टानकाे चुनाव भाेलि, सापकाेटा प्यानलमा काे-काे खुले ?

A+ A A-

भाेलि हुने ट्रेकिङ एजेन्सिज एशोशिएशन अफ नेपाल (टान)को निर्वाचनमा पर्यटन क्षेत्रका पुराना र वरिष्ठ पर्यटन व्यवसायीहरू दुई समूहमा बाँडिएका छन् । टानका पूर्वअध्यक्षहरू तथा वरिष्ठ पर्यटन व्यवसायी दुई खेमामा बाँडिएर मतदानका लागि अपिल पनि गर्न थालेका छन् ।

टानका पूर्वअध्यक्षहरू नेपाल पर्यटन बोर्डका पूर्व बोर्ड सदस्यहरू तथा नेपाल पर्वतारोहण संघका निर्वतमान र वर्तमान अध्यक्षसहितको एउटा टोलीले भने रामप्रसाद सापकोटा (कमल)को समूहलाई समर्थन गर्दै सार्वजनिक अपिल गरेका छन् ।

सापकोटाको समूहलाई निर्वाचित गराउन सामूहिक अपिल गर्नेमा पूर्वपर्यटन राज्यमन्त्री तथा टानकी पूर्वअध्यक्ष यांकिला शेर्पा, टानका पूर्वअध्यक्ष जेवी सिंह, प्रतिष्ठित व्यापारिक घराना यति समूहका अध्यक्ष लाक्पा सोनाम शेर्पा, नेपाल पर्वतारोहण संघका अध्यक्ष निमा नुरु शेर्पा, नेपाल पर्वतारोहण संघका निर्वतमान अध्यक्ष सन्तवीर लामा, टानका पूर्वअध्यक्ष नवराज दाहाल, टानका पूर्वअध्यक्ष, नेपाल पर्यटन बोर्डका पूर्वबोर्ड सदस्य र नेपाल वायुसेवा निगमका पूर्व सञ्चालक समिति सदस्य फुर ग्याल्जेन शेर्पा, स्थापित पर्यटन व्यवसायी तथा टान र पाटा नेपाल च्याप्टरका पूर्वअध्यक्ष सुमन पाण्डे, पर्वतीय प्रशिक्षण प्रष्ठिानकी पूर्वअध्यक्ष लाक्पा फुटी शेर्पा, टानको पूर्वअध्यक्ष सीताराम सापकोटा, टानका पूर्ववरिष्ठ उपाध्यक्ष टासी लाक्पा शेर्पा, पर्यटन बोर्डका पूर्व कार्यकारी सदस्यहरू राजेन्द्र सापकोटा, पम्फा धमलालगायत रहेका छन् ।

उनीहरूले सार्वजनिक अपिल गर्दै ‘टानको उद्देश्य प्राप्तिका लागि दृढ, सचेत, अनुभवी र व्यवसायिक क्षमता भएको नेतृत्व आवश्यकता पर्ने बताएका छन् । त्यस्तो नेतृत्वले मात्रै ट्रेकिङ व्यवसायीहरूको समस्या समाधान गर्न सक्ने भएकाेले सापकाेटा समूहलाई जिताउन अपिल गरिएकाे हाे ।

उनीहरूको सामूहिक अपिलमा थप भनिएको छ, ‘राज्य र सरकारका निकायहरूसँग समन्वयकारी भूमिका निर्वाह गरी टानलाई परिस्कृत र व्यवस्थित बनाउनु हामी सबै व्यवसायीहरूको दायित्व हो । हामीले जस्तो नेतृत्व चयन गर्न सक्यौँ हाम्रो संस्था पनि त्यस्तै हुनेछ । तसर्थ वर्तमान समसामयिक परिवेशलाई दृष्टिगत गरी यस संस्थाको ४४औँ साधारणसभाले रामप्रसाद सापकोटा कमलको नेतृत्वमा रहेको व्यवसायिक र समावेशी समूहले टानको नेतृत्व लिन सक्ने ठहर गरी उक्त समूहलाई सबै मतदाता सदस्यहरूले अत्याधिक मत जाहेर गरी यस संस्थाको जीवनमा महत्वपूर्ण परिवर्तन ल्याउन महत्वपूर्ण निवर्णय लिन सम्बन्ध सबैमा अनुरोध र अपिल गर्दछौँ ।’

उनीहरूले रामप्रसाद सापकोटा कमलको नेतृत्वमा रहेको समूह व्यवसायीमैत्री र समावेशी रहेको बताएका छन् । यो समूहले कोरोना महामारीपछिको पुर्नरुत्थानका लागि टानको जीवनमा महत्वपूर्ण परिवर्तन गर्न सक्ने उनीहरूको ठहर छ । त्यसैगरी, अर्को समूह नीलहरी बास्तोलाको पक्षमा टानका पूर्वअध्यक्ष दीपक महत, नाट्टाका पूर्वअध्यक्ष सीएन पाण्डे, एनएमएका पूर्वअध्यक्ष आङछिरिङ शेर्पासहितको टोली खुलेको छ ।

प्रकाशित मिति: आइतबार, साउन २९, २०७९ ०८:४६