थाहा पाउनुहोस्, ८० हजार दामभित्रका लेटेस्ट ल्यापटपहरू

A+ A A-

बुधबार झम्के साँझमा दीपेन्द्र कुँवर ल्यापटपको खोजीमा चाबहिल स्तुपास्थित भीएस ल्यापटप रिपेयरिङ सेन्टरमा पुगे । ‘प्लस टु’ सकेपछि आईटी पढ्न ल्यापटप अनिवार्य चाहिने हुँदा उनी बजारतिर निस्केका हुन् । नाम ‘रिपेयरिङ सेन्टर’ भए पनि यहाँ नयाँ र सेकेन्ड ह्यान्ड ल्यापटप दुवै पाइन्छन् भन्ने जानकारी दीपेन्द्रले पाएका थिए ।

दीपेन्द्र कुँवर ।

खोज्न त उनले राम्रा र मध्यम खालका (आई ७) ल्यापटप खोजेका रहेछन् । तर, कम्प्युटर पसलेले ८० हजारभन्दा कम र ६० हजारभन्दा माथिका राम्रा ल्यापटप देखाए । दीपेन्द्रले त्यस्ता ल्यापटप हेर्न थालेपछि हामीले पनि ८० हजार रुपैयाँभन्दा कम मूल्यमा पाइने ल्यापटपबारे सोधीखोजी गर्‍यौँ । दीपेन्द्रसँगै हामीले पनि ल्यापटपको बजारमा आँखा डुलायौँ ।

त्यसैले, आजकाे ‘हाटबजार’ शृङ्खलामा हामी तपाईंलाई ६० हजारदेखि ८० हजार रुपैयाँसम्ममा पाइने ल्यापटपबारे जानकारी गराउँदैछौँ । हुन त बजारमा कम मूल्यका ल्यापटप पनि पाइन्छन् । तर, आज हामी धेरैजसाे खाेजिने र खरिदबिक्री हुने ‘लेटेस्ट’ मोडलका ल्यापटपबारे तपाईँहरूलाई बताउँदैछौँ ।

जान्नुहोस्, ६० देखि ८० हजारसम्म कुन माेडलका कस्ता ल्यापटप पाइन्छन्ः

एसर एसपायर ५

१२औँ जेनेरेसनको अर्थात् सबैभन्दा पछिल्लो जेनेरेसनको ल्यापटप हो, एसर एसपायर । यसको औसत मूल्य ६५ हजार पर्छ । यो ल्यापटपमा १५.६ इन्चको १०८० एचडी डिस्प्ले उपलब्ध छ । यो भनेको डिस्प्ले क्वालिटी राम्रो भएको मानिन्छ ।

एसर एसपायर ५ को प्रोसेसर ‘आई ३’ मोडलको छ । यसमा आइरिक्स ग्राफिक्स उपलब्ध छ । गेमिङ ल्यापटपहरूमा जस्तो छुट्टै ग्राफिक्स भने यसमा आउँदैन । आइरिक्स ग्राफिक्स प्रोसेसरसँगै आउने ग्राफिक्स हो । यो भनेको अहिलेको लेटेस्ट जेनेरेसनका सबै ल्यापटपमा पाइन्छ ।

यसमा ४ जीबी र्‍याम र २५६ जीबीको ‘एसएसडी’ (सोलिड स्टेट ड्राइभ्स) इन्टरनल स्टोरेज छ । एसएसडीलाई राम्रो खाले हार्डडिक्स मानिन्छ । त्यसैले थोरै जीबी भए पनि यो ल्यापटप छिटो चल्छ । पुरानो जेनेरेसनका ल्यापटपहरूमा ‘एचडीडी’ (हार्ड डिस्क ड्राइभ्स) हुन्छ, जुन एसएसडीभन्दा कम गुणस्तरीय हुन्छ । प्राविधिकहरूका अनुसार एचडीडीभन्दा एसएसडी १० गुणा छिटो, टिकाउ हुनुका साथै यसले ऊर्जा पनि कम खपत गर्दछ ।

एसर एसपायर ५ ल्यापटप खरिद गर्दा एक वर्षको वारेन्टी पाइन्छ । ल्यापटपको भित्री भाग मदरबोर्डमा एक वर्ष वारेन्टी हुन्छ । त्यस्तै, हार्डवेरहरू (किबोर्ड, डिस्प्ले आदि) मा ६ महिनाको ग्यारेन्टी पनि कम्पनीले दिएको छ ।

एसर एक्टेन्सा १५

७० हजारसम्ममा एसर एक्टेन्सा १५ किन्न पाइन्छ । यो ११ जेनेरेसनको ल्याप्टप हो । यो ल्यापटपमा आई ५ प्रोसेसर उपलब्ध छ । जुन ग्राफिक्सका लागि महत्त्वपूर्ण मानिन्छ । यसमा ८ जीबी र्‍याम र ५ सय १२ एसएसडी इन्टरनल स्टोरेज हुन्छ ।

एसर एक्टेन्सा १५ मा अन्य ‘फिचर’ भने एसर एसपायर ५ को जस्तै हुन्छ । एसरको ल्यापटपहरूको सामान बिग्रेर फेर्न परेमा सजिलै बजारमा पाइने भएकाले पनि यसको धेरै खोजी गरिन्छ । यसमा ब्याट्री ‘ब्याकअप’ ३ घण्टाजतिको हुन्छ ।

लेनोभोको भी १४

लेनोभोको भी १४ ल्यापटप ६५ हजार हाराहारी मूल्यमा बजारमा किन्न पाइन्छ । १४ इन्चको ल्यापटपलाई भने ६२ हजारमै किन्न पाइन्छ । १५ इन्चको लिने हो भने ६५ हजार पर्छ । १५ इन्चको ल्यापटपको किबोर्डमा ‘नम्बर की’हरू भने हुँदैन । किबोर्डको साइडमा हुने नम्बरसँगैको अन्य ‘की’ पनि हटाइएको हुन्छ ।

यसमा ‘आई ५’ मोडलको प्रोसेसर हुन्छ । र, यो ११ जेनेरेसनको ल्यापटप हो । यसमा ८ जीबी र्‍याम र २५६ एसएसडी इन्टरनल स्टोेरेज हुन्छ । १०८० डिस्प्ले क्वालिटी र आइरिक्स ग्राफिक्स हुन्छ ।

लेनोभोको भी १४ ल्यापटपमा एक वर्ष वारेन्टी हुन्छ । र, हार्डवेयरका लागि ६ महिनाको ग्यारेन्टी हुन्छ ।

गेटवे १४

गेटवे १४ ल्यापटप ६३ हजार मूल्यमा बजारमा किन्न पाइन्छ । यसमा आई ३ प्रोसेसर हुन्छ । यो ११औँ जेनेरेसनको ल्यापटप हो । यसमा ४ जीबी र्‍याम र २५६ एसएसडी हुन्छ ।

गेटवे १४ ल्यापटप १४ इन्चको हुने भएकाले पनि ब्याकअप धेरै हुन्छ । १५ इन्चको ल्यापटपभन्दा १ घण्टा यसको व्याकअप बढी हुन्छ । ल्यापटपमा ‘फिङ्गर प्रिन्ट’ सेन्सर पनि छ । यसमा १ वर्षे वारेन्टी हुन्छ । हार्डवेयरमा भने ६ महिना ग्यारेन्टी हुन्छ ।

एचपी १५

एचपी १५ ७६ हजारमा किन्न पाइन्छ । यसमा फिङ्गर प्रिन्ट सेन्सर पनि हुन्छ । यसको डिस्प्ले १५.६ इन्च छ ।

एचपी १५ ल्यापटपमा ‘आई ५’ प्रोसेसर रहेको छ । र, यो ११औँ जेनेरेसनको ल्यापटप हो । यसमा ‘टाइप सी’ चार्जिङ पोइन्ट पनि उपलब्ध छ । साधारण पोर्टसँगै टाइप सीबाट पनि ल्यापटप चार्ज गर्न मिल्छ । यसमा ८ जीबी र्‍याम र २५६ एसएसडी इन्टरनल स्टोरेज हुन्छ ।

एसस भिभो बुक

एसस भिसो बुक ६४ हजार हाराहारीमा किन्न पाइन्छ । यो ११औँ जेनेरेसनको ल्यापटप हो । यसमा ‘आई ३’ मोडेलको प्रोसेसर हुन्छ । ल्यापटपमा ४ जीबी र्‍याम र २५६ जीबी एसएसडी इन्टरनल स्टोरेज हुन्छ । १४ र १५ इन्चको ल्यापटप दुवैको मूल्य उस्तै पर्छ ।

यसमा फिङ्गर प्रिन्ट सेन्सर पाइन्छ । यसमा टाइप सी चार्जिङ पोइन्ट पनि छ । ब्याक लिडको फिचर पनि यसमा छ । अर्थात् किबोर्डमा बत्ती बल्ने सुविधा पनि यो ल्यापटपमा छ ।

साधारणतया ल्यापटपहरूमा एक वर्ष वारेन्टी हुन्छ । तर, एससको भिभो बुकमा भने दुई वर्ष वारेन्टी पाइन्छ । प्रायः ल्यापटपहरू किन्दा ल्यापटपमा माउस पनि पाइँदैन । माउस र ब्याग धेरैजसो स्टोरहरूले सित्तैँमा उपलब्ध गराउँछन् । कतिपय ठाउँमा अझ त्यस्तो सुविधा पनि पाइँदैन । एससको यो मोडलमा भने कम्पनीले नै ब्याग र एस सेट माउस दिन्छन् ।

०००

त्यसो त बजारमा ल्यापटप ३०/३५ हजारदेखिका पनि पाइन्छन् । जसमा ‘आई ३’ प्रोसेसर हुन्छ । तर, यस्ता ल्यापटपमा थोरै स्टोरेज हुन्छ । सामान्य रूपमा चलाउन सकिने भए पनि छिटो बिग्रिने र स्पेस नपुग्ने हुन्छ । त्यसैले अक्सर बिक्रेता र खरिदकर्ता दुवैको रोजाइमा यस्ता ल्यापटप पर्दैनन् । पुतली सडकमा रहेको ललित ट्रेडिङका बिक्रेता भन्छन्, ‘सस्तो भए पनि गुणस्तरीय नहुने भएकाले यो किन्न हामी खास सुझाउँदैनौँ ।’

अरू पनि..

प्रकाशित मिति: शनिबार, साउन १४, २०७९ ०९:१२