सिन्धुपाल्चोकमा बहुप्राविधिक शिक्षालय

A+ A A-

प्रदेश ३ सरकारको शिक्षा क्षेत्रमा गौरवको योजनाका रुपमा अघि सारिएको बहुप्राविधिक महाविद्यालय सिन्धुपाल्चोकमा स्थापना भएको छ ।

सामाजिक विकास मन्त्रालयको अगुवाइमा स्थापना भएको बहुप्राविधिक महाविद्यालय प्रदेश ३ सरकारको गौरवको योजना हो । सदरमुकाम चौतारामा स्थापना भएको बहुप्राविधिक महाविद्यालयमा यही शैक्षिक सत्रदेखि पठनपाठनसमेत सुरु भएकाे छ ।

प्रदेश ३ सरकारले गत आर्थिक वर्षमा प्रदेश ३ भित्रै दुई वटा महाविद्यालय स्थापना गर्न बजेटसमेत विनियोजन गरेको थियो । प्राविधक शिक्षा तथा व्यावसायिक तालिम परिषद् (सीटीईभीटी)सँग समन्वय गरेर प्राविधिक शिक्षालय सञ्चालन हुन लागेको प्रदेश ३ का सामाजिक विकासमन्त्री युवराज दुलालले जानकारी दिए ।

बहुप्राविधिक महाविद्यालय स्थापना गर्न खोजिए पनि सीटीईभीटीसँग समन्वय हुने भएपछि तत्कालका लागि बहुप्राविधिक शिक्षालयको नामबाट यो वर्ष दुई संकायमा पठनपाठन सुरु हुने र भर्ना प्रक्रियासमेत अघि बढेको मन्त्री दुलालले जानकारी दिए ।

१० वर्षै सशस्त्र विद्राेहमा मारिएका सिन्धुपाल्चोक कुभिन्डेका कमल शर्मा (दिनेश) र गोविन्द शर्मा (रामजी)को नामबाट शिक्षालयको नाम राखिएको छ । यो वर्ष सिभिल इन्जिनियरिङ र सूचना प्रविधि आईटीको कक्षा सञ्चालन गर्न लागिएको मन्त्री दुलालले जानकारी दिए ।

क्रमशः २०८० भित्र कृषि विज्ञान, पशु विज्ञान, हाइड्रोलोजीलगायतका पाँच विषयकाे पठनपाठनका लागि पूर्वाधारलगायतका अन्य काम सुरु भएको सामाजिक विकास मन्त्रालयले जानकारी दिएको छ ।

सीटीईभीटीसँग समन्वयमा कक्षा सञ्चालन गर्दा डिप्लोमा तहको मात्रै अध्ययन हुने भए पनि विस्तारै मास्टर्ससम्मको अध्ययन यही शिक्षालयमा हुने व्यवस्थाका लागि पनि प्रक्रिया सुरु भएको छ, सामाजिक विकास मन्त्री दुलालले भने ।

प्राविधिक विषयमा मास्टर्ससम्मको अध्ययन काठमाडौं विश्वविद्यालयले मात्रै सुरु गरेकाले केयूसँग नै समन्वय गरेर जिल्लामा स्थापना गरिएको बहुप्राविधिक शिक्षालयमा मास्टर्ससम्मकै अध्ययन गर्न सकिने मन्त्री दुलालले दाबी गरे ।

प्राविधिक क्षेत्रको पाँचै विषय चौतारामै अध्ययन गर्न पाइने भएपछि विशेष गरी काभ्रे, दोलखा, रामेछापलगायत जिल्लाका सयौं युवालाई सहज हुने मन्त्री दुलालको विश्वास छ । यो वर्ष दुई विषयमा गरी ९६ जना विद्यार्थीलाई भर्ना गराइने शिक्षालयले जानकारी दिएको छ ।

प्रदेश ३ भित्र हेटौंडा र चौतारामा महाविद्यालय स्थापना गर्ने विषय गत वर्षको नीति तथा कार्यक्रममै समेटिएको थियो । हेटौंडामा भारतीय दूतावासले महाविद्यालयको भवन निर्माण गरिदिने भएपछि चौतारामा भने सबै प्रदेश सरकारकै लगानीमा निर्माण हुने सामजिक विकास मन्त्रीका स्वकीय सचिव सीपी दुलालले जानकारी दिए ।

१७ करोड लागत चार वर्षमा सबै काम सकिने

बहुप्राविधिक शिक्षालय स्थापनाका लागि प्रदेश ३ सरकारले १७ करोड विनियोजन गरेको छ । यही वर्ष टेन्डर प्रक्रियामा गएर आवश्यक पूर्वाधारको काम सुरु हुने मन्त्री दुलालले जानकारी दिए । चौतारा साँगाचोकगढी नगरपालिका वडा नम्बर ५ मा रहेको छाप आहलडाँडा सामुदायिक वन क्षेत्रमा रहेको झन्डै ९५ रोपनी जग्गामा शिक्षालयको भवन निर्माण हुनेछ ।

दुई वर्ष चौतारा बहुमुखी क्याम्पसको भवनमा पठनपाठन हुने र त्यसका लागि क्याम्पससँग सम्झौता भएको क्याम्पसका अध्यक्ष कृष्णराज श्रेष्ठले जानकारी दिए । निर्माण हुने शिक्षालयको भवनमा छात्रावास, ल्याबलगायतका सबै सुविधा उपलब्ध हुनेछ । भवन निर्माण गर्दा बजेट अपुग भएमा प्रदेश सरकारले आवश्यक बजेटको सुनिश्चितता गरिने सामाजिक विकासमन्त्री दुलालले जानकारी दिए ।

प्रदेश ३ सरकारले बहुप्राविधिक शिक्षालयको भौतिक पूर्वाधारलगायत अन्य विषयमा अध्ययन गर्न पूर्वसासंद सुभाष कर्माचार्यको संयोजकत्वमा एउटा टिम गठन गरेर अध्ययनसमेत गरेको थियो । कर्माचार्यको टिमको प्रतिवेदनपछि आहलडाँडा क्षेत्रमा नै महाविद्यालय स्थापनाको प्रक्रिया सुरु गरिएको हो ।

बहुप्राविधिक शिक्षालय सञ्चालनका लागि प्रमुख जिल्ला अधिकारी सम्बन्धित वडाका वडा अध्यक्ष, शिक्षाविद्लगायतको एउटा समितिले सबै व्यवस्थापन गर्नेछ ।

योद्धाको नाममा प्राविधिक शिक्षालय

सिन्धुपाल्चोक सदरमुकाम चौतारामा स्थापना भएको बहुप्राविधिक शिक्षालय १० वर्षे सशस्त्र विद्रोहमा मारिएका कमल शर्मा (दिनेश) र गोविन्द शर्मा(रामजी)को नामबाट स्थापना गरिएको छ ।

२०६१ सालमा सिराहाको बन्दीपुरमा भएको भिडन्तमा दुवैको निधन भएको थियो । सामाजिक विकासमन्त्री दुलालसमेत त्यो भिडन्तमा सहभागी थिए । दिनेश त्यतिबेला बटालियन कमान्डर थिए भने रामजी कमिसार थिए । १० वर्षै युद्धमा सिन्धुपाल्चोकबाट माओवादीमा सहभागी भएकामध्ये सबैभन्दा उपल्लो पदमा पुगेर मृत्यु हुनेमा ती दुई जना थिए ।

प्रकाशित मिति: शुक्रबार, साउन १०, २०७६ २३:१३