टान निर्वाचन, रामप्रसाद सापकोटाको प्यानलमा को-को छन् उम्मेदवार ?

A+ A A-

यही ३० साउनमा ट्रेकिङ एजेन्सिज एशोशिएसन अफ नेपाल (टान) को निर्वाचनमा हुँदैछ । उक्त चुनावमा राम प्रसाद सापकोटा ‘कमल'ले अध्यक्षमा उम्मेदवारी दिएका छन् ।

आफ्नो प्यानलमा समावेशी र व्यवसायिक व्यक्तित्वहरूले उम्मेदवारी दिएको उक्त समूहको दाबी छ । सापकोटा लामो समयदेखि पर्यटन व्यावसाय र समाजसेवामा आबद्ध छन् । उनको नेतृत्वमा रहेको टुकी नेपालले दुर्गम क्षेत्रमा शैक्षिक सुधारको काम गर्दै आएको बताइएको छ ।

सापकोटा पोर्टर, गाइडहुँदै पर्यटन व्यावसायमा उदाएका हुन् । उनको स्वामित्वमा माउन्टेन डिलाइट्स ट्रेक्स एन्ड एक्सपिडिसन, काठमाडौं गार्डेन होम होटल, सूर्यचौर नेचर रिट्रिट, सुर्यचौर प्याराग्लाइडिङ्गलगायत कम्पनी छन् । टानलाई ट्रेकिङ व्यवसायीको हितका लागि सबैभन्दा प्रभावकारी संस्थाको रूपमा उभ्याउने उनको प्रतिबद्धता छ ।

‘हाम्रो समूहले आम ट्रेकिङ व्यवसायीहरूको समस्यालाई समाधानका लागि राज्य र सरकारसँग समन्वयकारी भूमिका खेल्नेछ । टानलाई परिस्कृत, व्यवस्थित, ट्रेकिङ व्यवसायमैत्री बनाउने हाम्रो लक्ष हो,’ अध्यक्षका प्रत्यासी सापकोटाले भने, ‘आम पर्यटन व्यवसायीको साथ र सहयोगबिना यो कार्य असम्भव छ । बेटर टानका लागि हाम्रो उम्मेदवारी हो ।’

सापकोटाको समूहबाट निवर्तमान महासचिव समेत रहेकी सरिता लामाले वरिष्ठ उपाध्यक्षमा उम्मेदवारी दिएकी छिन् । त्यस्तै प्रथम उपाध्यक्षमा देवेन्द्र पोखरेलको उम्मेदवारी परेको छ ।

यो समूहबाट द्वितीय उपाध्यक्षमा दावा लामा तामाङ, महासचिवमा नरध्वज तामाङ (क्षितिज) र सचिवमा हरि कडारियाले उम्मेदवारी दिएका छन् । त्यस्तै कोषाध्यक्षमा प्रमिला देवकोटा पाण्डे र सहकोषाध्यक्षमा रिञ्जि जाङ्गबु शेर्पाले उम्मेदवारी दिएका छन् ।

त्यस्तै सदस्यहरूमा दोर्जे तामाङ, बिनोद वस्ती, राजेश थपलिया, कान्छा गुरुङ, निर्मला सापकोटा, शरण अधिकारीले उम्मेदवारी दिएका छन् । यो समूहबाट दुई जना दलित सदस्यमा कृष्णबहादुर परियार र होमबहादुर विश्वकर्माले उम्मेदवारी दिएका छन् ।

टानको अध्यक्षमा निलहरी वास्तोलाले पनि उम्मेदवारी दिएका छन् । उनी नेपाली कांग्रेसनिकट हुन् । उनलाई नेकपा एमालेको एउटा समूहले समर्थन गरेको छ ।