सालको रुख काटेको आरोपमा पक्राउ परेका लामिछानेको वन कार्यालयको हिरासतमै मृत्यु, स्थिति तनावग्रस्त

सालको रुख काटेको आरोपमा पक्राउ परेका लामिछानेको वन कार्यालयको हिरासतमै मृत्यु, स्थिति तनावग्रस्त

A+ A A-

सुर्खेतको लेकवेशी नगरपालिका- १० का ५८ वर्षीय धनिराम लामिछानेको वन कार्यालयको हिरासतमा मृत्यु भएको छ । हाल उनी वीरेन्द्रनगर- १३ मा बस्दै आएका थिए ।

लामिछाने मदन भण्डारी राजमार्गमा पर्ने सालको रुख काटेको अभियोगमा श्रीमतीसहित पक्राउ परेका थिए । उनलाई वनका कर्मचारीले पक्राउ गरेका थिए ।

उनी वन कार्यालयको हिरासतमा भुण्डिएको अवस्थामा मृत फेला परेका हुन् । लामिछानेको मृत्यु भएपछि जिल्ला वन कार्यालय परिसर तनावग्रस्त बनेको छ । रुख काटेको सूचना प्राप्त भएपछि जिल्ला वन कार्यालयबाट खटिएको वन रक्षकको टोलीले बिहीबार बिहान उनकी श्रीमतीलाई पक्राउ गरेको थियो ।

लामिछानेका आफन्तले भने उनको मृत्युलाई रहस्यमयी भनेका छन् । ‘वन कार्यालयबाट मिलापत्र गर्ने कुरा गरेर घर गए, झुक्काएर दाईलाई वनका चार जना कर्मचारीहरूले, लतार्दै, पिट्दै ल्याएका रहेछन् । अनी भाउजुलाई बाहिर निकाले र दाईलाई भित्र पठाएपछि यस्तो घटना घट्न पुग्यो,’ मृतकका भाई रामप्रसाद लामिछानेले भने ‘वनका कर्मचारीले कुटपिट गरेर मारेको र पछि डोरीले झुण्डाएर आत्महत्या गरेको भन्ने वाहना रचेको हो ।’

घटनाको सत्य, तथ्य छानबीन हुनुपर्ने माग राख्दै आफन्तहरू आन्दोलित बनेका छन् । लामिछानेलाई शव डिभिजन वन कार्यालय प्रमुख कृष्णराम धितालको ठाडो आदेशमा फरेस्टर सन्तोष खत्री, वन रक्षक पियुसराज तिवारीले पक्राउ गरेको आफन्तको आरोप छ ।

यता जिल्ला वन कार्यालय सुर्खेतले लामिछानेको मृत्यु कर्मचारीको कुटपिटबाट नभएको जनाएको छ । उनले आत्महत्या गरेको कार्यालयको दाबी छ । जिल्ला वन कार्यालय सुर्खेतका कार्यालय प्रमुख मुनबहादुर रावत घटना दुखद् भएको बताउँछन् । तर, मृतकका आफन्तले लगाएको आरोप निराधार रहेको उनको दाबी छ ।

प्रकाशित मिति: बिहीबार, भदौ २, २०७९ २०:३१