नाफा कमाउनेमा को अघि को पछि ? यस्तो छ १४ जलविद्युत् कम्पनीको वित्तीय अवस्था

A+ A A-

जलविद्युत्‌ कम्पनीहरूले आर्थिक वर्ष २०७८/७९ को वित्तीय विवरण सार्वजनिक गरिसकेका छन् । सार्वजनिक १४ जलविद्युत्‌ कम्पनीको वित्तीय अवस्था हेर्ने हो भने अधिकांश नोक्सानमा गएको देखिन्छ । जसमा सञ्चालन खर्च वृद्धिदेखि कर्जाको चपेटामा पर्दा पनि जलविद्युत्‌ कम्पनीहरूले पर्याप्त नाफा कमाउन नसकेका हुन् । यद्यपि अपि पावर तथा आँखु खोला लगायतका जलविद्युत्‌ कम्पनीको भने नाफा बढेको देखिन्छ ।

यी कम्पनी छन् नाफामा

अपि पावर कम्पनी

अपि पावर कम्पनी लिमिटेडले सार्वजनिक गरेको वित्तीय विवरणअनुसार कम्पनीले आर्थिक वर्ष २०७७/७८ मा १४ करोड १० लाख रुपैयाँ खुद नाफा आर्जन गरेको छ । यो नाफा अघिल्लो वर्षको तुलनामा ११.४८ प्रतिशतले बढी हो । अघिल्लो वर्ष कम्पनीले १२ करोड ६० लाख रुपैयाँ खुद नाफा आर्जन गरेको थियो ।

कम्पनीले समीक्षा अवधिमा विद्युत्‌ बिक्रीबाट ५१ करोड ९१ लाख रुपैयाँ आम्दानी गरेको छ । अघिल्लो वर्ष विद्युत्‌ बिक्रीबाट कम्पनीले ३६ करोड ७२ लाख रुपैयाँ आम्दानी गरेको थियो ।

चुक्तापुँजी ३ अर्ब ८४ करोड रुपैयाँ रहेको कम्पनीको जगेडा कोषको आकार बढेर २९ करोड ६६ लाख रुपैयाँको उचाइमा पुगेको छ । अघिल्लो वर्ष जगेडामा २७ करोड ९ लाख रुपैयाँ थियो ।

यस्तै, प्रतिशेयर आम्दानी घटेर ३ रुपैयाँ ६७ पैसा रहँदा प्रतिशेयर नेटवर्थ भने १ सय ७ रुपैयाँ ७२ पैसा पुगेको छ ।

आँखुखोला जलविद्युत्‌

नाफा गर्ने दोस्रो नम्बरमा आउँछ आँखुुखोला जलविद्युत्‌ कम्पनी । यो कम्पनीले पनि आर्थिक वर्ष २०७७/७८ मा नाफामा उल्लेख्य सुधार गरेको छ । अघिल्लो वर्ष १० करोड ५२ लाख नाफा निकालेको यो कम्पनीले गत असार मसान्तसम्म २ करोड ४८ लाख १३ हजार रुपैयाँ नाफा गरेको छ ।

कम्पनीले प्रकाशन गरेको वार्षिक वित्तीय प्रगतिमा विद्युत्‌ बिक्रीबाट मात्रै २२ करोड २९ लाख ८२ हजार रुपैयाँ आम्दानी गरेको छ । अघिल्लो वर्ष कम्पनीले विद्युत्‌ बिक्रीबाट १९ करोड ३५ लाख ७८ हजार रुपैयाँ मात्रै आम्दानी गरेको थियो ।

चुक्ता पुँजी झण्डै ८० करोड रुपैयाँमा पुर्‍याएको आँखुखोला जलविद्युत्‌को प्रतिशेयर आम्दानी पनि ३ रुपैयाँ १० पैसा पुगेको छ । प्रतिशेयर नेटवर्थ भने ७० रुपैयाँ ८० पैसा छ ।

वरुण हाइड्रोपावर

वरुण हाइड्रोपावर कम्पनीले पनि गएको वर्ष नाफामा नै रहन सफल बन्यो । गत आर्थिक वर्ष २०७७/७८ को सार्वजनिक वित्तीय विवरणअनुसार यस कम्पनीले यो वर्ष ३१ लाख ९९ हजार रुपैयाँ खुुद नाफा आर्जन गरेको हो । अघिल्लो वर्ष यस्तो नाफा २२ लाख ३० हजार रुपैयाँ थियो ।

खुद नाफा बढाएको कम्पनीले समीक्षा अवधिमा विद्युत्‌ बिक्रीबाट मात्रै ९ करोड ३९ लाख रुपैयाँ कमाएको छ । अघिल्लो वर्ष विद्युत्‌ बिक्रीबाट कम्पनीले ५ करोड ९७ लाख रुपैयाँ कमाएको थियो ।

कम्पनीको चुक्तापुँजी भने २६ करोड ७९ लाख रुपैयाँ पुगेको छ भने प्रतिशेयर आम्दानी १.३५, प्रतिशेयर नेटवर्थ १ सय ३ रुपैयाँ ७ पैसा छ ।

वित्तीय विवरणलाई अधार मान्ने हो भने आर्थिक वर्ष २०७८/७९ मा वरुण हाइड्रोपावरले राम्रै नाफा कमाएको देखिन्छ ।

सानिमा माई हाइड्रोपावर

सानिमा माई हाइड्रोपावरको नाफामा पनि उल्लेख्य वृद्धि भएको पाइन्छ । अघिल्लो वर्ष ४० करोड ६४ लाख ७६ हजार रुपैयाँ खुद नाफा गरेको यस कम्पनीले गत वर्ष ५४ करोड ५ लाख नाफा गरेको थियो । खुद नाफा बढेसँगै कम्पनीको प्रतिशेयर आम्दानी पनि १४ रुपैयाँबाट बढेर १७ रुपैयाँ कायम भएको छ ।

कम्पनीले सार्वजनिक गरेको वित्तीय विवरणमा गत एक वर्षमा मात्रै ९३.५० करोड रुपैयाँको विद्युत्‌ बिक्री गरेको जानकारी दिएको हो । जुन अघिल्लो आर्थिक वर्षको सोही अवधिको तुलनामा ९.९६% ले बढी हो ।

नाफामा वृद्धि गरेको यस कम्पनीले चुक्ता पुँजी मात्रै ३ अर्ब ८ करोड पुर्‍याएको छ ।

नेपाल हाइड्रो डेभलपर

नेपाल हाइड्रो डेभलपर लिमिटेडले गत आर्थिक वर्षको चौथो त्रैमाससम्म ३ करोड ३० लाख २७ हजार रुपैयाँ नाफा कमाएको छ । यो अघिल्लो वर्षको तुलनामा १ करोड ८२ लाख रुपैयाँले धेरै हो । अघिल्लो वर्ष कम्पनीले १ करोड ४८ लाख रुपैयाँ खुद नाफा कमाएको थियो ।

नाफामा दोब्बरले वृद्धि गरेको कम्पनीले विद्युत्‌ बिक्रीबाट पनि आम्दानी बढाएको छ । पछिल्लो एक वर्षमा कम्पनीले ९ करोड ५० लाख रुपैयाँबराबरको विद्युत्‌ बिक्री गरेको हो । जबकि अघिल्लो वर्ष यस्तो आम्दानी ७ करोड २२ लाख रुपैयाँ मात्रै थियो ।

नाफा बढेसँगै कम्पनीको चुक्ता पुँजी ३१ करोड ९९ लाख रुपैयाँ पुगेको छ । वित्तीय विवरणअनुसार जगेडा कोषमा २ करोड २१ लाख रुपैयाँ जम्मा गरेको यो कम्पनीको प्रतिशेयर आम्दानी पनि बढेर १० रुपैयाँ ३२ पैसा कायम हुन पुगेको छ । यसको प्रतिशेयर नेटवर्थ १०६ रुपैयाँ ९२ पैसा छ ।

न्यादी जलविद्युत्‌

अघिल्ला वर्षहरूमा लगातार नोक्सान मात्रै ब्यहोर्दै आएको न्यादी हाइड्रोपावरले आर्थिक वर्ष २०७८/७९ मा भने नाफा गर्न सफल भएको छ । अघिल्लो वर्ष २ करोड १९ लाख रुपैयाँ नोक्सानी ब्यहोरेको कम्पनीले यो यो वर्ष भने ११ करोड ७ लाख रुपैयाँ आम्दानी गरेको हो ।

यस्तै, चुक्ता पुँजी १ अर्ब ५० रुपैयाँ पुर्‍याएको यो कम्पनीको रिजर्भ कोष भने ८ करोड ५३ लाख रुपैयाँले ऋणात्मक देखिएको छ । अघिल्लो वर्ष यस्तो रकम ८ करोड ९४ लाख रुपैयाँ ऋणात्मक थियो ।

कम्पनीको प्रतिशेयर आम्दानी भने १ रुपैयाँ १० पैसा छ भने नेटवर्थ ९४ रुपैयाँ ३१ पैसा छ ।

घाटामा छन् यी कम्पनी

अपर तामाकोसी हाइड्रोपावर

अपर तामाकोसी हाइड्रोपावर कम्पनी लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ । विवरणअनुसार कम्पनीको खुद नोक्सानी अघिल्लो आर्थिक वर्षको तुलनामा बढेको छ ।

अघिल्लो आर्थिक वर्षको अन्त्यसम्ममा ५ करोड ३४ लाख रुपैयाँ ऋणात्मक रहेको कम्पनीको खुद नाफा गत आर्थिक वर्षको सोही अवधिको तुलनामा १ अर्ब ८७ करोड ३९ लाख रुपैयाँ ऋणात्मक भएको छ ।

गत आर्थिक वर्षको अन्त्यसम्ममा कम्पनीले विद्युत्‌ बिक्रीबाट ७ अर्ब १७ करोड ३५ लाख रुपैयाँ आम्दानी गरेको छ । यससँगै कम्पनीको सञ्चालन आम्दानी ३ अर्ब ७४ करोड ९१ लाख रुपैयाँ पुगेको छ । कम्पनीको वित्तीय आम्दानी ५ अर्ब ६२ करोड ८२ लाख रुपैयाँ ऋणात्मक रहेको छ । जसले गर्दा खुद नोक्सानी बढ्न पुगेको हो ।

१० अर्ब ५९ करोड रुपैयाँ चुक्ता पुँजी रहेको यस कम्पनीको जगेडा कोष सो अवधिसम्ममा २ अर्ब ७१ करोड ७९ लाख रुपैयाँ ऋणात्मक रहेको छ ।

असार मसान्तसम्ममा कम्पनीको प्रतिशेयर आम्दानी १७ रुपैयाँ ६९ पैसा ऋणात्मक छ । सो अवधिसम्ममा कम्पनीको प्रतिशेयर नेटवर्थ ७४ रुपैयाँ ३३ पैसा छ ।

अरुण काबेली पावर

अरुण काबेली पावर लिमिटेडले २४.९५ लाख रुपैयाँ खुद नाफा कमाएको छ । यस्तो नाफा अघिल्लो वर्ष खुद नाफाभन्दा १३.८९ प्रतिशतले कमी हो । अघिल्लो वर्ष १८ करोड २७ लाख खुद नाफा कमाएको थियो ।

खुद नाफा घटेसँगै कम्पनीको प्रतिशेयर आम्दानी पनि घटेर १३.४५ कायम भएको छ । खुद नाफा घटे पनि यस वर्ष विद्युत्‌ बिक्री भने राम्ररी गरेको छ । यो वर्ष कम्पनीले ७५ करोड १० लाख रुपैयाँ विद्युत्‌ बिक्री गरेर कमाउन सफल बन्यो ।

साञ्जेन जलविद्युत्‌

साञ्जेन जलविद्युत्‌ कम्पनी पनि लगातार नोक्सानीबाट बाहिर आउन सकेको छैन । गत वर्षको वित्तीय स्थिति सार्वजनिक गर्दै कम्पनीले अझै ३ करोड ९८ लाख ७८ हजार रुपैयाँ घाटा रहेको जनाएको छ ।

अघिल्लो वर्ष कम्पनी यस्तो घाटा २ करोड ९८ लाख रुपैयाँ थियो । नाफा बढाउनुको साटो उल्टो घाटा बढाउँदै गएको यो कम्पनी निर्माणाधीन चरणमै छ । निर्माण समय लम्बिएपछि कर्जाको चपेटामा परेको यस कम्पनीले आफ्नो चुक्ता पुँजी भने ३ अर्ब २८ करोड ५० लाख रुपैयाँ पुर्‍याइसकेको छ । कम्पनीले प्रतिशेयर आम्दानी भने १ रुपैयाँ २१ पैसा माइनसमा छ । प्रतिशेयर नेटवर्थचाहिँ ९३ रुपैयाँ ५२ पैसा छ ।

युनाइटेड मोदी हाइड्रोपापवर

नाफा गुमाउनेमा युनाइटेड मोदी हाइड्रोपावर पनि अगाडि छ । यो कम्पनीले अघिल्लो वर्षको तुलनामा गत वर्ष ४ करोड ९३ लाख रुपैयाँ बढी नाफा कमाएको हो । आर्थिक वर्ष २०७७/७८ मा ६ करोड ४० लाख रुपैयाँ नाफा कमाएको कम्पनीले आर्थिक वर्ष २०७८/७९ मा भने १ करोड ४७ लाख रुपैयाँ मात्रै कमाएको छ ।

कम्पनीको विद्युत्‌ बिक्रीबाट हुने आम्दानी पनि घटेको छ । अघिल्लो वर्ष २८ करोड ८३ लाख रुपैयाँ बिजुली बेचेर कमाएकोमा गत आर्थिक वर्षमा यस्तो नाफा २५ करोड ३९ लाख रुपैयाँ मात्रै छ ।

चुक्ता पुँजी १ अर्ब १५ करोड पुगेको यस कम्पनीको रिजर्भ कोषमा ९ करोड १८ लाख छ भने प्रतिशेयर आम्दानी १ रुपैयाँ ८ पैसा र प्रतिशेयर नेटवर्थ १ सय ७ रुपैयाँ ९८ पैसा छ ।

हिमालय ऊर्जा

हिमालय ऊर्जा विकास कम्पनीले पनि गएको एक वर्षमा १ करोड ८५ लाख ४२ हजार रुपैयाँ नोक्सानी ब्यहोरेको छ । कम्पनीले सार्वजनिक गरेको वार्षिक वित्तीय विवरणमा अघिल्लो वर्षको तुलनामा गएको वर्ष ४३ हजार रुपैयाँले खुद नोक्सानी ब्यहोरेको जनाएको हो ।

गत वर्षबाटै उत्पादन सुरु गरेको यो कम्पनीले विद्युत्‌ बिक्रीबाट भने १ करोड ८७ लाख रुपैयाँ आम्दानी गरेको छ । यो कम्पनीको चुक्ता पुँजी ९९ करोड रुपैयाँ रहेको देखिन्छ भने प्रतिशेयर आम्दानी १ रुपैयाँ ८७ पैसा माइनसमा देखिन्छ । प्रतिशेयर नेटवर्थ भने ९७ रुपैयाँ २६ पैसा छ ।

मध्य भोटेकोसी

पछिल्लो केही वर्षदेखि निरन्तर नोक्सानीमा रहेको मध्य भोटेकोसीले गत वर्ष भने थोरै सुधार गरेको देखिन्छ । यद्यपि नोक्सानीबाट बाहिर निस्केर नाफा भने कम्पनीले अझै कमाएको देखिँदैन ।

अघिल्लो वर्ष ३ करोड ४७ लाख रुपैयाँ नोक्सानी ब्यहोरेको कम्पनीले गत वर्ष यस्तो नोक्सानी १ करोड ९३ लाख रुपैयाँले घटाएको हो । अर्थात् आर्थिक वर्ष २०७८/७९ मा यस्तो नोक्सानी १ करोड ५४ लाख रुपैयाँ छ ।

चुक्ता पुँजी ६ अर्ब रुपैयाँ पुर्‍याएको यो कम्पनीको प्रतिशेयर आम्दानी पनि २६ पैसाले माइनसमा छ भने प्रतिशेयर नेटवर्थ ९४ रुपैयाँ ९५ पैसा छ ।

बुटवल पावर

आर्थिक वर्ष २०७७/७८ मा राम्रै नाफा कमाएको बुटवल पावर कम्पनीले गएको आर्थिक वर्षमा भने उल्लेख्य प्रगति गर्न सकेन । अर्थात् अघिल्लो वर्ष ५० करोड १८ लाख रुपैयाँ खुद नाफा गर्दा यस वर्ष भने २६ करोड ३९ लाख रुपैयाँ मात्रै नाफा गर्न सफल भएको छ । खुद नाफामा उल्लेख्य कमी आएको कम्पनीको विद्युत्‌ बिक्रीबाट हुने आम्दानी भने बढेर ७७ करोड ५० लाख रुपैयाँ पुगेको छ ।

चुक्ता पुँजी ३ अर्ब २४ करोड पुगेको यस कम्पनीको प्रतिशेयर आम्दानी पनि ९ रुपैयाँले घटेर ८ रुपैयाँमा आइपुगेको छ । अघिल्लो वर्ष यस्तो रकम १७ रुपैयाँ थियो । प्रतिशेयर नेटवर्थ २ सय १५ रुपैयाँ छ ।

प्रकाशित मिति: बुधबार, भदौ १, २०७९ १३:०३