१२ सयदेखि २५ हजारसम्मका सेक्स टाेयज, मनाेविद् भन्छन्- उपयाेग भए फाइदै छ (भिडियाेसहित)

१२ सयदेखि २५ हजारसम्मका सेक्स टाेयज, मनाेविद् भन्छन्- उपयाेग भए फाइदै छ (भिडियाेसहित)

A+ A A-

जोरपाटीका उमेश तामाङ (नाम परिवर्तन) बिहीबार पुरानो बसपार्कस्थित द कान्तिपुर कण्डम हाउस एण्ड सेक्स टोय सपमा भेटिए । उनले विभिन्न प्रकारका मूल्य र विशेषताका सेक्स टोयबारे बुझे, अनि र्‍याबिट भाइब्रेटर (महिलाका लागि) किने । त्यो भाइब्रेटर उनले आफ्नी श्रीमतीका लागि किनेका रहेछन् ।

‘सेक्स भनेको सबैलाई चाहिने कुरा हो । म महिनौँ काठमाडौंभन्दा बाहिर हुन्छु । किन उनको इच्छा मार्ने ? त्यस कारण किन्दिन आएकाे हुँ । यसअघि पनि मैले डिल्डो किनेर लगिदिएको थिएँ’, उनले भने ।

पछिल्लो समय सेक्स टोय किन्न आउने र आफ्नो पार्टनरलाई किनेर लगिदिनेको सङ्ख्या बढेको सपका सञ्चालक समिर बोहोरा बताउँछन् । '२०६७ सालमा मैले यो पसल सुरु गर्दा ग्राहकहरू कण्डम किन्नसमेत लजाउँथे । अचेल त खुलेरै सेक्स टोय किन्छन्', उनले भने । वैदेशिक रोजगारीमा जानेहरूले धेरैजसाे सेक्स टोय किन्ने गरेको उनले सुनाए ।

'नेपालका धेरै पुरुष वैदेशिक रोजगारीमा हुनुहुन्छ । उहाँहरूले आफ्नो पार्टनरले अरुसँग सम्बन्ध नबनाओस्, आफ्नो घर व्यवहार नबिग्रियोस् भनेर श्रीमती वा प्रेमिकाका लागि सेक्स टोय किनेर लगिदिने वा पसलमै ल्याएर रोजाएर किनिदिने पनि गर्नुहुन्छ’, बोहोराले शिलापत्रसँग भने ।

एकपटक त एउटा पूरै परिवार आएर सेक्स टोय किनेको उनी सम्झिन्छन् । त्यस्तै अनुहार छोपेर आउने र पसलमा पर्दा लगाउनु भन्ने खालका ग्राहकको संख्या पनि उल्लेख्य रहेको उनले बताए । बोहोराका अनुसार सेक्स टोय किशाेरकिशाेरी, पार्टनर नभएका, पार्टनर टाढा भएका, पार्टनरले सन्तुष्टि दिन नसकेकादेखि उमेर ढल्केका महिला/पुरुषले पनि किन्ने गरेका छन् ।

‘ग्राहक त सबै उमेर समूहका हुनुहुन्छ । ४०/४५ वर्षका महिलाको संख्या उल्लेख्य छ । किशाेरीहरूकाे हकमा चाहिँ लिप्स्टिकको साइजमा आउने भएकाले घरमा राख्न सजिलो हुन्छ र र्‍याबिट भाइब्रेटर लैजानुहुन्छ’, उनले भने ।

बोहोराको पसलमा करिब ३ सय प्रकारका सेक्स टोय छन् । यद्यपि, डिल्डो, भेजिना भाइब्रेटिङ र नन् भाइब्रेटिङ, अटो सक्सन डिल्डो, र्‍याबिट भाइब्रेटर, फ्ल्यास लाइट भेजिना, भेजिना मसाजर लोकप्रिय छन् ।

बजारमा पाइने यस्ता लोकप्रिय सेक्स टोयको गुणस्तर र विशेषताअनुसार १२/१५ सयदेखि २२/२५ हजारसम्म मूल्य पर्छ । यस्ता सामान पसलमै आएर किन्ने र घरमा मगाउनेकाे संख्या ५०/५० प्रतिशत रहेकाे उनले जानकारी दिए । उनका अनुसार, उपत्यकाबाहिर पोखरा, बुटवल, चितवनलगायतबाट धेरै अर्डर आउने गरेकाे छ ।

मनाेविद्– राम्राे हाे तर..

यौन जैविक आवश्यकता भएकाले टोय प्रयोग गर्नुलाई नराम्रो मान्न नहुने मनोविद् करुणा कुँवर बताउँछिन् । यौन सम्बन्ध शारीरिक मात्र नभई मानसिक आवश्यकता हाे, त्यसैले आवश्यकता पूरा नहुँदा अन्यत्र सम्बन्धमा जाने, चिडचिडाहट हुने, रिस उठ्ने, दिक्क लाग्ने, जीवन नै व्यर्थ रै'छजस्तो महसुस हुने हुन्छ । सेक्स टोयको प्रयोगले यो समस्या हट्छ भने प्रयोग गर्नु गलत नभएको उनकाे भनाइ छ ।

‘यौन मान्छेकाे मात्र हाेइन, हरेक जीवलाई चाहिने जैविक आवश्यकता हो । यो पूरा नहुँदा नराम्रो सम्बन्ध हुने, आपराधिक क्रियाकलाप हुनेलगायतका घटना हुन्छन्', उनले भनिन्, ‘यो पक्षलाई हेर्दा यौन क्रियाकलाप गर्न पाइने खेलौनाले कसैको आवश्यकता पूरा गरेको छ भने यो नराम्रो होइन ।’

सेक्स टोय प्रयोग गर्दा पनि केही सावधानी अपनाउनुपर्नेमा उनकाे जाेड छ । ‘कसरी प्रयोग गर्ने, कति प्रयोग गर्ने, हाइजेन कसरी मिलाउनेलगायत जानकारीको कमीले इन्फेक्सन हुने, सम्हालेर राख्न नसक्दा घरमा बच्चाहरूले भेट्टाउने, सन्तुष्टि नमिल्ने हुन सक्छ’, कुँवरले भनिन् ।

यसको प्रयोगको तरिका चिकित्सक वा सम्बनन्धित बिक्रेतासँग पर्याप्त लिन र आफ्नो पार्टनरसँग यसबारे नलुकाउन पनि उनी सुझाउँछिन् । ‘सेक्स टोय प्रयोग गर्ने कुरा आफ्नो पार्टनरलाई भन्नुपर्छ । दुवै जना मिलेर सेक्स टोय प्रयोग गरेर यौन क्रियाकलाप गर्दा यौन जीवन झन् राम्रो हुन सक्छ’, उनले भनिन्, ‘आफ्नो पार्टनरलाई ढाँटियो भने शंका बढेर सम्बन्ध झन् बिग्रिन सक्छ ।’

भिडियाेः

प्रकाशित मिति: शनिबार, साउन २८, २०७९ १३:४५