संगठन विस्तारमा आक्रामक रवी लामिछाने, महिना दिनभित्रै सातै प्रदेशमा भेला र अन्तर्क्रिया

संगठन विस्तारमा आक्रामक रवी लामिछाने, महिना दिनभित्रै सातै प्रदेशमा भेला र अन्तर्क्रिया

A+ A A-

आउँदो मंसिर ४ गते एकैचरणमा प्रदेश र प्रतिनिधिसभा चुनाव गर्ने सरकारको घोषणासँगै प्रमुख दलहरू चुनावी रणनीति बनाउन लागिपरेका छन् । स्थानीय निर्वाचनमा काठमाडाैं, धरान र धनगढीमा स्वतन्त्र उम्मेदवारले जितेपछि त्यस्तै प्रकृतिकाे राजनीतिका लागि संचारकर्म छाडेर हाेमिएका रवि लामिछानेकाे राष्ट्रिय स्वतन्त्र पार्टीप्रति चासाे देखिएकाे छ ।

एक महिनाअघि निर्वाचन आयाेगमा दर्ता भएकाे नयाँ पार्टीकाे अभियान लिएर सभापति लामिछाने, प्रवक्ता मुकुल ढकालसहित एउटा टाेली देश दौडाहामा छ । प्रदेश, जिल्ला र स्थानीय समितिहरू गठन गर्दै याे टिमले आगामी चुनावका लागि प्रचारप्रसारसमेत गरिरहेकाे छ ।

१७ असारमा लामिछाने नेतृत्वको पार्टी निर्वाचन आयोगमा दर्ता भएको थियो । घण्टी चुनाव चिन्ह पाएको पार्टीलाई विस्तार गर्न लामिछाने यतिबेला पश्चिम नेपालका विभिन्न जिल्लामा छन् । यसअघि उनले प्रदेश १, गण्डकी र सुदूरपश्चिम पुगेर प्रदेश, जिल्ला र स्थानीय समितिहरू बनाएका थिए ।

आज राष्ट्रिय स्वतन्त्र पार्टीले नेपालगञ्ज रंगशालामा आयोजित बाँके जिल्ला भेला सक्यो । सोही भेलाले जिल्ला र स्थानीय संगठन बनाएकाे छ । सुरुमा जिल्ला समन्वय समितिको हलमा कार्यक्रम गर्ने भनिए पनि अन्तिम समयमा आएर भेला रंगशालामा सारिएको थियो ।

गत सोमबार लामिछानेले सुर्खेतको वीरेन्द्रनगरमा कर्णाली प्रदेश भेला गरी प्रदेश र जिल्ला समिति बिस्तार गरेका थिए । सुर्खेतमा आयोजित भेलामा धेरै मानिसको सहभागिता देखिए पनि नेपालगञ्जमा भने त्यसको तुलनामा निकै कम सहभागी थिए । केन्द्रीय सदस्य दीपक बाेहाेराका अनुसार भोलि दाङको घोराहीमा जिल्ला भेला गर्ने कार्यक्रम छ । 'बाँकेको कार्यक्रम सकेर हामी दाङतिर जाँदैछौँ', बोहोराले भने ।

यसैगरी, शनिबार रुपन्देहीको तिलोत्तमामा लुम्बिनी प्रदेश भेला राखिएको छ । त्यो भेलाले प्रदेश, जिल्ला र स्थानीय कार्यसमितिहरू गठन गर्नेछ । देशैभर पार्टी विस्तार गर्ने क्रममा लामिछानेको टिमले १४ साउनमा सुदूरपश्चिम प्रदेश भेला गरेको थियो । त्यसको ठीक एक दिनअगाडि १३ साउनमा धनगढीमा राष्ट्रिय स्वतन्त्र पार्टीले आयोजना गरेको अन्तर्क्रियामा स्वतन्त्र लडेर चुनाव जितेका धनगढी उपमहानगरका मेयर गोपाल हमाल पनि सहभागी थिए ।

७ साउनमा राष्ट्रिय स्वतन्त्र पार्टीले पोखरामा गण्डकी प्रदेश भेला गरी मातहतका समितिहरू निर्माण गर्‍याे । पोखरा जाने क्रममा लामिछानेले धादिङ र गोरखाका स्थानीयबासीसँग अन्तर्क्रिया गरेका थिए ।

निर्वाचन आयोगबाट दल दर्ताको प्रमाणपत्र पाएकै महिना असारभित्रै लामिछानेले प्रदेश १ पुगेर मातहतका समितिहरू निर्माण गर्न भ्याएका थिए । असार ३० गते झापा भेला, ३१ गते सुनसरी भेला र ३२ गते विराटनगर पुगेर प्रदेश तथा जिल्ला भेला समापन गरेका उनले २३ असारमा चितवनमा जिल्ला तथा स्थानीय समितिहरू बनाएका थिए ।

लामिछानेले आगामी चुनावमा सकेसम्म देशभरबाट उम्मेदवार उठाउने तयारी गरेका छन् । उनी आफैँ काठमाडौं निर्वाचन क्षेत्र नम्बर ३ बाट चुनाव लड्ने योजनामा छन् । प्रमुख राजनीतिक दलका गतिविधिबाट निराश मत राष्ट्रिय स्वतन्त्र पार्टीलाई आउने विश्वासमा लामिछानेको टिम देखिन्छ । सुरुकै प्रयासमा राष्ट्रिय पार्टी बन्ने लक्ष्यसहित लामिछानेले संगठन निर्माण गरिरहेका छन् ।

राजनीतिक दलसम्बन्धी ऐन २०७३ अनुसार, प्रत्यक्षमा कम्तिमा १ र समानुपातिकमा तीन प्रतिशत मत ल्याउने पार्टीले राष्ट्रिय दलको मान्यता पाउँछ ।

प्रकाशित मिति: बिहीबार, साउन १९, २०७९ १७:५४