केकी र आर्यनको नामसहितको नक्कली पत्र नर्वेजियन दूतावासमा, सीआईबीले थाल्याे अनुसन्धान

केकी र आर्यनको नामसहितको नक्कली पत्र नर्वेजियन दूतावासमा, सीआईबीले थाल्याे अनुसन्धान

A+ A A-

नयाँ दिल्लीस्थित नर्वेजियन दूतावासबाट १ भदौ ०७९ मा नेपाल पर्यटन बोर्डका प्रमुख कार्यकारी अधिकृत (सीईओ) धनञ्जय रेग्मीलाई एउटा इमेल आयो । दूतावासको इमेल रेग्मीको सचिवालयका कर्मचारीले लगत्तै सीईओ रेग्मीको व्यक्तिगत इमेलमा पठाइदिए ।

दूतावासले बोर्डलाई इमेल गरेर नर्वे जान लागेका कलाकारको विषयमा ‘कन्फर्म’ गर्न खोजेको थियो । अर्थात् २० जुलाई २०२२ मा दूतावासलाई पठाएको सिफारिसपत्रमा उल्लेख भएका कलाकारहरूको भिसाका लागि बोर्डबाट थप जानकारी लिन खोजेको थियो ।

साउनको अन्तिम साता चलचित्र सुटिङका लागि नर्वे जान बोर्डको लेटरप्याडमा भिसाका लागि निवेदन नर्वेजियन दूतावास पुगेको थियो । अनि, दूतावासले त्यही सिफारिसपत्रका आधारमा बोर्डका सीईओबाट कन्फर्म गर्न खोज्नुले दूतावासले पत्रमाथि आंशका रहेको संकेत पनि गर्छ ।

खासमा, उक्त इमेल पढेपछि सीईओ रेग्मी भने छाँगाबाट खसेजस्तो भए । बोर्डको लेटरप्याडमा सीईओ रेग्मीको हस्ताक्षरमा १४ जना कलाकारलाई सेन्जेन भिसा उपलब्ध गराइदिने आग्रह गरिएको थियो ।

त्यस सिफारिसपत्रमा कलाकार केकी अधिकारीदेखि हरिश (आर्यन) सिग्देलसम्मको नाम थियो । आर्यन सिग्देलको खास नाम भने हरिश सिग्देल रहेको पनि त्यही पत्रको विवरणबाट खुल्छ । अन्यमा भने विभिन्न जिम्मेवारीमा रहेका व्यक्तिको नाम छ । चलचित्र तिम्रो नजरको सुटिङका लागि यो टोली नर्वेसहित युरोपका विभिन्न देश पुग्ने भनिएको छ ।

यो विवरणसहितको पत्र नर्वेजिय दूतावासमा पुगेको र उक्त दूतावासले कन्फर्म गर्न खोजेपछि सीईओ रेग्मी तनावमा परेका थिए । अढाई वर्षको कार्यकालमा भिसाका लागि कसैका लागि सिफारिस नगरेका रेग्मीले १४ जना कलाकारको टिमका लागि आफ्नो हस्ताक्षरसहितको सिफारिसपत्र दूतावासमा पुगेपछि आश्चर्यमा परे । र, वास्तविकता बुझ्न थाले ।

शिलापत्रलाई प्राप्त दूतावास पुगेको सिफारिसपत्र हेर्दा बोर्डको पत्र नम्बर ३०९—२०७८/०७९ मा २० जुलाई २०२२ मा ती कलाकारको भिसाका लागि सिफारिसपत्र लेखिएको छ । उक्त पत्रमा भएको व्यहोराअनुसार चलचित्र निर्माण कम्पनी ब्लु बर्ड एचडी प्राइभेट लिमिटेडले गर्ने भनिएको छ । जसमा निर्देशक दीपकप्रसाद आचार्य र निर्माता रोशन पराजुली भनिएको छ । त्यसबाहेक, नायिकामा केकी अधिकारी र नायकमा आर्यन सिग्देल (हरिश) को नाम सिफारिसपत्रको सूचीमा रहेको छ । यी दुई कलाकारबाहेक अन्य भने नयाँ र नसुनिएको नामहरू हुन् ।

ती नाम र सिफारिसपत्रको विवरण अध्ययन गरेपछि सीईओ रेग्मी अन्य समयमा गरेका आफ्ना हस्ताक्षरका फाइलहरूको अध्ययन मात्र होइन, हस्ताक्षरको पहिचानका लागि पटकपटक खाली पानामा हस्ताक्षर गरेका थिए ।

ती सबै अभ्यासमा हस्ताक्षर दुरुस्तै नभएपछि उनी बोर्डको सिफारिसपत्र नक्कली भएको दाबीसहित कानुनी प्रक्रियामा जाने निष्कर्षमा पुगेका छन् । साथै, तुरुन्तै दूतावासलाई इमेल लेखेर सीईओ रेग्मीले उक्त सिफारिसपत्र नक्कली भएको र भिसा नदिन आग्रह गरेका थिए ।

स्रोतका अनुसार सीईओ रेग्मीले जवाफ दिने क्रममा हस्ताक्षर र बोर्डको लेटरप्याड दुरुपयोग भएकाले कानुनी प्रक्रियामा जाने जानकारीसमेत दूतावासलाई गराएका थिए । जसको जवाफ तत्कालै दूतावासले सीईओलाई पठाएको थियो । यो संवादपछि दूतावास ती १४ जनालाई भिसा नदिने निर्णयमा पुगेको देखिन्छ । जब ती कलाकारहरूको टिमले भिसा पाएन, अनि घटना बाहिरियो । घटना बाहिरिएपछि केकी अधिकारी र आर्यन सिग्देलले उक्त घटनामा आफूहरू संलग्न नभएको प्रतिक्रिया दिएका छन । साथै, आफूहरूको सहमति, संलग्नता र जानकारीबिना नाम मुछिएको भन्दै कानुनी प्रश्न पनि उठाएका छन् ।

१ भदौ बिहान सीईओ रेग्मी र नर्वेजिन दूतावासबीच जब इमेल संवाद टुंगो लाग्यो, त्यसलगत्तै सीईओ रेग्मीले नेपाल प्रहरीको केन्द्रीय अनुसन्धान ब्युराेलाई पत्र लेखेर दूतावास पुगेको सिफारिसपत्रमाथि अनुसन्धान गर्न आग्रह गरेका छन् ।

ब्युरो स्रोतका अनुसार बोर्डबाट उक्त पत्रको मात्र होइन, विगत पाँच वर्षदेखिको अनुसन्धान गर्न आग्रह गरिएको छ । अर्थात्, विभिन्न दूतावासमा विगत पाँ वर्ष यता बोर्डका नाममा त्यसरी भिसाका लागि सिफारिस गरिएको रहेछ भने त्यस्ता पत्रको अनुसन्धान गर्न आग्रह गरेको हो ।

ब्युरोले दूतावासलाई सहयोगका लागि आग्रहसम्म गर्न सक्छ तर थप अनुसन्धानको दायरामा तान्न सक्ने अवस्था नभएकाले विगतको अवस्था के हुन्छ भन्न सकिन्न । तर, अहिलेको पत्रमाथि भने छानबिन हुन सक्ने बताइएको छ । बोर्डको सिफारिसपत्रको हस्ताक्षर सीईओ रेग्मीको हो वा होइन भन्ने पुष्टि भएपछि सिफारिसपत्र कसले बनाएको हो भन्ने पहिचानका लागि अनुसन्धान थालिनेछ । ब्युरो अहिले अनुसन्धानकै क्रममा रहेको छ ।

उक्त घटनामा संलग्न व्यक्तिको पहिचान भने अहिलेसम्म हुन सकेको छैन । स्रोतका अनुसार त्यसरी सिफारिस गरिएका १४ जनामध्ये एकजना व्यक्ति बोर्डका कर्मचारीको सम्पर्कमा पुगेको र घटनाप्रति माफी मागेको छ । तर, उक्त व्यक्तिको पहिचान खुलाउन भने स्रोतले अस्वीकार गर्‍यो । अनुसन्धानको क्रममा रहेका कारण उक्त व्यक्तिका पहिचान नखुलाए पनि चलचित्रको सुटिङको नाममा युरोप छिर्ने र लुक्ने मनसायसँग जोडिएको विश्लेषण भइरहेको छ । चलचित्र तिम्रो नजर निर्माण गर्ने भनिएको कम्पनी निमार्ता संघमा दर्ता नभएको पनि पाइएको छ ।

त्यसो त, बोर्डकै कर्मचारी र पर्यटन व्यवसायी मिलेर विगतमा अनाश्यक व्यक्तिलाई सिफारिस गरिदिने गरेको चर्चा थियो । केही घटनाहरू भएको पनि टिप्पणी छ । त्यसै कारण तत्कालीन सीईओ दीपकराज जोशीले बोर्डमार्फत हुने त्यस्ता अनधिकृत सिफारिसको विषयमा केही विदेशी दूतावासलाई पत्र लेखेका पनि थिए ।

प्रकाशित मिति: बिहीबार, भदौ ९, २०७९ ०६:३७