चार वर्ष विरोधमा उत्रिएको नेप्से आफैँ भन्न थाल्यो– नयाँ स्टक एक्सचेञ्ज ल्याउनुपर्छ

चार वर्ष विरोधमा उत्रिएको नेप्से आफैँ भन्न थाल्यो– नयाँ स्टक एक्सचेञ्ज ल्याउनुपर्छ

A+ A A-

नयाँ स्टक एक्सचेन्ज स्थापना गर्नुपर्ने नेपाल धितोपत्र बोर्ड (सेबोन) को निर्णयविरुद्ध खुलेरै प्रस्तुत भएको नेपाल स्टक एक्सचेन्जले चार वर्षपछि आफ्नो धारणा परिवर्तन गरेको छ । नेपाल स्टक एक्सचेन्जका प्रबन्धक निरञ्जन फुयाँलले अब नेप्सेले समेत पुँजीबजार विस्तारका लागि प्रतिस्पर्धी नयाँ एक्सचेन्ज चाहेको धारणा राखेका हुन् ।

फुयाँलले नयाँ स्टक एक्सचेन्जको आवश्यकता खट्‌केको भन्दै नेप्से यसका लागि तयार रहेको अभिव्यक्ति दिएका हुन् । जबकि धितोपत्र बोर्डले पहिलोपटक आर्थिक वर्ष २०७५-७६ मा नयाँ स्टक एक्सचेन्ज स्थापना गर्ने नीति तथा कार्यक्रममा घोषणा गर्दा नेप्सेका पदाधिकारीहरूले खुुलेरै विरोध गरेका थिए ।

तत्कालीन अर्थमन्त्री कृष्णबहादुुर महरालाई कर्मचारीले भेटेर नेप्सेलाई धराशायी बनाउन अर्को स्टक एक्सचेन्जको अवधारणा ल्याएकोमा असन्तुुष्टि पोखेका थिए । त्यसयता यही कुरालाई लिएर बोर्ड र नेप्सेबीचको खटपट पनि सुरु भएको थियो । यद्यपि झण्डै चार वर्ष बितेपछि भने नेप्से आफैँले आफ्नो प्रतिस्पधी माग गर्न थालेको छ ।

प्रबन्धक फुुयाँल भन्छन्, ‘हामीले अबको पुँजीबजार विस्तार गर्न अर्को स्टक एक्सचेन्ज ल्याउनुुपर्ने योजनालाई तदारुकताका साथ काम अगाडि बढाउनुुपर्ने देखिन्छ ।’ उनले सार्वजनिक कार्यक्रममै नेप्सेको तर्फबाट प्रस्तुति दिँदै पाँचवर्षे योजनाभित्र नयाँ स्टक एक्सचेन्जको कुरा पनि उल्लेख गरेका छन् ।

दुुई निकायबीचको मतभेदका कारण अघि बढ्न नसकेको नयाँ स्टक एक्सचेन्जको कार्य अब भने अगाडि बढ्ने संकेत देखिएको छ । तर बोर्डका कर्मचारी अझै भौतिक रूपमा काम गर्न आफूहरूलाई निर्देशन नआइसकेको बताउँछन् । सेबोनकी सूचना अधिकारी दीपा दाहाल भन्छिन्, ‘अहिलेसम्म यो विषयमा हामीसम्म कुुनै कुरा आएको छैन ।’

नयाँ स्टक एक्सचेन्जको अनुुमति दिने कुरा लामो समयदेखि विवादित बन्दै आए पनि अझै ठोस निष्कर्षमा भने पुुगेको छैन । सेबोनले स्टक एक्सचेन्जलाई प्रतिस्पर्धी बनाउनकै लागि योजना अघि सारे पनि नेप्सेका कर्मचारीहरू भने हालसालको नेप्सेलाई धराशायी बनाउन नयाँ स्टक एक्सचेन्ज ल्याउन लागेको भन्दै विरोध गर्दै आएका थिए । पूर्ण सरकारी स्वामित्वमा रहेको नेप्सेलाई निजीकरण गरेर मात्र नयाँ स्टक एक्सचेन्ज ल्याउनुपर्ने नेप्सेको माग थियो । तर, चार वर्ष बितिसक्दा नेप्सेमाथि रहेको सरकारी स्वामित्व घटेको छैन ।

नेप्सेमा अर्थ मन्त्रालयका नाममा अझै पनि ५८ प्रतिशत अर्थात् २९ लाख कित्ता शेयर छ । शेयर स्वामित्व घटाएर १० प्रतिशतमा ल्याई नेप्सेलाई निजीकरण गर्नुपर्ने माग उठे पनि कार्यान्वयन नहुँदै नयाँ स्टक एक्सचेन्जका लागि नेप्सेले लचकता देखाएको छ । नेप्सेका प्रवक्ता मुराहरि पराजुुली नेप्सेको पुनर्संरचना गरेपछि मात्रै नयाँ स्टक एक्सचेन्ज खोल्न दिनुपर्ने बताउँछन् ।

उनी भन्छन्, 'नेप्सेलाई निजीकरण गर्न दिँदा मात्र नयाँ स्टक एक्सचेन्ज ल्याउनुु उपयुक्त हुन्छ । सरकारी स्वामित्वमै नेप्सेलाई राखी नयाँ स्टक एक्सचेन्ज खोल्दा नेप्से धराशायी हुने भनेरै हामीले विरोध गरेका हौँ ।’

उनी अर्थ मन्त्रालयले आफ्नो स्वामित्व घटाउन कुनै तदारुकता नदेखाउँदा यो विषय यसै सेलाउँदै गएको बताउँछन् ।

प्रकाशित मिति: आइतबार, साउन २२, २०७९ १७:१७