७० वर्षअघि तेन्जिङ नोर्गेसित सगरमाथाको चुचुरोनजिकै पुगेर फर्केका रेमन्ड ल्याम्बर्ट

७० वर्षअघि तेन्जिङ नोर्गेसित सगरमाथाको चुचुरोनजिकै पुगेर फर्केका रेमन्ड ल्याम्बर्ट

A+ A A-

रेमन्ड ल्याम्बर्ट स्वीट्जरल्यान्डका पर्वतारोही थिए । उनले नेपालका तेन्जिङ नोर्गे शेर्पासँग पहिलाेपल्ट ८ हजार ६ सय ११ मिटर उचाइसम्म सगरमाथको यात्रा गरेका थिए । सगरमाथाकाे चुचुराेभन्दा केवल २ सय ५७ मिटर वरसम्म गरिएको त्यस यात्राले त्यसबेला नयाँ रेकर्ड राखेको थियो । शरद् ऋतु भएकै कारण उनीहरूले २ सय ५७ मिटर छिचोल्न नसकेर चुचुराेमा टेक्ने अवसर गुमाएका थिए ।

सन् १९५२ तिरकाे स्वीस अभियानअन्तर्गत रेमन्ड र तेन्जिङले गरेको त्याे यात्रा नै त्यसबखतको नयाँ रेकर्ड थियो । त्यसअघि कुनै पनि आरोही त्यति उच्च बिन्दुमा पुगेका थिएनन् । त्यसलगत्तै अर्को वर्ष २९ मे १९५३ तेन्जिङ र एडमन्ड हिलारीले सगरमाथाको शिखरमा पाइला राखेका थिए ।

जेनेभामा जन्मेका रेमन्ड ल्याम्बर्टको पर्वतारोहण करियर दोस्रो विश्वयुद्धबाट सुरु भएको हो । सन् १९५२ मा उनी एडवर्ड वाइस-डुनान्टको सगरमाथा जेनेभोइस अभियानका लागि छानिएका थिए । त्यसबेला तेन्जिङ नोर्गेलाई गाइड बनाएर तीन स्वीस पर्वतारोहीले सगरमाथा चढे, जसमध्ये एक थिए रेमन्ड । तर, ८ हजार ४ सय मिटर चढेपछि दुई जना स्वीस आरोहीले थप उक्लने आँट गरेनन् । तेन्जिङ र ल्याम्बर्टलाई छोडेर उनीहरू फर्किए ।

न त गतिलो प्रविधि, न उत्कृष्ट सामग्री । ८ हजार ४ सय मिटरमा तेन्जिङ र ल्याम्बर्टले सुत्ने झोला र स्टोभबिना नै रात बिताउनुपरेको थियो । मैनबत्तीले हिउँ पगालेर आएको पानीले नै उनीहरू आँत भिजाउन बाध्य भएका थिए । अक्सिजन सेटले मुस्किलले काम गरेको थियो । यद्यपि उनीहरूले हार मानेनन् । अक्सिजनबिना नै उनीहरू थप २ सय ५० मिटर उक्लिए ।

अन्ततः उनीहरू ८ हजार ६ सय ११ मिटरको उचाइमा रोकिए । तेन्जिङ र एडमन्ड हिलारीले सगरमाथाको शिखर पुग्नुअघि सगरमाथाको सबैभन्दा उच्च बिन्दुमा पुग्ने तेन्जिङ र रेमन्ड नै थिए । रेमन्ड ल्याम्बर्टको निधन २४ फेब्रअरी १९९७ मा भएको थियो ।

प्रकाशित मिति: शनिबार, भदौ ११, २०७९ ०५:३७