कानुनविपरीत प्रभु साहको निजी प्रतिष्ठानमा विद्यालय भवन बनाइँदै

A+ A A-

रौतहटमा एक विद्यालयकाे भवन निर्माणका लागि आएको बजेटबाट अर्कैको नाममा रहेको जग्गामा भवन निर्माण भएको खुलेको छ । रौतहटको फतुवाविजयपुर नगरपालिका– १ मा रहेको श्री दलित प्राथमिक विद्यालय गमहरियाको भवन निर्माणका लागि तराई-मधेस समृद्धि विकास कार्यक्रमअन्तर्गत नगरपालिकाले बजेट उपलब्ध गराएको थियो ।

तर, उक्त बजेटबाट भवन विद्यालयकै नाममा रहेको जग्गामा नबनाएर तराई-मधेस जनयुद्ध शहीद स्मृति प्रतिष्ठानको नाममा रहेको जग्गामा बनाइएको खुलेकाे हाे । भवन निर्माणका लागि फतुवा विजयपुर नगरपालिकाले २५ लाख बजेट उपलब्ध गराएको थियो ।

नगरपालिकाले विद्यालयको नाममा जग्गा हुँदाहुँदै अरू नै संस्थाकाे जग्गामा भवन बन्दै गरेको पाएपछि निर्माण कार्य रोक्न भवन निर्माण उपभोक्ता समितिलाई पत्राचार गरेकाे थियो ।

तर, नगरपालिकाको पत्र नपुग्दै भवन निर्माण अन्तिम चरणमा पुगेको छ । तराई-मधेस जनयुद्ध शहीद स्मृति प्रतिष्ठानमा एमाले नेता प्रभु साह छन् । उसो त साहले स्कुलको नाममा खरिद गरेको जग्गासमेत आफैँले स्थापना गरेको तराई-मधेस जनयुद्ध शहीद स्मृति प्रतिष्ठानको नाममा नामसारी गराएको विद्यालयका एक कर्मचारीकाे आराेप छ ।

२०६४ सालदेखि स्थापना भएको दलित प्रावि विद्यालयमा अहिले विद्यार्थी छैनन् । तर, विभिन्न शीर्षकमा स्कुलको नाममा वार्षिक रकम आउने र भ्रष्टाचार हुने गरेको स्रोतले जनाएको छ । विद्यालयका प्रधानाध्यापक रामईश्वरराम चमारले भने आफूलाई बजेट आएको तर भवन निर्माणबारे कुनै जानकारी नभएको र निर्माण कार्य सबै मुखियाहरूले गरेको बताए ।

‘हामीलाई कुनै जानकारी छैन । सबै कुरा मुखियाहरूले गरेका हुन् । हामीलाई एक दिन बैठकमा बोलाउनुभएको थियो । हामी गएका थियौँ । अब कसरी त्यो जग्गा स्कुलको नाममा नामसारी हुन्छ, मलाई केही थाहा छैन,’ प्रधानाध्यापक चमारले भने ।

प्रभु साहसँग यसबारे जानकारी लिन खोज्दा उनीसँग सम्पर्क हुन सकेन । फतुवाविजयपुर नगरपालिका उपमेयर अपबेय खातुनलेसमेत यसअघिकाे नगरप्रमुखले विद्यालय कुन सिहाबमा निजी प्रतिष्ठानमा बनाउन अनुमति दिए त्याे बारेमा थाहा नभएकाे प्रतिक्रिया दिइन् ।