यस्तो पृष्ठभूमि बनाएर चिनी र गहुँ आयातमा सरकारले माग गर्‍यो निवेदन

A+ A A-

भारतले एकपछि अर्को वस्तुको निर्यातमा रोक लगाउन थालेपछि नेपाली बजारमा त्यसको नकारात्मक प्रभाव पर्न थालेको थियो ।

पछिल्लोपटक चिनी र गहुँको निर्यातमा भारतले रोक लगाएपछि नेपालमा तत्कालै मूल्यवृद्धि भएको छ भने मैदा उद्योगहरू बन्द हुने अवस्थामा पुगेको भन्दै उद्योगीहरूले सरकारलाई गुहारेका थिए ।

यसै सन्दर्भमा बिहीबारमा मात्रै सरकारले चिनी र गहुँको आयात गर्ने उद्योगीले निवेदन दिन आग्रह गरेको छ । भारतले निर्यातमा रोक लगाएको अवस्थामा नेपाल सरकारले आयात गर्नका लागि निवेदन किन माग्यो त ?

यसको पछाडि उद्योग, वाणिज्य तथा आपूर्ति मन्त्रालयले केही पृष्ठभूमि तयार गरेको थियो । गत जूनमा भएको विश्‍व व्यापार संगठनको मन्त्रीस्तरीय बैठकका क्रममा भएको दुईपक्षीय भेटमा उद्योग वाणिज्य तथा आपूर्तिमन्त्री दिलेन्द्रप्रसाद बडूले यस विषयमा भारतीय समकक्षीसँग ध्यानाकर्षण गराएका थिए । उनले भारतीय पक्ष नेपालको हकमा गहुँ र चिनीको निर्यात खुलाउन सकारात्मक रहेको बताएका थिए । यसको केही समयपछि भारतीय दूतावासले अहिलेको निर्यात प्रतिबन्ध नेपालजस्ता राष्ट्रका लागि नभएको स्पष्ट पाएको थियो ।

दुई साताअघि उद्योग, वाणिज्य तथा आपूर्ति मन्त्रालयले परराष्ट्र मन्त्रालयमार्फत यस्ता वस्तुको नेपालमा निर्यात सहजीकरण गर्न अनुरोधपत्र पठाएको थियो । नेपालको आवश्‍यकताअनुसार निर्यात गर्ने भारत तयार रहेको बताएपछि आवश्‍यकता पहिचान गर्नका लागि उद्योगी व्यवसायीसँग परामर्श गर्नुको साथै आयातका लागि निवेदन खुलाइएको मन्त्रालयका अधिकारीले बताएका छन् ।