काठमाडाैंमा डाेजर: घरबेटीले कानुन मिच्दा व्यवसायी मारमा

A+ A A-

बुधबार बिहान १० बजे त्रिलोचन राम मदिकर्मी सदाझै काठमाडाैंकाे न्युराेडमा रहेकाे आरबी कम्प्लेक्सस्थित आफ्नो पसल प्रिया कलेक्सन गए । सरसफाइपछि 'बोहोनी' गरेर दसैँका लागि सामान हाल्न भारत जान लागेकी आफ्नी श्रीमती प्रिया पौडेललाई लिएर ११ बने एयरपोर्ट पुगे ।

एयरपोर्ट पुग्ने वित्तिकै पसलको स्टाफले आत्तिँदै फोन गरिन् । ‘स्टाफ बहिनीले फोन गरेर बालेन डोजर लिएर आएको छ, पसल खाली गर भने छिट्टो आउनुस् भनिन्,’ उनले भने । उनी हतारिँदै पसल पुग्दा पसलको भग्नावशेस मात्रै थियो । १ घण्टा अघि 'बोहोनी' गरेर हिँडेको पसलको त्यो अवस्था देख्दा उनी स्तब्ध भए ।

‘मैले के गर्ने भन्ने मेसो नै पाइनँ । प्रियाले बोर्डिङ पास लिइसकेकी रहेछिन् । उनलाई सबै कुरा भने र उनी पनि फ्लाइट क्यान्सिल गरेर फर्किइन्,’ मदिकर्मीले भने ।

स्टाफ र अरु पसलका साथीहरूले सकेसम्म सामान झिकेछन् । साना फेन्सी ज्वेलरी आइटम भएकाले हतारमा झिक्दा धेरै टुटफुट भएको उनले बताए । ‘करिब ५ लाख लगाएर गरेको डेकोरेसनको त कुरै छोडौं, सामान पनि राम्रोसगँ झिक्न पाइएन । झिकेका सामान पनि १०/१५ प्रतिशत मात्रै ठिक छ,’ उनले भने ।

उनकै छिमेकी पसल सुयसा कलेक्सनकाे कहानी पनि उस्तै छ । महानगरले टहरा भत्काउन भनेको हल्ला सुनेको भए पनि आरबी कम्प्लेक्स प्रसाशनले कुनै जानकारी नदिएको सुयसा कलेक्सनका संचालक सुमन पराजुलीले बताए । ‘दसैँको मुखमा त के भत्काउला भन्ने लागेको थियो । तर राम्रोसगँ सामान पनि झिक्ने मौका नदिई भत्काइदियो । चस्मा आइटम भएकाले हतारमा सार्दा धेरै ड्यामेज भयो । डेकोरेसन पनि सबै भत्कियो,’ उनले भने ।

बुधवार आरबी कम्प्लेक्समा त्रिलोचन र सुमन जस्ता १४ ब्यापारीको पसल भत्काइएकाे थियाे । उनीहरूकाे सामानमा क्षति भयो । महानगरले सूचना टाँस गरेको र भत्काउदै छ भन्ने आरबी कम्प्लेक्स प्रसाशनले व्यापारीहरूलाई जानकारी नै नदिएको त्रिलोचनले बताए ।

‘मंगलबार मात्रै ३५ दिने सूचना टाँसेको छ रे भन्ने सुनेर हामी आरबी कम्प्लेक्स प्रसाशनमा बुझ्न गएका थियौं । सबै गलत कुरा हो , यस्ता कुरा लिएर हामी कहाँ नआउनु भनेर थर्कएर पठायो । हामी ढुक्क भएर बस्यौं,’ उनले भने ।

भाडा तिरेर बसेका ब्यापारीलाई दसैँ तिहारको मुखमा व्यवसाय ध्वस्त पार्नु उचित नभएको नेपाल राष्ट्रिय व्यवसायी सघंका अध्यक्ष कुमार कार्कीले बताए । ‘भाडा, कर तिरेर बसेका ब्यापारीलाई चाडबाडको मुखमा अन्याय भयो । बरु अहिले चेतावनी दिएर पसल हटाउन समय दिनुपर्थ्याे ,’ उनले भने ।

कोरोनाको क्षतिबाट गुज्रिएका व्यापारीहरू साँढेको जुधाई बाख्राको मिचाईमा परेको उनको तर्क छ । ‘सरकारको नियम मान्न तयार छौं । तर घरबेटीको गल्तीको सजाय व्यापारीलाई किन दिने,’ उनले भने ।

सूचना थाहा पाइनँ भन्ने छुट कसैलाई नभएको महानगरपालिकाका भवन विभाग प्रमुख सुरज शाक्य बताउँछन् । ‘वडाबाट सूचना टाँस गरिएको थियो, पत्रिकामा सूचना आएको थियो । 'थाहा छैन भन्न कहाँ पाहियो र । यो त एउटा बहाना मात्र हो,’ शाक्यले भने ।

तस्वीरहरू : सुशिल श्रेष्ठ/शिलापत्र

प्रकाशित मिति: शुक्रबार, भदौ १०, २०७९ १६:०८