कानुन मन्त्रालयको राय आएपछि मात्रै इम्बोस्ड नम्बर प्लेटलाई नेपालीमा लेख्ने/नलेख्ने टुुङ्गो लाग्ने

कानुन मन्त्रालयको राय आएपछि मात्रै इम्बोस्ड नम्बर प्लेटलाई नेपालीमा लेख्ने/नलेख्ने टुुङ्गो लाग्ने

A+ A A-

कानुन, न्याय तथा संसदीय मामिला मन्त्रालयको राय आएपछि मात्रै इम्बोस्ड नम्बर प्लेटलाई नेपालीमा लेख्ने/नलेख्ने टुङ्गो लाग्ने भएको छ ।

भौतिक पूर्वाधार तथा यातायात मन्त्रालयले इम्बोस्ड नम्बर प्लेटलाई नेपालीमा छाप्न कानुन संशोधन गर्न मिल्ने/नमिल्ने भनेर कानुन मन्त्रालयसँग रायका लागि पत्र पठाएको र राय आएपछि मात्र अरु प्रक्रिया सुरु हुने मन्त्रालयका प्रवक्ता शिवप्रसाद नेपालले जानकारी दिए ।

‘यत्तिकै भन्न सकिँदैन । पहिला कानुन मन्त्रालयको राय आओस्, त्यसपछि बल्ल अरु प्रक्रिया अघि बढाउन सकिन्छ,’ उनले भने ।

राय सकारात्मक आए पनि नम्बरप्लेट नेपालीमा राख्ने केही उल्झन बाँकी नै रहेको उनले बताए ।

‘कानुन संशोधन भए पनि त्यसपछि ठेक्का पुनरावलोकन गर्नुपर्ला, पुनरावलोकनका लागि ठेकेदार कम्पनीसँग छलफल गर्नुपर्ला । देवनागरीमा राख्दा लागत बढ्यो भने के गर्ने ? अहिलेसम्म लागिसकेका करिब ३० हजार नम्बर प्लेटलाई के गर्ने ? पूरै देवनागरीमा राख्ने कि सिम्बोलका लागि केही शब्द मात्र प्रयोग गर्ने ? ठेक्काको म्याद सकिन लागेको छ । समयको कुरा पनि आऊला । यी सबै कुरा सल्टाउनुपर्छ,’ नेपालले भने ।

सरोकारवाला सबैसँग छलफल र राय नलिई हतारमा ठेक्का गरेको परिणाम अहिले भोग्नुपरेकाले अब काम गर्दा भने माथिका समस्या सुल्झिएपछि मात्र काम अघि बढाउने उनले स्पष्ट पारे ।

इम्बोस्ड नम्बरप्लेटका सन्दर्भमा यसअघि पनि विभिन्न विवाद उठेका थिए । सरकारी कामकाजको भाषा देवनागरी लिपि भएकाले नम्बरप्लेटमा नेपाली अक्षर हुनुपर्ने भन्दै अधिवक्ता भरतकुमार बस्नेतले फागुन २०७४ मा रिट दर्ता गराएका थिए ।

रिट परेपछि अदालतले अन्तरिम आदेश जारी गर्दै नम्बरप्लेट जडान कार्य रोकेको थियो । उक्त मुद्दामा रिट खारेज गरेपछि पुनः अघि बढाउन बाटो खुल्यो ।

१० साउन ०७७ मा तत्कालीन भौतिक पूर्वाधार तथा यातायातमन्त्री वसन्तकुमार नेम्वाङ र बागमती प्रदेशका भौतिक पूर्वाधारमन्त्री रामेश्वर फुयाँलले इम्बोस्ड नम्बर प्लेट वितरण सुरुवात गरेका थिए ।

सुरुवाती चरणमा सरकारी सवारीसाधनबाट जडान सुरु गरिएको इम्बोस्ड नम्बर प्लेट पछि निजीलाई ऐच्छिक हुँदै हाल किनबेच भई नामसारी गर्न आएका सवारीसाधन र नवीकरण गर्न आएका सवारीसाधनमा अनिवार्य इम्बोस्ड नम्बर प्लेट जडान गर्नुपर्ने व्यवस्था छ ।

सर्वोच्चले विद्यमान प्रचलित कानुनबमोजिम फैसला गरेको भए पनि विवाद सुरु भएपछि मन्त्रालयले कानुन संशोधन गरेरै देवनागरी लिपि प्रयोग गर्न लागेको हो ।

त्यस्तै, नेपाल बार एसोसिएसनले इम्बोस्ड नम्बर प्लेटको सम्झौता नै संविधानअनुसार नभएको बताएको छ ।

इम्बोस्ड नम्बर प्लेट जडान भएको ६ वर्षपछि एसोसिएसनले गत बिहीबार प्रेस विज्ञप्ति जारी गर्दै नेपालको संविधानको धारा ७ ले देवनागरी लिपिमा लेखिने भाषा नेपालको सरकारी भाषा हुने व्यवस्था रहेको जनाएको हो । इम्बोस्ड नम्बर प्लेटमा अंग्रेजी भाषा प्रयोग हुनु गैरसंवैधानिक भएको एसोसिएसनले स्पष्ट पारेको छ ।

कति लाग्छ शुल्क ?

यातायात व्यवस्था विभागका अनुसार दुईपाङ्ग्रे सवारीसाधनमा इम्बोस्ड नम्बर प्लेट जडान गर्न २ हजार ५ सय रुपैयाँ शुल्क लाग्नेछ भने तीनपाङ्ग्रे सवारीमा २ हजार ९ सय रुपैयाँ शुल्क तिर्नुपर्नेछ ।

त्यस्तै, मझौला सवारी तथा सानो (चारपाङ्ग्रे सवारी) मा ३ हजार २ सय रुपैयाँ र ठूला सवारीमा इम्बोस्ड नम्बर प्लेट जडान गर्न ३ हजार ६ सय रुपैयाँ शुल्क लाग्छ ।

प्रकाशित मिति: आइतबार, साउन २२, २०७९ १८:३९