अबको चुनावलाई देश बन्धक बनाउने पार्टी र नेता फेर्ने अवसर बनाऔँ : राजेन्द्र लिङ्देन

अबको चुनावलाई देश बन्धक बनाउने पार्टी र नेता फेर्ने अवसर बनाऔँ : राजेन्द्र लिङ्देन

A+ A A-

राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देशलाई बन्धक बनाउने पार्टी र नेतृत्व परिवर्तन गर्न मंसिरमा हुने चुनावलाई उपयोग गर्नुपर्ने बताएका छन् ।

पोखरामा मंगलबार आयोजित राप्रपा कास्की क्षेत्र नम्बर १ को कार्यालय उद्घाटन कार्यक्रममा बोल्दै उनले आउँदो मंसिर ४ गते हुने प्रतिनिधि र प्रदेश सभा चुनावमार्फत पुराना दल र त्यसका नेतृत्व परिवर्तन गर्नुपर्ने बताए । ‘आउँदो चुनावलाई हामीले सधैँ आउने चुनाव जस्तो एउटा नेता छान्न र फेर्ने अवसरका रूपमा मात्र होइन, देशलाई लामो समयदेखि बन्धक बनाएर राख्ने दल र तिनका नेताबाट मुलुकलाई मुक्त गर्ने अवसरका रूपमा उपयोग गर्नुपर्छ,’ लिङ्देनले भने ।

मंसिरको चुनावमा राप्रपा तालमेल गरेर जाने–नजाने विषयमा निर्णयमा नपुगेको उनले बताए । तर, एमाले अध्यक्षसँग हालसालै भेट हुँदा चुनावबारे कुरा भने भएको लिङ्देनले खुलाए । वर्तमान राजनीतिक परिस्थिति र आगामी निर्वाचनबारे भेटमा छलफल भएको उनले सुनाए । ‘राप्रपाले यति सिट ल्याउने भन्दा पनि प्रदेश तथा प्रतिनिधिसभा चुनावबाट नयाँ राजनीतिक शक्तिको रूपमा स्थापित गर्ने प्रयास गरेका छौँ,’ लिङ्देनले भने ।

मलेसिया, दुबई, कतारलगायत देश नेपाली युवा गएर बनाएको भन्दै उनले अब युवाले आफ्नै देश बनाउनुपर्ने बताए । यसका लागि अठोट, हिम्मत र इमान्दार भएको नेतृत्व र असल प्रणाली आवश्यक पर्ने लिङ्देनको भनाइ थियो । ‘अहिलेको प्रणाली र नेतृत्व परिवर्तन गर्न कसैले दृढतापूर्वक यो व्यवस्था परितर्वन गर्न र नेतृत्व परिवर्तन गर्नुपर्छ भनेर कसैले भनेको छ भने त्यो राप्रपाले भनेको छ,’ उनले भने ।

लिङ्देनले अहिलेको व्यवस्थालाई संघीय व्यवस्था भने पनि प्रदेश सरकार खारेज हुनुपर्ने आफ्नो धारणा रहेको बताए । ‘नाम संघीयता राख्न हामीलाई आपत्ति छैन, तर प्रदेश खारेज हुनुपर्छ,’ उनले भने, ‘अहिले तीन तहका सरकार देशले धान्न सक्दैन, हामीले ऋण काढेर जनप्रतिनिधि पालेका छौँ ।’

लिङ्देनले निर्वाचन प्रणाली महँगो भएको टिप्पणी गरे । उनले सांसद बन्न मतदाता र प्रधानमन्त्री बन्न सांसद किन्नुपर्ने अवस्था आएको दाबी गरे । ‘अहिलेको जस्तो महँगो निर्वाचन प्रणालीमा सांसद हुन मतदाता किन्नुपर्ने । प्रधानमन्त्री हुन सांसद किन्नुपर्ने । प्रधानमन्त्री र मन्त्री भएपछि नीतिगत भ्रष्टाचार गरी देश लुट्र्ने र अर्को चुनावको जोहो गर्नुपर्ने स्थिति छ, यो भइन्जेलसम्म देश बन्दैन,’ उनले भने ।

उनले २०४६ सालपछि बनेका प्रधानमन्त्री, मन्त्री र उच्च पदस्थ कर्मचारीको सम्पत्ति छानबिन गर्नुपर्ने भन्दै त्यसको शुरुवात राप्रपाकै नेताबाट गर्न मागसमेत गरे । अहिलेका दलहरूले सत्तामा टिक्न विदेशीसँग साँठगाँठ गरेर हस्तक्षेप बढाएको उनले अरोप लगाए । गणतन्त्र स्थापनापश्चात देश विदेशी ऋणमा डुबेको अध्यक्ष लिङ्देनको दाबी छ ।

प्रकाशित मिति: मंगलबार, साउन ३१, २०७९ २०:३०