उन्नति र सहकार्य मर्जरमा, पुसभित्र एकीकृत कारोबार

A+ A A-

उन्नति माइक्रोफाइनान्स वित्तीय संस्था र सहकार्य लघुवित्त वित्तीय संस्थाबीच एक आपसमा मर्जरमा जान सहमति पत्रमा हस्ताक्षर भएको छ । यी दुई संस्थाले एक आपसमा मर्जरमा जानका लागि आज प्रारम्भिक सहमति पत्रमा हस्ताक्षर गरेका छन् ।

उक्त सहमति पत्रमा उन्नति माइक्रोफाइनान्सको सञ्चालक समिति अध्यक्ष अनिता ढुंगाना शाह र सहकार्य लघुवित्तको सञ्चालक समितिका अध्यक्ष खिलराज मैनालीले हस्ताक्षर गरेका हुन् ।

रुपन्देहीमा केन्द्रीय कार्यालय रहेको उन्नतिले १५ जिल्लामा शाखा विस्तार गरेको छ । सर्लाहीमा केन्द्रीय कार्यालय रहेको सहकार्यले १० जिल्लामा शाखा विस्तार गरी काम गर्दै आएको छ ।

हाल उन्नतिको चुक्ता पुँजी ८ करोड ८२ लाख ७५ हजार र सहकार्य लघुवित्त वित्तीय संस्थाकाे १ करोड ४० लाख रुपैयाँ छ ।

अबका दिनमा उन्नतिले १ः१ अनुपात र सहकार्यले १ः३ को अनुपातमा यसअघि पारित गरेको हकप्रद सेयर जारी गर्नेछन् । साथै सहकार्यको कल इन एड्भान्समा रहेको रकमलाई पुँजीमा गणना गरिने भएको छ ।

दुई संस्थाले पुसभित्र एकीकृत कारोबार गर्ने भएका छन् । दुई संस्थाकाे मर्जरपश्चात् उन्नति सहकार्य लघुवित्तको नामबाट एकीकृत कारोबार हुनेछ ।

दुई वित्तीय संस्था एक आपसमा गाभिएपछि सबल पुँजी भएको राष्ट्रिय स्तरको उत्कृष्ट वित्तीय संस्थामा स्थापित हुने कम्पनीको दाबी छ ।

दुई वित्तीय संस्थाहरु एक आपसमा गाभिई बन्ने वित्तीय संस्थामा ७ जना सञ्चालक हुनेछन् । जसमा उन्नतिको अध्यक्ष नै मर्जरपश्चात् अध्यक्ष रहने सहमति भएको छ । कम्पनीको प्रमुख कार्यकारी अधिकृतमा पनि उन्नतिकै सीईओलाई निरन्तरता दिइने भएको छ । कम्पनीको सेयर स्वाप रेसियो डीडीएबाट तय गरिने भएको छ ।

द्वितीय पक्षको प्रमुख कार्यकारी अधिकृतलाई मर्जरपश्चात् बन्ने वित्तीय संस्थामा नायब प्रमुख कार्यकारी अधिकृत पदमा मर्जरपश्चात् बन्ने वित्तीय संस्थाकोे कर्मचारी सेवा विनियमावलीबमोजिम विगतको खाइपाइ आएको तलब भत्ता तथा सुविधा पाउने गरी समायोजन गरिने सहमति भएको छ । हाल कार्यरत अन्य कर्मचारीको पद मर्जरपश्चात् यथावत् राखिनेछ ।

प्रकाशित मिति: शुक्रबार, साउन १०, २०७६ २१:५६