन क्षमता ७४१ मेगावाट थप भई कुल विद्युत उत्पादन क्षमता २२६९ मेगावाट पुगेको छ । ६६ केभीभन्दा माथिको प्रशारण लाइन ४४६ सर्किट किमी थप भई ५०८६ सर्किट किलोमिटर निर्माण भएको मन्त्री भुसालले जानकारी दिइन् । विद्युत् चुहावट १७.१८ बाट १५.३८ पुगेको पनि उनले बताइन् ।

मन्त्री भुसालले २० युनिटसम्म विद्युत खपत गर्ने ग्राहकलाई निःशुल्क विद्युत उपलब्ध गराउने निर्णय कार्यान्वयमा आइसकेको उल्लेख गरिन् ।

प्रकाशित मिति: आइतबार, भदौ १२, २०७९ १८:००