पर्यटन व्यवसाय विस्तारका लागि गरिएका ९ निर्णय, लगानी बढाउँदा सहुलियत

A+ A A-

नेपालमा विदेशी पर्यटक भित्र्याउन तथा पर्यटन व्यावसाय विस्तार गर्न पर्यटन मन्त्रालयअन्तर्गतको विषयगत समितिले विभिन्न ९ वटा निर्णय गरेको छ । शनिबार संस्कृति पर्यटन तथा नागरिक उड्यनमन्त्री जीवनराम श्रेष्ठको अध्यक्षमा बसेको बैठकले पर्यटन दशक मनाउनेसहितका ९ निर्णय लिएको हो ।

'संघ, प्रदेश र स्थानीय तह (समन्वय तथा अन्तरसम्बन्ध) ऐन, २०७७' बमोजिमको संस्कृति तथा पर्यटन क्षेत्रको विषगत समितिको बैठक राखिएको थियो । सबै मौसममा पर्यटकीय गतिविधि गर्न मिल्ने गन्तव्य क्षेत्रको पहिचान गरी बजारीकरण गर्ने निर्यणय गरिएको छ ।

२०२३ देखि ३३ सम्मलाई पर्यटन दशक घोषणा गर्नका लागि मन्त्रिपरिषदमा सिफारिस गर्नेलगायतका निर्णय गरिएको छ ।
यी हुन् नौ निर्णय

१. नेपालमा बाह्रै महिना पर्यटकीय गतिविधि सञ्चालन गर्न सक्ने किसिमको जलवायु तथा मौसमी विविधता रहेको हुँदा नेपाललाई सबै मौसममा पर्यटकीय गतिविधि गर्न मिल्ने पर्यटकीय गन्तव्यका रुपमा अन्तर्राष्ट्रिय क्षेत्रमा बजारीकरण गर्ने।

२. प्रत्येक प्रदेशका पर्यटकीय दृष्टिकोणले आकर्षक र महत्त्वपूर्ण रहेका स्थानहरूको ब्रान्डिङ गरी पर्यटकीय गन्तव्यहरूको विविधीकरणमा जोड दिने।

३. 'नेपालको पर्यटन क्षेत्रको पुनरुत्थान कार्ययोजना, २०७९' लाई सहकार्यात्मक एवम् समन्वयात्मक तवरले कार्यान्वयन गर्ने ।

४. क्षेत्रगत योजना, नीति तथा कार्यक्रम र रणनीतिहरूको कार्यान्वयनमा प्रभावकारिता ल्याउन सङ्‍घ, प्रदेश तथा स्थानीय तहबीचको आपसी सहकार्यलाई सबल र गतिशील बनाउने ।

५. संघीय व्यवस्था बमोजिम “पर्यटन नीति, २०६५” को समसामयिक परिमार्जन र राष्ट्रिय रणनीतिको तर्जुमा गर्दै पर्यटन दशक (२०२३-२०३३) को घोषणा गर्न नेपाल सरकारलाई अनुरोध गर्ने ।

६. निजी क्षेत्रलाइ पर्यटन व्यवसायमा लगानीका निम्ति विभिन्न सहुलियत तथा सेवा सुविधाहरू प्रदान गर्न अन्तर निकाय समन्वयलाई निरन्तरता दिने र ग्रामीण पर्यटनको विकासका निम्ति सामूदायिक सहभागितालाई प्रवर्द्धन गर्ने ।

७. साधनस्रोतको न्यायोचित वितरण गर्दै प्रादेशिक सन्तुलनसहितको पर्यटन क्षेत्रको दीगो विकासलाई सबै तहले आत्मसात गर्ने ।

८. विदेशी पर्यटकहरूको नेपाल प्रवेशमा सहजीकरण गर्न सीमा क्षेत्रमा हुने चेकजाँचलाई व्यवस्थित गर्न सम्बन्धित निकायसँग अनुरोध गर्ने।

९. प्रदेश तथा स्थानीय तहमा हस्तान्तरण भएका कार्यक्रम कार्यान्वयनमा तीनै तहले आपसी सहयोग र सहकार्य गर्ने ।

प्रकाशित मिति: शनिबार, भदौ ११, २०७९ २१:१०