हेटौंडाका ८ उद्योगविरुद्ध मुद्दा, कमसल सामान उत्पादन गरेको आरोप

A+ A A-

हेटाैंडाका ८ वटा उद्याेगविरुद्ध मुद्दा चलाइएकाे छ । न्यून गुणस्तरको खाद्य पदार्थ उत्पादन गरेकाे कसुरमा ती उद्याेगविरुद्ध खाद्य प्रविधि तथा गुण नियन्त्रण कार्यालय गत आर्थिक वर्ष २०७८/७९ मा मुद्दा दायर गरेको छ ।

विभिन्न उद्योगबाट उत्पादित नमूनाको सङ्कलन गरी जाँच गर्दा मापदण्डअनुसारको उत्पादन नभएकाले ती उद्योगमाथि सम्बन्धित जिल्ला अदालत र जिल्ला प्रशासन कार्यालयमा मुद्दा दायर गरिएको कार्यालयले जनाएको छ । कार्यालयले वार्षिक प्रतिवेदन सार्वजनिक गर्दै गत आर्थिक वर्ष र अघिल्लो आर्थिक वर्षको सात मुद्दाको फैसला भएकोमा चार मुद्दाको फैसला हुन् बाँकी रहेको बताइएको छ ।

कूल ११ वटा मुद्दा दुई आर्थिक वर्षमा दायर भएको थियो । गत आर्थिक वर्षमा उपभोक्ताबाट कार्यालयमा छ उजुरी प्राप्त भएकोमा पाँच उजुरीको अनुसन्धान सकिएको छ । जसमा दुई उजुरीमाथि मुद्दा दायर दायर गरिसकिएको छ भने दुईमा अनुगमन गरी सुधारात्मक निर्देशन दिइएको छ ।

एउटा उजुरीमा नमूना सङ्कलन गरी प्रयोगशाला विश्लेषण गर्दा कैफियत नपाइएको तथा एउटा उजुरी अनुसन्धानको क्रममा रहेको जनाइएको छ । प्रतिवेदनमा उपभोक्ताको स्वास्थ्य र सुविधा कायम राख्न विद्यमान खाद्य ऐन र नियमको प्रभावकारी कार्यान्वयन गर्दै सरोकारवालाको सहयोग र समन्वयमा कार्यक्रम सञ्चालन हुँदै आएको उल्लेख गरिएको छ ।

गत आर्थिक वर्षमा कार्यालयले ६० बजार, दुई सय १० उद्योग तथा ४१ होटल तथा रेस्टुरेन्ट र चमेना गृहको अनुगमन गरिएको प्रतिवेदनमा जनाइएको छ । गत आर्थिक वर्षमा कार्यालयवाट २९ खाद्य तथा दानाको अनुज्ञापत्र जारी गरिएको, एक सय चार खाद्य पदार्थको अनुज्ञापत्र नवीकरण गरिएको तथा उद्योग स्थापानार्थ ७८ उद्योगको सिफारिस गरिएको सो कार्यालयले जनाएको छ ।

त्यस्तै अनुगमनको क्रममा सात होटल र रेस्टुरेन्टलाई स्तरीकरण लोगो वितरण गरिएको बताइएको छ । कार्यालयका सूचना अधिकारी प्रगति अधिकारीका अनुसार सेवाग्राहीलाई विश्वसनीय प्रयोगशालाको अनुभूति गराउनका लागि कार्यालयले गत आर्थिक वर्षमा २ हजार एक सय २० खाद्य पदार्थ नमूना विश्लेषण गरेकोमा ९६ वटा नमूना प्रतिकूल रहेको उल्लेख गरिएको छ । कार्यालयले उपरोक्त विभिन्न शीर्षकवाट गत आर्थिक वर्षमा १९ लाख ६२ हजार रुपैयाँ नौ सय राजशव सङ्कलन गरेको थियो । साथै, कार्यालयले जिल्ला प्रशासन कार्यालय मकवानपुरको आदेशमा गत आर्थिक वर्षमा युनिलिभर नेपाल लिमिटेडको म्याद सकिएको २ हजार २ सय २८ वोरा चियापत्ती नस्ट गरेको बताइएको छ ।

प्रकाशित मिति: शनिबार, साउन १४, २०७९ ०७:४७