पानी नपर्दै मोटरसाइकलमा रेनकोट ओढेर सबइन्जिनियरको चोरी धन्दा

A+ A A-

प्रहरी वृत्त बानेश्वरको हिरासत कक्षभित्र करिब एक सयभन्दा बढी थुनुवा छन् । प्रहरीका अनुसार त्यसरी थुनामा पर्नेहरूमध्ये अधिकांश चोरीका आरोपित छन् । अधिकांश पटके चोर रहेकाे प्रहरीको दाबी छ ।

तर, उनीहरूमध्ये दुई जना चोर भने सामान्य मानिसले चोर हुन् भनेर पत्याउन गाह्रो पर्ने युवा छन् । ती हुन्– दोलखाका २० वर्षीय निरज केसी र केदार न्यौपाने । प्रहरीका अनुसार निरज पेसाले सबइन्जिनियर हुन् । उनीहरू दुवैले पछिल्लो समय काठमाडौंको विभिन्न ठाउँबाट लुटपाट गर्दै आएको खुलेपछि प्रहरीले पक्रेकाे हाे ।

बानेश्वर प्रहरीका अनुसार उनीहरू माेटरसाइकल प्रयोग गरेर लुटपाट गर्दै आएको खुलेको हो । प्रहरीका अनुसार केसी र न्यौपानेले केटीएम कम्पनीको केटीएम आरसी मोटरसाइकल प्रयोग गरेर लुटपाट गर्ने गरेका थिए ।

केसीको नाममा रहेकाे बा ६६ प २९६२ नम्बरको आरसी मोटरसाइकल प्रयोग गरेर उनीहरूले लुटपाट गर्ने गरेको खुलेको हो । प्रहरीका अनुसार विभिन्न स्थानबाट उनीहरूले महिलाले लगाएका सिक्री र बाेकेका मोबाइल फोन लुट्ने गरेका थिए ।

अनुसन्धानमा संलग्न प्रहरीका अनुसार उनीहरूले नम्बर प्लेट छोप्न पानी नपर्दा पनि रेनकाेट ओढेर मोटरसाइकल चलाउने गरेका थिए । यसबाहेक उनीहरू दुवैले हेलमेट प्रयोग गर्ने गरेका थिए । महिलाहरूले घाँटीमा लगाएकाे सिक्री तथा ब्याग लुटेर उनीहरू भाग्ने गरेका थिए ।

पछिल्लोपटक उनीहरूले कोटेश्वरकी एक महिलाकाे सुनकाे सिक्री र झोला लुटेको आरोपमा पक्राउ परेका हुन् । उनीहरूले साँझ ८ बजेपछि लुटपाट गर्ने गरेको खुलेको छ ।

प्रकाशित मिति: सोमबार, साउन २३, २०७९ १३:३२