बालेनजी, कुशल रही कुशलताको कामनासहित सडकबाट म स्वराेजगार ट्याक्सी चालकको तर्फबाट नमस्कार ।
हिजो तपाईंको स्वतन्त्र उम्मेद्बारीदेखि नै आशाका साथ नियालिरहेकाहरूमा काठमाडौंबासी मात्रै नभएर काठमाडाैंबाहिर, नेपालबाहिर भएका तमाम नेपालीहरू पनि छाैँ । तपाईंकाे जितमा हामी सबै खुसी भयाैँ । किनकि, तपाईंकाे जित काठमाडाैंबासीकाे मात्र हाेइन, तपाईंलाई रूचाउने संसारभरका नेपालीकाे जित थियाे ।
सुरुका दिनमा कतिपयले तपाईंको काममा भाँजो हालेकाे पनि देखियाे । तर तपाईं निर्भयसाथ दैनिक काममा सक्रिय हुनुले यहाँको परिचयलाई अझै फराकिलो पारेको छ । हामी सबै खुसीसाथ नियालिरहेका छाैँ । हामी ट्याक्सी चालकहरू त झनै खुसी छाैँ ।
अहिले काठमाडौंमा धेरै समस्याहरूकाे जडमध्ये एक पार्किङ अभाव पनि हाे । पार्किङ व्यवस्थित गर्न तपाईंकाे अग्रसरताकाे खुलेर प्रशंसा गर्न चाहन्छ । याे कामलाईं फत्ते गरेरै छाेड्नुहाेला अनुराेध पनि गर्छु । तपाईंका साथमा खटिरहनुभएकाे सुरक्षाकर्मी अनि उपत्यका ट्राफिक प्रहरी प्रमुखज्यूप्रति पनि कृतज्ञता प्रकट गर्छु ।
बालेनजी, शहरको सुन्दरता यहाँ गुड्ने सवारी र गरिने पार्किङमै झल्किन्छ । नक्सा एउटा छ, काम अर्कै भइरहेकाे कुरा हामीले धेरै अगाडिदेखि देखिरहेका थियाैँ । यस्ताे प्रवृत्तिविरुद्ध तपाईं जुन रफ्तारमा निरीक्षण/निगरानीमा खट्नुभएकाे छ, यस कार्यले दशकाैँदेखि फोहोरी राजनीतिको दलदलमा फसेका उपत्यकाबासी मात्रै हैन, पूरै देशबासीले राहत महसुस गरेका छन् ।
तपाईंकाे कामले दशकाैँदेखि स्वार्थकेन्द्रित राजनीतिमा जनतालाई अलमल्याएका दलहरूकाे मुटुमा समेत ढ्याङ्ग्राे बजेको महसुस हामीले गरिरहेका छाैँ ।
अहिले भइरहेकाे कामसँगै अब तपाईंकाे ध्यान सवारीतिर पनि जानेछ भन्ने हाम्राे अपेक्षा छ । यसमा पनि तपाईंलाई हाम्राे साथ रहने छ । तपाईंको चुनावी घोषणामध्य काठमाडौं उपत्यकाको सवारीसाधन व्यवस्थापन पनि एक हाे ।
उपत्यकाकाे सडक अस्तव्यस्त हुनुकाे एक कारण प्रयोजनविपरीत प्रयोग भएका सवारी साधन पनि हाे, जुन कुरा सबैलाई थाहा छ । तैपनि यहाँ केही काम नगरी खान पल्केकाहरूले यो गलत काम गराइरहेका छन्, जसमा नियामक निकाय मौन रहनु, उच्च अदालतको आदेश पालनासम्म नगराइनु बिडम्बना हाे ।
एउटै देश, गण्डकी प्रदेश, जहाँ लुकिछिपी निजी सवारीमा भाडा लिएर यात्रु ओसारपसार गर्ने सवारीसाधन दैनिकजसाे समातिन थालेका छन् । कारबाहीको भागिदार बनाइएको छ भने बागमती प्रदेशमा खुल्लमखुल्ला बार्गेनिङ गरी यात्रु ओसारपसार भइरहेको छ । याे जोखिमपूर्ण यात्रा गर्ने/गराउने जो कसैले पनि भईपरी आएको खण्डमा जिम्मेवारी नलिने, थोत्रा सवारी साधन दुर्घटना भइरहने र दुर्घटनापश्चात् भाग्ने प्रवृत्तिका कारण सयौं घाइते तथा अङ्गभङ्ग भएका छन् । यसकाे लेखजाेखा छैन ।
हाल यहाँ देशैभरबाट निजी दुई पाङ्ग्रे तथा चार पाङ्ग्रे सवारी साधनहरू भित्रिएका छन् । सडकमा कोही मान्छे एकैछिन उभिनसक्ने वातावरण छैन । यसरी खुलेआम गैरकानुनी धन्दा चलिरहेको छ । यहाँको सडक अस्तव्यस्त बनाउने प्रमुख कारक यिनै रहेकाे कुरा यहाँलाई स्मरण गराउँछु । सवारी नियममै नभएको काम, त्यो पनि वर्षौंदेखि भइरहँदा पनि टुलुटुलु हेरेर बस्ने नियामक निकाय देख्दा अचम्मित छु ।
अन्त्यमा, शहरकाे सुन्दरता दर्शाउनेमध्ये एक ट्याक्सी, जसकाे समुचित व्यवस्थापनखातिर महानगरले आफ्नै एप्लिकेसन निर्माण गरी डिजिटल प्रणालीमा रूपान्तरण गरिदिए राम्राे हुन्थ्याे । साथै हरेक सार्वजनिक सवारीमा जीपीएस तथा सीसीटीभी जडान गरी निगरानी गरिनेजस्ता कुराहरू तपाईंको घोषणापत्रमै समेटिएका छन् । पाँच दशकभन्दा बढी समयसम्म आम नागरिकलाई सेवा दिएकाे इतिहास बोकेको काठमाडौंमा संचालित उपत्यकाका स्थानीयबासीकाे करिब ७० प्रतिशत लगानी रहेको १२ हजार ३ सय ५० ट्याक्सीका करिब २५ हजार चालक र तिनका करिब २ लाखको हाराहारीमा आश्रित परिवारलाई विचल्ली पार्नेगरी चलाइएका निजी दुई तथा चार पाङ्ग्रे सवारी साधनको भाडामा काम गर्ने गैरकानुनी कार्यलाई यथाशीघ्र बन्द गराई कानुनतः वर्गीकरण भएअनुसारको सवारी साधन काममा प्रयोग गर्न/गराउनु हुन साथै यस कार्यको छिट्टै प्रारम्भ गर्नु अनुराेध गर्दछु ।
स्वरोजगार ट्याक्सी चालक
काठमाडौं ।
प्रकाशित मिति: शनिबार, भदौ ११, २०७९ १३:०१
