वाइल्डलाइफ फोटोग्राफर हुन के-के गुण चाहिन्छ ?

तस्वीरः चुङ्बा शेर्पा

फोटोग्राफीका विभिन्न विधामध्ये एक हो वाइल्डलाइफ (वन्यजीवन) फोटोग्राफी । यो काम निकै चुनौती र जोखिमपूर्ण मानिन्छ । यसैमा रमाउनेहरूचाहिँ 'जोखिम'को ठाउँमा 'रोमान्स' शब्द राख्न मन पराउँछन् । वाइल्डलाइफ फाेटाेग्राफीमा जंगल र खुला प्रकृतिमा रहने जीवजन्तुको जीवनका विविध पक्षलाई फोटोको माध्यमबाट दर्शाइन्छ । वाइल्डलाइफ फोटोग्राफी साेखका साथसाथै पेसाकै रूपमा स्थापित भएकाे पाइन्छ । नाम र दाम दुवैका लागि समेत धेरैले वाइल्डलाइफ फोटोग्राफी गरेको पाइन्छ ।

वाइल्डलाइफ फोटोग्राफर हुन कस्तो गुण चाहिन्छ ?

वाइल्डलाइफ फाेटाेग्राफर चुङ्बा शेर्पाका अनुसार, तपाईं वाइल्डलाइफ फाेटाेग्राफी गर्न चाहनुहुन्छ भने तपाईंमा फोटोग्राफीसम्बन्धी राम्रो सीप हुनुपर्छ । ताकि तपाईंले एक फर्फेक्ट क्लिक गर्न सक्नुहाेस् । यसबाहेक तपाईंभित्र धैर्यता चाहिन्छ । कहिलेकाहीँ उत्कृष्ट फोटोका लागि तपाईंले घण्टौँ प्रतीक्षा पनि गर्नुपर्ने हुन्छ ।

तपाईं प्रकृति र जनावरलाई प्रेम गर्नुहुन्न भने वाइल्डलाइफ फाेटाेग्राफी नचुन्दा नै वेश हुन्छ । एक वाइल्डलाइफ फोटोग्राफरले निकै यात्रा गर्नुपर्छ । कैयौँ दिनसम्म घरबाट टाढा बस्नुपर्ने हुन सक्छ । शारीरिक वा मानसिक रूपले तयार हुनुपर्छ । नयाँ इक्विपमेन्टप्रति चासो र ज्ञान राख्ने हुनुपर्छ । सुरक्षा र कस्टमबारे चनाखो हुुनुपर्छ । चुङ्बा शेर्पासहित ओम यादव, विशाल गौतम, सागर गिरी, दशरथ श्रेष्ठ विजुक्छे, सुदीप केसी, उत्सवजंग थापा, पुरुषोत्तम पोखरेल, अगस्टसिंह लामा पनि नेपालका नाम चलेका वाइल्डलाइफ फोटोग्राफर हुन् ।

प्रकाशित मिति: शनिबार, साउन २८, २०७९ ०७:४४