नवलपरासीमा खुल्यो नयाँ एलईडी टीभी कारखाना, सन् २०२३ देखि उत्पादन सुरु गर्ने

नवलपरासीमा खुल्यो नयाँ एलईडी टीभी कारखाना, सन् २०२३ देखि उत्पादन सुरु गर्ने

A+ A A-

नवलपरासी पश्चिममा टेलिभिजन बनाउने नयाँ कारखानाको शिलान्यास गरिएको छ । विश्वकै एक अग्रणी इलेक्ट्रोनिक्स र स्मार्टफोनहरूको ब्रान्ड सामसुङ इलेक्ट्रोनिक्सले हिम इलेक्ट्रोनिक्ससँगको सहकार्यमा नेपालमा टीभी कारखाना स्थापना गर्न लागेको हो ।

हिम इलेक्ट्रोनिक्स सामसुङको धेरै वर्षअगाडिदेखिको साझेदार कम्पनी हो ।

कारखाना शिलान्यास समारोहमा उद्योग, वाणिज्य तथा आपूर्तिमन्त्री दिलेन्द्रप्रसाद बडू र सामसुङ इलेक्ट्रोनिक्सका ग्लोबल अध्यक्ष तथा सीईओ एचके पार्कको उपस्थिति थियो ।

यसैगरी, समारोहमा लुम्बिनी प्रदेशका उद्योग, वाणिज्य तथा आपूर्ति मन्त्री अजय शाही, गोल्छा समूहका अध्यक्ष/प्रबन्ध निर्देशक शेखर गोल्छा, सामसुङ दक्षिण पश्चिम एसियाका क्षेत्रीय अध्यक्ष एवं सीईओ केन काङ, मित्रराष्ट्र दक्षिण कोरियाका राजदूत पार्कचोङ सुक र जिल्ला प्रशासन कार्यालय नवलपरासी पश्चिमका प्रमुख जिल्ला अधिकारी (सीडीओ) श्रवणकुमार पोखरेल र अन्य स्थानीय महानुभावहरूको समेत उपस्थिति थियो ।

समारोहलाई सम्बोधन गर्दै सामसुङ दक्षिण पश्चिम एसियाका क्षेत्रीय अध्यक्ष एवं सीईओ केन काङले भने, ‘हाम्रो लामो समयदेखिको साझेदार हिम इलेक्ट्रोनिक्ससँग मिलेर हामीले नवलपरासीमा स्थापना गर्न लागेको यो नयाँ एलईडी टीभी कारखाना नेपाली जनताप्रतिको हाम्रो निरन्तर प्रतिबद्धताका साथै सामसुङका उत्पादनहरूप्रति उपभोक्ताहरूले देखाउनुभएको बढ्दो विश्वास एवं मायाको प्रतीक हो । हामी नेपाल सरकार र स्थानीय निकायहरूलाई उहाँहरूले दिनुभएको साथ सहयोगका लागि आभार व्यक्त गर्दछौँ ।’

गोल्छा अर्गनाइजेसनका अध्यक्ष एवं प्रबन्ध निर्देशक शेखर गोल्छाले भने, ‘यो नयाँ टीभी कारखाना नेपालका लागि एउटा कोेसेढुङ्गा सावित हुनेछ । कारखानाको स्थापनाले देशमा उद्योगधन्दाको विकाससँगै दक्षता र उत्पादकत्वमा वृद्धि भई विश्वबजारमा थप प्रतिस्पर्धी बनाउन मद्दत पुग्नेछ । यो हाम्रो सामसुङसँगको २२ वर्ष लामो सहकार्यको सुखद परिणाम हो ।’

कारखानाले नेपालको उत्पादनयात्रामा एक महत्वपूर्ण अध्यायको सुरुवात गर्नेछ र स्थानीय उद्यम, नवीन सीप र दक्षता, आविष्कारहरू तथा रोजगारीका साथ देशमा इलेक्ट्रोनिक्सको क्षेत्रलाई रुपान्तरण गर्ने सम्भावनाहरू व्यापक बनाउने कम्पनीको विश्वास छ । साथै, यसले प्रभावकारिता र उत्पादकत्व वृद्धि गर्न, थप रोजगारीका अवसरहरू सिर्जना गर्न र देशमा एक बलियो इलेक्ट्रोनिक्स सामग्री उत्पादन गर्ने वातावरण बनाउन मद्दत पुग्ने कम्पनीको दाबी छ ।

कारखानाले सन् २०२३ देखि उत्पादन सुरु गर्ने लक्ष्य लिएको छ ।

नेपालमा सन् १९९७ देखि सामसुङले प्रवेश पाएको हो र आज देशमा यो ब्राण्ड घरेलु नाम बनिसकेको छ । हाल यसले आफ्नो साझेदार मार्फत नेपालमा उपभोक्तामुखी इलेक्ट्रोनिक्स उत्पादनहरू टेलिभिजन, रेफ्रिजेरेटर, वासिङ मेसिन, माइक्रोवेब र स्मार्ट फोनहरू बिक्रीवितरण गर्दै आइरहेको छ ।

नेपालमा ५०० भन्दा बढी इलेक्ट्रोनिक्स रिटेल स्टोरहरू र ग्राहक सेवा केन्द्रहरूको बलियो सञ्जालमार्फत सामसुङले सेवा प्रदान गर्दै आइरहेको छ ।

प्रकाशित मिति: बुधबार, भदौ ८, २०७९ १९:५१