ऊर्जाका यी १५ आयोजना जसले ८० प्रतिशतमाथिको प्रगति गरे, ११ को ५० प्रतिशतभन्दा कम

ऊर्जाका यी १५ आयोजना जसले ८० प्रतिशतमाथिको प्रगति गरे, ११ को ५० प्रतिशतभन्दा कम

A+ A A-

ऊर्जा, जलस्रोत तथा सिँचाइ मन्त्रालयअन्तर्गत ऊर्जातर्फका ३८ आयोजनामध्ये १५ आयोजनाले मात्रै ८० प्रतिशतभन्दा माथिको वित्तीय प्रगति गरेका छन् ।

जसमा माथिल्लो त्रिशूली थ्री 'ए' जलविद्युत् आयोजना (६० मेगावाट) मा १०६.६८ प्रतिशत खर्च हुँदा ९०.३१ प्रतिशत भौतिक प्रगति गरेको छ । यो आयोजनाले गत आर्थिक वर्षमा लक्ष्यभन्दा बढी वित्तीय प्रगति गरे पनि भौतिक प्रगति भने ९०.३१ प्रतिशत गरेको हो ।

तनहुँ जलविद्युत् आयोजना (१४० मेगावाट) ले गत आर्थिक वर्षमा ९९.६५ प्रतिशत वित्तीय र ९२.९७ प्रतिशत भौतिक प्रगति गरेको छ । माथिल्लो मोदी जलविद्युत् आयोजनाको काम पनि राम्रो देखिएको छ । गत वर्ष यो आयोजनामा निर्धारित काममा करिब ९६ प्रतिशत भौतिक प्रगति हुँदा खर्च भने १९१.७२ प्रतिशत भएको जनाइएको छ ।

माथिल्लो तामाकोसीको क्यास्केड आयोजनाका रूपमा अघि बढाउन लागिएको करिब १ सय मेगावाट क्षमताको तामाकोसी पाँचौँ जलविद्युत् आयोजनामा १०२.५० प्रतिशत वित्तीय र ९५.३८ प्रतिशत भौतिक प्रगति छ । जलविद्युत् सुदृढीकरण आयोजनाले १५२ प्रतिशत वित्तीय र १७६ प्रतिशत भौतिक प्रगति गरेको छ ।

बुढीगण्डकी जलविद्युत् आयोजनामा गत वर्ष निर्धारित लक्ष्यमा झन्डै ९८ प्रतिशत वित्तीय र ८६ प्रतिशत भौतिक प्रगति भएको दाबी गरिएको छ ।

निकायगत रूपमा हेर्दा वैकल्पिक ऊर्जा प्रवर्द्धन केन्द्रले करिब ८२ प्रतिशत वित्तीय र ८२.३४ प्रतिशत भौतिक प्रगति हासिल गरेको छ । जल तथा ऊर्जा आयोगको ८५.४३ प्रतिशत वित्तीय र ९६.२० भौतिक प्रगति छ ।

राष्ट्रिय ग्रामीण तथा नवीकरणीय ऊर्जा कार्यक्रमले पनि लगभग ८६ प्रतिशत वित्तीय र ८३.३६ प्रतिशत भौतिक प्रगति भेटेको हो । विद्युत् विकास विभागको भने ७८ प्रतिशतभन्दा कम वित्तीय प्रगति र ८८ प्रतिशत हाराहारी भौतिक प्रगति छ ।

विद्युत् विकासमा निजीक्षेत्रको प्रवर्द्धन कार्यक्रममा वित्तीय र भौतिक प्रगति दुवै झण्डै शतप्रतिशत हासिल भएको जनाइएको छ ।

गत आर्थिक वर्ष २०७८/७९ मा ऊर्जा, जलस्रोत तथा सिँचाइ मन्त्रालयले ८० प्रतिशत भौतिक प्रगति हासिल गरेको छ । मन्त्रालयले मंगलबार वार्षिक समीक्षा गर्दै भौतिक यो अनुपातमा भएको जनाएको हो । यस्तै, गत आर्थिक वर्षका लागि विनियोजित कुल १ खर्ब ३ अर्ब ८१ करोड हाराहारी बजेटमध्ये ७६.६६ प्रतिशत खर्च भएको पनि मन्त्रालयले उल्लेख गरेको छ ।

यो प्रगति मन्त्रालयअन्तर्गत अघि बढाइएका परियोजनाहरूको समग्र प्रगति नभएर अघिल्लो आर्थिक वर्षका लागि निर्धारित लक्ष्यका आधारमा हिसाब गरिएको हो ।

मन्त्रालयले आफ्ना दुई प्रमुख कार्यक्षेत्रमध्ये ऊर्जातर्फ झन्डै ७३ अर्ब बजेट गत वर्ष छुट्याइएको थियो । त्यसको ७५ प्रतिशत खर्च भएको जनाएको छ । ऊर्जातर्फ अघि बढाइएका परियोजनाहरूको भौतिक प्रगति ७७ प्रतिशत हासिल गरेको छ ।

यस्तै, मन्त्रालयले जलस्रोत तथा सिँचाइतर्फ झन्डै ३१ अर्ब रूपैयाँ बजेट विनियोजन गरेको थियो । यसमध्ये ८१ प्रतिशत खर्च भएको छ । भौतिक प्रगति ८८ प्रतिशतनजिक छ ।

प्रकाशित मिति: मंगलबार, साउन १७, २०७९ १८:१४