‘प्याराग्लाइडिङ गर्न पोखराजस्तो मिलेको ठाउँ कहीँ छ र ?’

A+ A A-

पोखराको सराङकोट डाँडाबाट दैनिक तीन सय जना जतिले प्याराग्लाइडिङ गर्छन् । कोरोना महामारीले अन्य पर्यटकीय गतिविधि प्याराग्लाइडिङ गर्नेहरूको लाम रहन्थ्यो । न्यून शुल्कमा उड्न पाउँदा धेरैले पहिलोपटक प्याराग्लाइडिङको मज्जा लिए ।

कति पर्यटक प्याराग्लाइडिङ गर्नैलाई पोखरा आउँछन् । अन्तर्राष्ट्रिय विमानस्थल सञ्चालनमा आएसँगै पोखराको सराङकोट डाँडाबाट उड्ने प्याराग्लाइडिङ के हुन्छ अन्योल छ । नेपाल नागरिक उड्डयन प्राधिकारण (क्यान) ले १ जनवरी २०२३ देखि अन्तर्राष्ट्रिय उडान थाल्ने निर्णय गरेको छ ।

अन्तर्राष्ट्रिय विमानस्थलको एअरस्पेसभित्र प्याराग्लाइडिङ, अल्ट्रालाइट उड्छन् । तर, अन्तर्राष्ट्रिय विमानस्थल चल्न थालेदेखि यी गतिविधि कहाँ हुन्छन् पक्का भएको छैन । विमान सधैँ समयमै अवतरण हुन सक्दैनन् । कहिलेकाहीँ आकाशमा फन्को लगाउनुपर्दा फेवातालमाथि अर्थात् प्याराग्लाइडिङ उडान क्षेत्रतिर जान्छन् । यही कारण पोखराको प्याराग्लाइडिङको भविष्य अन्योलमा छ ।

प्याराग्लाइडिङ पोखरामै किन राख्ने, विकल्प के हुन सक्छ ? हामीले पर्यटन व्यवसायी, प्याराग्लाइडिङ व्यवसायी र पाइलटलाई सोधेका छौँः

गोपीबहादुर भट्टराई
अध्यक्ष, पोखरा पर्यटन परिषद्

सराङकोटबाट हुने प्याराग्लाइडिङ संसारकै उत्कृष्ट ५ मा पर्छ । यसले पोखरामात्रै होइन नेपालकै मार्केटिङमा ठूलो भूमिका खेलेको छ । सरकारको मेगा प्रोजेक्ट विमानस्थल २२ अर्बभन्दा बढी लगानीमा बनेको छ ।

विमानस्थल र प्याराग्लाइडिङसँगसँगै लैजानुपर्छ भन्ने हामी पर्यटन व्यवसायीको सोच हो । चिनियाँहरू त एकपटक प्याराग्लाइडिङ गर्‍यो भने नेपालीहरू तीर्थयात्रा गएजस्तो हुन्छ । दिनको दुई-तीन घण्टा व्यवस्थापन गर्न सकियो भने राम्रो हुन्छ । विस्थापित होइन स्थापित गर्न सम्बन्धित निकायलाई माग गरेका छौँ । टेक–अफ, ल्याण्डिङका कुरा छन् तिनलाई समायोजन गर्न सकिन्छ । नियतै विस्थापित गर्ने हो भने केही भन्नु छैन । प्याराग्लाइडिङलाई व्यवस्थापन गरौँ, यो पर्यटनको ठूलो अंग हो ।

एकैपटक पोखरामा जहाजको भिड हुने पनि होइन । सुरुआत हुन कम्तीमा पनि दुई-तीन वर्ष लाग्छ । प्राविधिक हिसाबले मिल्दै मिल्दैन, विस्थापन गर्नैपर्छ भने त्यतिबेला सोचौँला । तर, हाललाई दुई-चार वर्ष सँगसँगै लैजान सके कोभिडबाट ग्रस्त पर्यटन क्षेत्रलाई राहत हुन्थ्यो । भइरहेको उत्पादनलाई एकैपटक हटाउनु हुँदैन । यसले पर्यटन क्षेत्रमा असर गर्छ । नयाँ गन्तव्य थप्दै जाऔँ । पर्यटक भुलाउन सक्ने ठाउँको खोजी गरौँ, भइरहेका ठाउँलाई संरक्षण गरौँ ।

सोभित बानिया

उपाध्यक्ष, नेपाल हवाइ खेलकुद संस्था

प्याराग्लाइडिङले विगत २२ वर्षदेखि पोखराको प्याराग्लाइडिङमा ठूलो योगदान गरेको छ । प्याराग्लाइडिङ व्यवसायमात्रै नभई खेल पनि हो । यो खेलमा संलगन विदेशीहरू पोखरामा लामो समयसम्म बस्ने गर्छन् । त्यसले पर्यटनमा प्रत्यक्ष–अप्रत्यक्ष रूपमा फाइदा गरेको छ ।

चिनियाँ पर्यटकहरू प्याराग्लाइडिङ गर्न भनेर पोखरा आउँछन् । पदकविहीन नेपाललाई पदक दिलाएर प्याराग्लाइडिङ खेलको रूपमा पनि स्थापित भएको छ । अन्तर्राष्ट्रिय विमानस्थलसँगै केही देशमा प्याराग्लाइडिङ सञ्चालन नभएका होइनन् । त्यो हेरेर पनि पोखरामा प्याराग्लाइडिङ राखिराख्न सम्भव छ ।

सुस्मिता सुनुवार
(पाइलट)

प्याराग्लाइडिङ साहसिकसँगै मनोरञ्जनात्मक गतिविधि हो । र, पोखराजस्तो मिलेको ठाउँ कहीँ छ भन्ने लाग्दैन । यहाँ ताल, हिमाल, हरिया डाँडा सबै देखिन्छ । पर्यटक प्याराग्लाइडिङ गर्न पोखरा नै भनेर आउने हो ।

पूर्वदेखि पश्चिमसम्मका डाँडामा प्याराग्लाइडिङ गर्न मिल्छ । तर, त्यहाँ पोखराको जस्तो होला र ? यहाँ हट्यो भने पर्यटक अरू ठाउँमा उड्न आउँदैनन् । छुट्टी भएपछि पोखरा आउने पर्यटक धेरै छन् । प्याराग्लाइडिङ पोखराको गहना हो त्यसैले यहाँबाट हटाउनु हुँदैन ।

अनिल केसी
प्राविधिक उपाध्यक्ष, नेपाल हवाइ खेलकुद संस्था

विगत १२ वर्षदेखि म प्याराग्लाइडिङको प्राविधिक पाटोमा काम गरिराखेको छु । पोखरामा अन्तर्राष्ट्रिय विमानस्थलसँगै प्याराग्लाइडिङ सम्भव छ/छैन भनेर नेपाल नागरिक उड्ययन प्राधिकरण (क्यान) का अधिकारी नेतृत्वको टोलीले अध्ययन गरेको थियो । अन्तर्राष्ट्रिय विमानस्थलसँगै प्याराग्लाइडिङ सञ्चालन गर्न सकिन्छ भन्ने विकल्प त्यो प्रतिवेदनमा पनि छ ।

जुन दिन पोखरामा अन्तर्राष्ट्रिय विमान चल्छ, त्यो पोखराकै लागि गौरवको दिन हुनेछ । त्यसले पर्यटनलाई पनि उकास्छ । विमानस्थल चलाउँदा प्याराग्लाइडिङ पनि निश्चित समयलाई व्यवस्थापन भएर गयो भने पोखरामा सुनमा सुगन्ध थपेजस्तो हुन्छ । प्याराग्लाइडिङलाई निश्चित समय छुट्याउने र त्यो अवधि जहाज उडान नगर्ने व्यवस्थापन गर्न सकिन्छ ।

पोखराको प्याराग्लाइडिङको सुरुआत भएको सोलो (एकल) प्याराग्लाइडिङबाट हो । त्यसपछि बल्ल हामी टेण्डम उडान (दुई जना) मा पुगेका हौँ । विदेशी पाइलट आएर उडाएर नेपालीहरू पनि सिकेर दक्ष बन्नुभएको छ । यत्तिका वर्षसम्म आउँदा प्रतियोगिता पनि गर्‍यौँ जसले अन्तर्राष्ट्रियस्तरमा हामीलाई अझ चिनायो ।

टेण्डमलाई निश्चित समय तोकेर उडान गर्ने, सोलो उडान गर्न निश्चित ठाउँ छुट्टाउने र हवाई रूटमा असर नपर्ने गरी सर्कल बनाउन सकियो भने राम्रो हुन्छ । सराङकोटबाट व्यावसायिकसँगै विदेशी जो एक्लै उड्न चाहन्छन् उनीहरूलाई छुट्टै व्यवस्थापन गर्न आवश्यक छ ।

प्रकाशित मिति: शुक्रबार, साउन २७, २०७९ १७:०५