रुपन्देही ३ बाट चुनाव लड्‌ने उद्योगी खड्काको घोषणा

A+ A A-

उद्योगी केशव विक्रम खड्काले प्रतिनिधिसभा सदस्य निर्वाचनमा रुपन्देही ३ बाट स्वतन्त्र उम्मेदवारी दिने घोषणा गरेका छन् ।

भैरहवामा पत्रकार सम्मेलन गरी खड्काले उम्मेदवारी घोषणा गरेका हुन् । खड्काले घोषणा गरेको निर्वाचन क्षेत्र कांग्रेस केन्द्रीय सदस्य तथा गृहमन्त्री बालकृष्ण खाँण र एमालेका नेता घनश्याम भुसालको क्षेत्र हो । ६१ वर्षीष खड्काले मुलुकको वर्तमान परिस्थिति जटिल भएको र अहिलेका नेताहरूबाट कुनै अपेक्षा नभएकाले आफूले राष्ट्र निर्माणका लागि संसदीय निर्वाचनमा होमिएको बताए ।

‘म उद्योगी हुँ । राजनीति मेरा लागि नितान्त फरक विषय हो, उद्योगीका रूपमै बाँचुञ्जेल राष्ट्रलाई सबै किसिमका कर तिरेर सेवा गर्न चाहन्थे तर भ्रष्टाचार, बेथिति, कुशासनले मुलुक जर्जर भएपछि निर्वाचन लड्ने मनस्थितिमा पुगेको हुँ,’ उनले भने । उनले एउटा सफल उद्योगी राजनीतिमा आउँदा अत्यधिक चुनौती रहेको जनाउँदै त्यसका लागि आफूले ठूलै संघर्ष गर्नुपर्ने बताए ।

खड्काले आफूले निर्वाचन जिते सधैँ मुलुक, जनता र राष्ट्र हितका पक्षमा काम गर्ने बताए । ‘म स्वतन्त्र उम्मेदवार हुँ र निर्वाचन जितेपछि पनि स्वतन्त्र हुन्छ’, उनले भने, ‘मलाई कुनै दलीय ह्वीप लाग्दैन, त्यसैले सधैँ राष्ट्रियताको पक्षमा उभिन्छु, राष्ट्रिय ढुकुटीबाट एक पैसाको पनि सुविधा लिन्न र निरन्तर नेपाल आमाको सेवामा लाग्छु ।’

उनले निर्वाचित भएपछि आफ्नै निजी गाडी प्रयोग गर्ने र इन्धन, घरभाडालगायत कुनै सुविधा नलिने बताए । उनले निर्वाचनमा पनि भड्किलो खर्च नगर्ने र निश्चित रकम खर्चेर निर्वाचित हुने बताए ।

‘निर्वाचनका लागि मैले जम्मा ५ लाख रुपैयाँ छुट्टयाएको छु, त्यसैबाट सबै खर्च गरेर निर्वाचनमा विजयी हुन्छु भन्ने विश्वास छ’, उनले भने, ‘अब हामीले सोच्नेबेला आएको छ । सबै जनाले आफ्नो दल र वादभन्दा माथि उठेर सोच्नुस् र मतदान गर्नुस् ।’

प्रकाशित मिति: शुक्रबार, भदौ ३, २०७९ १४:१५