विद्यार्थीको ज्यान धरापमा राखेर गाडी चलाउँदै स्कुल, चालक मापसे गर्छन्, निर्देशिका टेर्दैनन्

विद्यार्थीको ज्यान धरापमा राखेर गाडी चलाउँदै स्कुल, चालक मापसे गर्छन्, निर्देशिका टेर्दैनन्

A+ A A-

घटना १

१० चैत २०७७ को बिहान तुलसीपुरको सरैयाडाँडाको चोकमा रा १ क ४३३ नम्बरको पब्लिक ज्ञान ज्योति माध्यमिक विद्यालयको बस दुर्घटना भयो । दुर्घटनामा परी घाइते भएकी बसमा सवार १८ वर्षीया सम्झना केसीको उपचारका क्रममा सिटी अस्पतालमा मृत्यु भयो । उक्त घटनामा सबैजसो विद्यार्थी घाइते भए । प्रहरीका अनुसार दुर्घटनाको कारण यान्त्रिक गडबडी हो । उक्त गाडीको ब्रेक अचानक फेल भएको थियो ।

घटना २

९ माघ २०७६ मा मोरङको रंगेलीबाट विद्यार्थी बोकेर विराटनगरतर्फ आउँदै गरेको मे १ ख १४९० नम्बरको स्कुल बस दुर्घटना भयो । लर्डबुद्ध हाइयर सेकेण्डरी स्कुलको उक्त बस दुर्घटना हुँदा सहचालक ३२ वर्षका सानुकुमार साहको मृत्यु भयो भने गाडीमा सवार १२ जनामध्ये ५ जना विद्यार्थी घाइते भए ।

घटना ३

१५ भदौ २०७६ मा कपनस्थित ‘लिटिल वन’ मन्टेश्वरी स्कुलको भ्यान पल्टिँदा सात जना विद्यार्थी घाइते भए । १३ जना मन्टेश्वरीका विद्यार्थीमध्ये ४ जनामा सामान्य चोट लाग्यो भने र तीन जनाको हातखुट्टाको हड्डी भाँचियो ।

यी त प्रतिनिधि घटना मात्रै हुन् । विद्यालयले सरकारी नीतिलाई बेवास्ता गर्दा यस्ता घटना बेलाबेलामा भइरहन्छन् । सवारी दुर्घटनाको मुख्य कारणमध्ये यान्त्रिक गडबडी र उच्च गति भए पनि निजी विद्यालय र योप्रति उदासीन देखिन्छन् ।

नेपाल सरकारको १ चैत २०७२ को मन्त्रिपरिषद्‌को निर्णयले २० वर्षभन्दा पुरानो सम्पूर्ण सार्वजनिक यातायात १ चैत २०७४ भित्र विस्थापित गर्नुपर्ने भने पनि यो नियम स्कुललाई लागू भएकाे छैन । यातायात व्यवस्था विभागका अनुसार स्कुल बस रातो नम्बर प्लेटमा दर्ता हुने भएकाले सार्वजनिक यातायातको कानुन लागू हुँदैन ।

स्कुल बसलाई नियमन गर्न विभागले स्कुल बस निर्देशिका २०७४ जारी गरेको छ । तर, देशका अन्य ठाउँको त परै जावस् उपत्यकाका महँगा स्कुलहरूले पनि निर्देशिकालाई बेवास्ता गरिरहेका छन् । अघिल्लो हप्तादेखि ट्राफिक प्रहरीले स्कुल बस चेकिङमा कडाइ गरेपछि दर्जनौँ स्कुल बस कारबाहीमा परेको काठमाडौं उपत्यका ट्राफिक प्रहरी कार्यालयका प्रवक्ता राजेन्द्रप्रसाद भट्टले जानकारी दिए ।

‘अघिल्लो हप्ता १२ जना चालक बिहानै मापसे गरेर बस चलाएको भेटेका थियौँ । आज गरेको १ सय ७५ वटा चेकिङमध्ये १६ जना कारबाहीमा परे । तीमध्ये पाँच जना मापसेमा परे,’ उनले भने ।

क्षमताभन्दा धेरै विद्यार्थी बोकेका, गाडीको अवस्था राम्रो नभएकालगायत स्कुल बस निर्देशिका पालना नगरेका धेरै स्कुल बस, भ्यान कारबाहीमा परेको उनले जानकारी दिए । यी कुरा आफ्नो जानकारीमा आएको र यो विषयलाई गम्भीरतापूर्वक लिइएको निजी विद्यालयहरूको छाता संगठन प्याब्सनका अध्यक्ष डीके ढुुङ्गाना बताउँछन् ।

‘केही चालकले मापसे गरेरसमेत सवारी चलाएको जानकारी पाएँ । यो क्षम्य विषय होइन । कुन–कुन विद्यालयको हो म बुझ्दैछु, ती चालकलाई निलम्ब गर्छौं,’ उनले शिलापत्रसँग भने । सबै विद्यालयहरूलाई यातायात व्यवस्था विभागको निर्देशिकाअनुसार स्कुलबस राख्न र मापदण्ड पूरा गर्न निर्देशन दिने उनले बताए ।

‘यो गम्भीर विषय हो । हामी कमिटीमा छलफल गरेर कसरी अघि बढ्ने भन्ने टुङ्गो लगाउँछौँ,’ उनले भने ।

प्रकाशित मिति: आइतबार, साउन १५, २०७९ १७:४१