टानलाई व्यवसायीको संस्था बनाउँछौँ: बास्तोला

A+ A A-

पर्वतीय पर्यटन व्यवसायीहरूको छाता सङ्गठन ट्रेकिङ एजेन्सिज् एसोसिएशन अफ नेपाल (टान) को निर्वाचनमा अध्यक्षका प्रत्यासी निलहरि बास्तोलाले व्यवसायीले खोजेजस्तो टान बनाउने प्रतिबद्धता जनाएका छन् ।

आफ्नो समूहको प्यानलसहितको उम्मेदवार परिचयात्मक कार्यक्रममा उनले टान व्यवसायमैत्री नभएको गुनासो बढिरहेको बताए । टानलाई वास्तविक व्यवसायीको संस्थाको रूपमा स्थापित गर्न पहल गर्ने उनको भनाइ छ ।

आफू नेतृत्वमा पुगेको खण्डमा पर्वतीय पर्यटन व्यवसायीहरूको हकहितका लागि काम गर्ने उनले बताए । दुई वर्षको कार्यकालमा टानको कार्यसमितिमा बसेर काम गरेको अनुभव र पर्वतीय पर्यटनमा २७ वर्ष काम गरेको अनुभवलाई ट्रेकिङ व्यवसायीहरूको हितमा लगाउन चाहेको उनको भनाइ छ ।

पूर्वअध्यक्षहरूले छाडेको अनुभव र योजनालाई साकार पार्ने बास्तोलाको प्रतिबद्धता थियो । अहिलेसम्म व्यवसायीहरूले टान खोज्नुपर्ने अवस्थाको अन्त्य गर्दै टानले व्यवसायी खोज्ने वातावरण बनाउनुपर्ने आवश्यकता रहेको उनले बताए ।

‘हामी घोषणापत्र लामो बनाउदैनौँ । पूरा नहुने काम गर्छु भन्दैनौँ, जुन काम गर्न सक्छौँ ती कामको दुई वर्षे क्यालेन्डर बनाएर अघि बढ्छौँ,’ बास्तोलाले भने । व्यवसायीको साँझा संस्था भएकाले टानमा सबैलाई जोडेर लैजाने क्षमता आफूमा रहेको उनको दाबी छ ।

बास्तोलाले आफू नेतृत्वमा पुगे तत्कालै सहायता कक्ष (हेल्प डेस्क) स्थापना गर्ने योजना सुनाए । व्यवसायीलाई सहजीकरणका लागि कर्मचारिसहितको सहायता कक्ष स्थापना गरिने उनको भनाइ छ ।

‘व्यवसायीलाई कार्यालयसम्म पुगेर काम गर्न कनिठाइ हुने गरेको छ । आवश्यक कागजात नपुगेको खण्डमा सहजीकरण गर्नुपर्ने हुनछ, जसले कर्मचारीको मर्कालाई समाधान गर्न सहज हुन्छ,’ उनले भने ।

व्यवसायीहरूबीच विशेषज्ञताको आधारमा सम्बन्धित मुलुकको चाडपर्वलाई जोडर आधुनिक समयअनुसार प्रवर्द्धन गर्ने योजना बनाइएको उनले जानकारी दिए । नेपालमा विभिन्न ४५ भन्दा बढी मुलुकबाट विदेशी पर्यटक भित्रने गरेका छन् ।