जहाँ हात्ती धपाउन कण्डममा खुर्सानी हालेर फालिन्छ

तान्जेनियाका ताराङ्गिर राष्ट्रिय निकुञ्जकाे हात्ती । तस्वीर- चुङ्बा शेर्पा ।

A+ A A-

पूर्वी अफ्रिकी देश तान्जानिया कस्तो होला ? त्यो देश केका लागि प्रसिद्ध छ ? संसारभरबाट हरेक वर्ष २० लाख मान्छे तान्जानिया घुम्न किन जान्छन् ? आउनुस्, यो अफ्रिकी देशबारे केही कुरा जानौँ ।

तान्जानियाकाे वरिपरि युगाण्डा, केन्या, बुरुण्डी, रुवाण्डा, कंगो लोकतान्त्रिक गणतन्त्र, मोजाम्बिक, जाम्बिया र मलावीजस्ता मुलुक छन् । यो देश वन्यजीवन र प्राचीन् जनजातिलाई लिएर प्रख्यात छ । यसलाई अफ्रिकाको गेटवे पनि भन्ने गरिन्छ ।

प्राकृतिक रूपमा निकै सुन्दर मानिन्छ तान्जानिया । लोपोन्मुख र थरीथरीका जीवजन्तु हेर्न संसारभरबाट २० लाख पर्यटकहरू तान्जानिया पुग्ने गरेका छन् । तान्जानियामा जमिनको २५ प्रतिशतभन्दा बढी भाग जङ्गल वा राष्ट्रिय निकुञ्ज छ, जुन संसारकै बढी हो । तान्जानियाको सबैभन्दा चर्चित सेरेनगेटी राष्ट्रिय निकुञ्ज हो, जहाँ लाखौँ जङ्गली जनावर छन् । तान्जानियामा पाइने मपिङ्गो नामको रुखको काठ संसारकै महँगो मानिन्छ । यसको काठ शानदार फर्निचर र गितारमा प्रयोग गर्ने गरिएको छ । मपिङ्गोको रुखलाई अफ्रिकाको संगीतको रुख पनि भन्ने गरिन्छ । किनकि प्राचीन् समयदेखि नै वाद्यवादनका साधन बनाउन यही रुखको काठ प्रयोग गरिँदै आएको छ ।

तान्जानियाको एक रोचक कुरा त के छ भने त्यहाँ बाली खान आउने हात्तीलाई धपाउन तान्जानियनहरूले कण्डममा खुर्सानीको धुलो राखेर हात्तीतिर फालिदिन्छन् । यो तरिकाले काम पनि गर्ने गरेको छ । माउण्ट किलिमञ्जारो हिमाल तान्जानियामै छ । यो समुद्री तटबाट १९ हजार ३ सय ४२ फिट उचाइमा छ । यसलाई अफ्रिकाको सर्वोच्च शिखर मानिन्छ ।

साढे ६ कराेड जनसंख्यावाला यो देशको राजधानी दोदोमा हो । सबैभन्दा ठूलो शहर दार अस सलामले अफ्रिकी इतिहासमा कैयाैँ महान् मानिसलाई जन्म दिएको छ । कुल जनसंख्यामध्ये करिब ४० प्रतिशत अत्यधिक गरिब छन् । ५० प्रतिशतभन्दा ज्यादा मान्छे १.६० डलरमै प्रतिदिन गुजार्छन् । शहरीकरणको न्यून गति तान्जानियामा गरिबी कायम रहनुको एक कारण मानिन्छ । ८० प्रतिशतभन्दा बढी जनसंख्या आज पनि ग्रामीण क्षेत्रमै बस्छ, जसमा बिजुली, स्वास्थ्य, शिक्षाजस्ता मूलभूत सुविधाहरू पर्याप्त छैनन् । यहाँ मुस्लिम र इसाई धर्मका मानिसहरू बढी छन् ।

तान्जानियाबाट सबैभन्दा बढी निर्यात हुने वस्तु ल्वाङ हो । ल्वाङको सबैभन्दा ठूलो उत्पादक यही देश हो । पर्यटन तान्जानियाको अर्थव्यवस्थाको महत्त्वपूर्ण भागमध्ये एक हो । २० लाखभन्दा बढी मानिसले हरेक वर्ष तान्जानियाको यात्रा गर्ने गरेका छन् । यो देश विस्तारै औद्योगीकरणमा गइरहेको छ ।

तान्जानियाले केही वर्षयता नगदेबालीका साथसाथै जुत्ता र चुरोट पनि निर्यात गर्न थालेको छ । तान्जानियामा संसारकै सबैभन्दा ठूलो ज्वालामुखीको गड्डा छ । यो १९ किलोमिटरमा फैलिएको छ भने ६ सय मिटर गहिरो छ । तान्जानियाको झण्डामा दैनिक जीवनका चार तत्त्व समेटिएका छन् । हरियो रङले प्राकृतिक सुन्दरता र कृषिलाई दर्शाउँछ । पहेँलो रङले देशको खनिज, कालो रङले त्यहाँका स्वाहिल मातृभाषी र नीलो रङले इन्डियन ओसियन र देशका नदी तथा हिमालहरूलाई जनाउँछ ।

प्रकाशित मिति: शनिबार, साउन २८, २०७९ ०७:३१