अन्नपूर्ण हिमालको आधारशिविरमा सरकारले विदेशी पर्यटनमन्त्रीहरूको अन्तर्राष्ट्रिय सम्मेलन गर्ने

अन्नपूर्ण हिमालको आधारशिविरमा सरकारले विदेशी पर्यटनमन्त्रीहरूको अन्तर्राष्ट्रिय सम्मेलन गर्ने

A+ A A-

संस्कृति, पर्यटन तथा नागरिक उड्डयन मन्त्रालयले विभिन्न देशका पर्यटन मन्त्रीहरूको अन्तर्राष्ट्रिय सम्मेलन आयोजना गर्ने भएको छ ।

कोभिड महामारीबाट थला परेको नेपालको पर्यटन क्षेत्रको पुनरुत्थानका लागि मन्त्रालयले अन्तर्राष्ट्रिय सम्मेलन आयोजना गर्न लागेको हो । एकीकृत समाजवादीका नेता जीवनराम श्रेष्ठ पर्यटन मन्त्री भएपछि उक्त कार्ययोजना बनेको हो । मन्त्रलायले तयार गरेको कार्ययोजना अनुसार दक्षिण एसिया र प्रशान्त क्षेत्रका पर्यटन मन्त्रीहरूलाई अन्तर्राष्ट्रिय सम्मेलनका लागि बोलाउन लागिएको हो । उक्त अन्तर्राष्ट्रिय सम्मेलन अन्नपूर्ण आधारशिविरमा आयोजना गर्ने तयारी भएको छ ।

नेपाल पर्यटन बोर्ड र विभिन्न निजीक्षेत्रका पर्यटन व्यवसायीहरूको समेत सहयोगमा सम्मेलन आयोजना गर्ने तयारी भएको हो । मन्त्रालयले ४ महिनाभित्रै अन्तर्राष्ट्रिय सम्मेलन आयोजना गर्ने तयारी गरिरहेको छ । सहसचिव तथा पर्यटन विभागका सहसचिव होमप्रसाद लुइँटेलका अनुसार दक्षिण एसिया र प्रशान्त क्षेत्रका पर्यटनमन्त्रीहरूको अन्तर्राष्ट्रिय सम्मेलन कोभिड महामारीपछि नेपालको पर्यटन पुनरुत्थानका लागि तयार गरिएको कार्ययोजना हो ।

शिलापत्रसँग लुइँटेलले भने, ‘पर्यटनमन्त्री जीवनराम श्रेष्ठ भएपछि बनेको कार्ययोजना हो । र, मन्त्रीज्यूले कात्तिकभन्दा अघि नै यो सम्मेलन गरौँ भन्ने चाहना राख्नुभएको छ ।’ भदौ, असोज र कात्तिक नेपालको पर्यटन क्षेत्रका लागि निकै राम्रो सिजनका रूपमा लिइन्छ । त्यसैले त्यही अनुकूल समय बनाएर पर्यटन मन्त्रीहरूको अन्तर्राष्ट्रिय सम्मेलन आयोजना गर्न लागिएको पनि बताइन्छ ।

नेपालका हिमालहरू आरोहरण गरिएका हिमालमध्ये अन्नपूर्ण सबैभन्दा पहिला आरोहण भएका कारण त्यही ऐतिहासिक थलोका आधार शिविरमा पर्यटन मन्त्रीहरूको अन्तर्राष्ट्रिय सम्मेलन आयोजना गर्न लागिएको पनि बताइएको छ ।