आफ्नै मोबाइलबाट कसरी खिच्ने दामीदामी फोटो ? पढ्नुहोस्, फोटोग्राफरका टिप्स

A+ A A-

संसारमा फोटोग्राफीको लोकतन्त्रीकरण भइसकेको छ । तपाईं/हाम्रो हातहातमा मोबाइल छ, जसमा थरीथरीका क्यामेरा जडित छन् । विगतमा क्यामेरा धनीहरूमै सीमित हुने भएकाले उनीहरूले मात्र तस्वीर खिच्थे । अचेल जोकोहीले तस्वीर खिच्न सक्छन् । अधिकांश मानिसको गोजीमै हुन्छ फोन क्यामेरा ।

प्रविधिले दिएको यो सुविधाको उपयोग हामीले उचित तरिकाले गर्न सकेका छौँ ? डीएसएलआरको फोटो हेरेर लोभिने हामी आफ्नै मोबाइलबाट त्योभन्दा गतिलो फोटो खिच्न सक्दैनौँ ?

पक्कै सक्छौँ । आउनुहोस्, आज हामी तपाईंलाई केही यस्ता टिप्स दिँदैछौँ, जसले तपाईंलाई डीएसएलआर क्यामेरा वा त्यसकाे भन्दा राम्रो फोटो मोबाइलबाटै निकाल्न सहयाेग पुर्‍याउनेछ ।

एड्भर्टाइजिङ फोटोग्राफर किशोर श्रेष्ठका अनुसार मोबाइल फोटोग्राफीका लागि सबैभन्दा पहिला आफ्नो फोन क्यामेरामा भएका फिचर्सबारे जान्न महत्त्वपूर्ण हुन्छ । हामीमध्ये धेरैले फोटो त खिच्छौँ तर क्यामेरामा पाएका कतिपय फिचर्सको प्रयोगबेगरै । त्यसैले एकपल्ट क्यामेरा ओपन गरेर त्यसका फिचर्सबारे जान्न आवश्यक हुन्छ । योभन्दा पनि साधारण सुझावचाहिँ के भने तपाईं पहिला आफ्नो क्यामेराको लेन्स राम्रोसित सफा गर्नुस् है । औँलाको चक्र लागेर वा धुलो जमेर लेन्स फोहोर भएको हुन सक्छ । यस्तो अवस्थामा फोटो राम्रो आउँदैन ।

आफ्नो क्यामेरामा के-के फिचर छन्, थाहा पाउनुहोस् । (सामान्य स्मार्टफाेनहरूमा पनि यी फिसर्च उपलब्ध छन् है)

क्यामेरा अन गरेपछि सेटिङ, फ्लास, टाइमर, इमेज रेसियो, पिक्चर कन्ट्रोलजस्ता फिचर्स देखिन्छ । यी फिचर्सबारे सामान्य ज्ञान हुनैपर्छ ।

प्रो मेडमा क्लिक गरेपछि थप फिचर्स देखिन्छन् । तपाईंले प्रो मेडमा आईएसओ, ह्वाइट ब्यालेन्स (डब्लूबी), एक्सपोजर आदि परिवर्तन गर्न सक्नुहुन्छ ।

आईएसओले उज्यालो घटाउने र बढाउने काम गर्छ । उज्यालो कम भएको ठाउँमा आईएसओ बढाउनुपर्ने हुन्छ । तर, आईएसओ धेरै पनि बढाउन हुँदैन । धेरै बढाइयो भने तस्वीर फाटेको जस्तो देखिन्छ ।

ह्वाइट ब्यालेन्सले फोटोको कलर परिवर्तन गर्ने काम गर्छ । धेरैजसो अटोमा नै राखेर खिच्दा हुन्छ । परीक्षणका लागि ह्वाइट ब्यालेन्स चेञ्ज गर्दा केही बिग्रँदैन । ह्वाइट ब्यालेन्स परिवर्तन गरेर खिचिएका दुई तस्वीर हेर्नुस् त:

white balance1661327142.PNG