बाढी र पहिरोबाट १ अर्बको क्षति, ९० हजार घर प्रभावित

A+ A A-

असार अन्तिम साता सक्रिय भएको मनसुनका कारण आएको अविरल वर्षापछिको बाढीपहिरो र डुबानले मुलुकका विभिन्न जिल्लामा १ अर्ब बढीको क्षति भएको छ ।

बाढीपहिरो र डुबानले विभिन्न ६७ जिल्ला प्रभावित भएका थिए । अहिलेसम्म ३६ जिल्लाबाट प्राप्त विवरणअनुसार १ अर्ब ६ करोड ४५ लाखको क्षति भएको गृह मन्त्रालयले जनाएको छ । विपद्बाट झन्डै ९० हजार घर प्रभावित भएका छन् ।

मन्त्रालयको राष्ट्रिय आपतकालीन कार्य सञ्चालन केन्द्रका प्रमुख वेदनिधि खनालले प्रारम्भिक अनुमानमा १ अर्ब बढीको क्षति भएको जानकारी दिँदै जिल्लामा विवरण संकलन कार्य अझै पनि जारी रहेको बताए ।

बाढीबाट सबैभन्दा बढी १ अर्ब २ करोडको क्षति भएको छ । पहिरोबाट २ करोड ८८ लाख तथा भारी वर्षाका कारण ८० लाखको क्षति भएको जनाइएको छ । यस्तै, ७ र ८ साउनमा लमजुङ र गुल्मीमा बाढी र पहिरोका कारण ठूलो जनधनको क्षति भएको छ ।

९० हजार घर प्रभावित

विपद्का कारण झन्डै ९० हजार घरधुरी प्रभावित भएको छ । विपद्बाट २२ हजार ६७० घरधुरी विस्थापित भएको, १९ हजार ९७४ घर पूर्ण क्षति र ४१ हजार ३४३ घर आंशिक क्षति भएको तथा ६ हजार बढी घरमा सामान्य क्षति भएको राष्ट्रिय आपतकालीन कार्य सञ्चालन केन्द्रले जनाएको छ ।

अहिले विभिन्न क्षेत्रमा राहत वितरण कार्य जारी रहेको केन्द्रका प्रमुख खनालले जानकारी दिए । उनले राजमार्गमा भएको क्षतिको पुनर्निर्माणको कामसमेत जारी रहेको जानकारी दिए ।

राहत र उद्धारको कार्यलाई प्रभावकारी बनाउन केन्द्र, प्रदेश र स्थानीय तहका सरकारबीच प्रभावकारी सञ्चार र समन्वयका साथ स्रोत र साधनलाई परिचालन गरिएको सरकारले जनाएको छ । मृतककाे परिवारलाई प्रतिमृतक १ लाखका दरले राहत वितरण कार्य सुरु गरिएको छ ।

प्रकाशित मिति: आइतबार, साउन १२, २०७६ १७:०७