ट्याक्सीचालकमाथि लोत्सेको ज्यादति, पार्किङ नगर्दा पनि तिर्नुपर्छ शुल्क

A+ A A-

शनिबार ट्याक्सीचालक दीपक नेपाल टोखाबाट यात्रु बोकेर नयाँ बसपार्क पुगे । बसपार्कमा उनले यात्रु छोड्नेबित्तिकै पार्किङमा कर्मचारी आए र २० रुपैयाँको पार्किङ शुल्कको बिल थमाए ।

‘पार्किङमा राखे पनि, नराखे पनि त्यहाँ त छिर्नेबित्तिकै पैसा तिर्नुपर्छ । त्यहाँबाट यात्रु उठाउँदा पैसा लिएको भए त ठीकै थियो । त्यहाँ यात्रुु झारेर मात्रै फर्किंदा पनि पार्किङ शीर्षकमा पैसा उठाउनु त अन्याय नै हो नि,’ उनले भने ।

पार्किङको बिलमा प्रवेश गरेको समय १४ः५५ः२१ लेखिएको छ भने निस्किएको समय पनि १४ः५५ः२१ नै उल्लेख छ । बिलअनुसार उक्त ट्याक्सी बसपार्कमा पार्किङ गरेर राखिएको छैन । यति मात्र होइन, एकै दिन यात्रु लिएर जतिपटक बसपार्क छिर्‍यो, त्यतिपटक पार्किङ शुल्क तिर्नुपर्ने उनले जानकारी दिए ।

व्यवसायीहरूले यो ज्यादतिका विरुद्धमा धेरैपटक आवाज उठाउँदा पनि लोत्सेले सुनुवाइ नगरेको नेपाल राष्ट्रिय मिटर ट्याक्सी व्यवसायी तथा चालक सेवा समाजका सचिव दिलीप कुमार श्रेष्ठ ‘दीपक’ले जानकारी दिए ।

‘कि त प्रवेश शुल्क लेखेको भए हुन्थ्यो तर प्रत्येक ट्याक्सीलाई पार्किङ नै नगरी पार्किङको रसिद थमाइन्छ,’ उनले भने ।

यो विषयमा नेपाल यातायात व्यवसायी राष्ट्रिय महासंघ र लोत्से बहुउद्देश्यीय प्रालिलाई बारम्बार जानकारी गराउँदा पनि कसैले वास्ता नगरेको उनको आरोप छ ।

‘लोत्सेका अध्यक्ष दीपक कुँवरले त हामीलाई भेट गर्ने मौका पनि दिनुभएन । साना कर्मचारीहरूसँग छलफल गर्दा झगडाकै स्थिति आयो,’ उनले भने ।

महासंघले पनि ट्याक्सी व्यवसायीका समस्याको विषयमा कुनै चासो नदेखाएको र लोत्सेसँगै मिलेमतो गरेको उनको आरोप छ ।

नेपाल राष्ट्रिय मिटर ट्याक्सी व्यवसायी तथा चालक सेवा समाजको कार्यसमितिको बैठकमा यो विषय उठिसकेकाले अब के गर्ने भन्ने आगामी बैठकले निर्णय गर्ने उनले बताए ।

ट्याक्सी व्यवसायीको यो समस्याका विषयमा महासंघ गम्भीर रहेको नेपाल यातायात व्यवसायी राष्ट्रिय महासघंका वरिष्ठ उपाध्यक्ष सरोज सिटौला बताउँछन् ।

‘यो समस्याका बारेमा बुझ्न ट्राफिक प्रहरी महानिरीक्षकसहित महासघंका प्रतिनिधि गएका थियौँ । बसपार्कमा ८/१० मिनेट ट्याक्सी राख्न पाइन्छ भन्ने बुझिएको थियो । ट्याक्सी व्यवसायीलाई त्यस्तो समस्या भए हामी फेरि बुझ्छौँ,’ उनले भने ।

यस विषयका बारेमा बुझ्न शिलापत्रले लोत्से बहुउद्देश्यीय प्रालिका महाप्रबन्धक सुनिल कुँवरसँग बारम्बार प्रयास गर्दा पनि उनी सम्पर्कमा आएनन् ।

प्रकाशित मिति: आइतबार, साउन २९, २०७९ १८:२९