जनकपुर–जयनगर रेल सुरु भएपछि नेपाल आउने धार्मिक पर्यटक बढे

A+ A A-

जनकपुर–जयनगर रेल सञ्चालनमा आएसँगै नेपालमा तीर्थयात्रा गर्ने भारतीय यात्रुहरूलाई सहज भएको छ ।

नेपालको कुर्थादेखि भारतको जयनगरसम्म रेल नियमित सञ्चालन हुन थालेपछि नेपालमा धार्मिक पर्यटकका साथै अन्य पर्यटकहरूलाई पनि आवतजावतका लागि सहज बनेको हो ।

२०७८ चैत १९ गते प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले भर्चुअल रूपमा सीमापार रेल सेवाको शुभारम्भ गरेका थिए । २०७१ देखि रेल मार्ग स्तरोन्नतिका लागि भारतले रेल सेवा पूर्ण बन्द गरेको थियो । गत चैतबाट रेल सेवा पुनः सञ्चालनमा आएसँगै पशुपतिनाथको दर्शन गर्न आउने भारतीय पर्यटकहरूलाई सहज बनेको छ । साथै, नेपालबाट भारत जाने र आउनका लागि पनि रेल मार्ग सहज बनेको यात्रुहरूको भनाइ छ ।

रेल सञ्चालनमा आएसँगै भारत र नेपालबीच जनकपुर हुँदै भारत जाने र आउनेहरूका लागि यातायातको सेवा व्यवस्थित बनेको उनीहरू बताउँछन् । भारतीय पर्यटक सुमन भिवाले नेपालमा घुम्न आउँदा रमाइलो महसुस भएको बताइन् । उनले रेलको यात्रा पनि धेरै सहज र राम्रो रहेको प्रतिक्रिया दिइन् । पहिला धेरै समस्या हुने गरे पनि अहिले रेल सञ्चालनमा आएपछि भने धेरै सहज बनेको उनले बताइन् ।

त्यस्तै, भारतीय यात्रु सरिता कुमारीले नेपाल र भारत रेलवे सेवा सञ्चालनका कारण धेरै सुविधा थपिएको बताइन् । उनले दिनमा दुईपटक मात्रै चल्ने भएकाले केही समस्या भएको र अब यो संख्यालाई बढाएर लैजानुपर्ने आवश्यकता रहेको बताइन् । रेल चल्दा समयका साथसाथै पैसाको पनि बचत भएको बताइन् । रेलमा बसमा भन्दा धेरै सुविधा हुने र परिवारसहित यात्रा गर्दा रेल नै उपयुक्त हुने उनको भनाइ छ ।

यात्रु रञ्जुकुमारी देवीले रेल सञ्चालन भएपछि यात्राका लागि राम्रो भएको प्रतिक्रिया दिइन् । त्यस्तै, भारतको बिहारका रामकृष्णले रेल सञ्चालनपछि काठमाडौंको पशुपतिनाथ आउँदा सहज भएको र अन्य धार्मिकस्थलको भ्रमणका लागि यात्रा गर्न सहज बनेको बताए । रेल सञ्चालनपछि समयको बचत भएको र सेवा पनि राम्रो रहेको उल्लेख गरे ।

त्यस्तै, भारतबाट घुम्नका लागि नेपाल आएका यात्रु विभाकर कुमारले नेपालमा रेलबाट आउँदा छिटो भएको र घुम्न पनि रमाइलो भएको बताए । अर्का भारतीय यात्रु बलरामकुमारले रेलको यात्रा धेरै राम्रो भएको र समयको पनि बचत भएको उल्लेख गरे । उनले पशुपति घुम्न आउन रेल सञ्चालनले धेरै सहज बनाएको र पशुपतिनाथ मन्दिर धेरै राम्रो लागेको बताए ।

टिकट बिक्रेता सन्तुकुमार यादवले यात्रुहरूको चाप बढिरहेको जानकारी दिए । उनले रेलहरू अझै थपेर दिनमा जतिसक्दो धेरैपटक रेल सञ्चालन गर्दा अहिलेको चापलाई धान्न सकिने बताए । उनले भारतबाट आउने यात्रु लगभग ४५ प्रतिशत हाराहारीमा रहेको र अन्य यात्रु भने स्थानीय रहेको बताए ।

रेल चलाउने गरी सरकारले ८ चैत २०७८ मा तेस्रोपटक रेलवे अध्यादेश जारी गरेको थियो । भारतले नेपालतर्फको खण्डलाई ब्रोडगेजमा विस्तार गरेर स्पिड टेस्ट गरेपछि भारतले नेपाल रेलवे कम्पनीलाई रेलमार्ग हस्तान्तरण गरेको थियो ।

३४ किलोमिटरको जनकपुर–जयनगर रेलमार्गमा ब्रोड गेज विस्तारका लागि सिभिलतर्फका सबै काम २०७५ सालमा नै सकिएको थियो । सरकारले पुस २०७५ बाट नै जनकपुर–जयनगर रुटमा रेल चलाउने घोषणा गरेको थियो । तर, विभिन्न कारण देखाएर रेल चलाउन अलमल हुँदै आएको थियो । तर, गत वर्षको चैत्रबाट रेल पुनः सञ्चालनमा आएसँगै नेपाली र भारतीय नागरिकलाई आवतजावतमा सहज भएको छ ।

प्रकाशित मिति: सोमबार, भदौ ६, २०७९ १५:३७