हेटौँडाका उद्योगीलाई चार वर्षपछि भाडा तिर्न काटियो पत्र, मन्त्री बडूसँग याचना

हेटौँडाका उद्योगीलाई चार वर्षपछि भाडा तिर्न काटियो पत्र, मन्त्री बडूसँग याचना

A+ A A-

क्षेत्रफलको दृष्टिकोणले देशकै ठूलो हेटौँडा आद्योगिक क्षेत्रका उद्योगीहरू यतिबेला चार वर्षको भाडा तिर्न पत्र काटिएपछि तनावमा परेका छन् ।

औद्योगिक क्षेत्र व्यवस्थापन कम्पनी लिमिटेडले चार वर्षअघि बढाइएको भाडा तिर्न २०७९ सालमा आएर पत्र काटेको भन्दै उद्योग संघ मकवानपुर आन्दोलनमा होमिएको छ । उद्योग संघ मकवानपुरले बिहीबार हेटौँडा आइपुगेका उद्योग वाणिज्य तथा आपूर्तिमन्त्री दिलेन्द्रप्रसाद बडूलाई भेटेर भाडा लागू नगर्न माग गरेको छ ।

उद्योग संघ अध्यक्ष स्वागतराज प्याकुरेलले जग्गा भाडादर वृद्धिप्रति संघको पूर्ण असहमति रहेको भन्दै लागू नगर्न मन्त्रीसमक्ष याचना गरेका हुन् । लिमिटेडले हेटौँडा औद्योगिक क्षेत्रको प्रति रोपनी १९ हजार ६ सय ९१ रुपैयाँको दरले भाडा भुक्तानी गर्न औद्योगिक क्षेत्रका १ सय ४९ वटा उद्योगहरूलाई पत्रसहित बिल पठाएको छ । कार्यालयले २०७५ को निर्णय अनुसारको बढेको जग्गा भाडा भुक्तानीका लागि उद्योगीहरूलाई पत्र काटेको छ ।

लिमिटेडले हेटौँडा औद्योगिक क्षेत्रको हाल कायम भाडादरमा १ सय ३३ प्रतिशत वृद्धि गरेर सोही अनुसारको भाडा भुक्तानीका लागि पठाएको हो । लिमिटेडको २०७५ मंसिर ५ को निर्णयानुसारको भाडा तिर्नुपर्ने भन्दै ४ वर्षपछि उद्योग प्रतिष्ठानहरूलाई पत्र काटेको जनाइएको छ ।

औद्योगिक क्षेत्र व्यवस्थापन कार्यालय हेटौँडाका प्रमुख भोजराज विनाडीले चार वर्षअघि बढाइएको भनिएको भाडाको भुक्तानी दिन यतिबेला पत्र काटिएको शिलापत्रलाई जानकारी दिए । ‘२०७५ सालमै भाडा बढाउने निर्णय कार्यान्वयन गर्न भन्दै भुक्तानीका लागि बिलसहित पत्र काटिएको हो,’ विनाडीले भने ।

उद्योगहरूलाई कुल १४ करोडभन्दा बढी रकमको बिल पठाइएको जनाइएको छ । बिल अनुसार हेटौँडा औद्योगिक क्षेत्रमा १७ रोपनी जग्गा भाडामा लिएर सञ्चालन गर्दै आएको एउटा उद्योगले यसै महिनामा ९ लाख ५ हजार रुपैयाँ भाडा भुक्तानी गर्नुपर्ने भएको छ । बढेको भाडा तिर्नसक्ने अवस्थामा उद्योगहरू नरहेको संघका अध्यक्ष प्याकुरेल बताउँछन् ।

कोरोना महामारीका कारण थला परेका उद्योगहरू बल्ल उठ्न थालेको र हाल तरलता अभाव र महँगीका कारण धरासयी अवस्थामा भाडा वृद्धिको निर्णयले हतोत्साहित बनाएको उनको भनाइ छ । हेटौँडा औद्योगिक क्षेत्रमा रहेका १ सय ४९ वटा उद्योगमध्ये १ सय ३३ वटा सञ्चालनमा छन् । ५ वटा पूर्ण रूपमा बन्द अवस्थामा छन् । ११ वटा उद्योग निर्माणाधीन अवस्थामा रहेको कार्यालयले जनाएको छ ।

हेटौँडा औद्योगिक क्षेत्रमा पहुँचवालाहरूले वर्षौंदेखि जग्गा भाडामा लिएर कब्जा जमाउँदै आएका छन् । यसकारण नयाँ उद्योगहरू खुल्नसमेत पाएका छैनन् । कानुनतः जग्गा भाडामा लिएको निश्चित समयभित्र उद्योग सञ्चालन गरिसक्नुपर्ने कानुनी प्रावधान छ । राजनीतिक पहुँचका आधारमा व्यापारीदेखि नेतासम्मले औद्योगिक क्षेत्रको जग्गा भाडामा लिएर उद्योग सञ्चालन गरेका छैनन् । केहीले वर्षौंदेखि भाडासमेत तिरेका छैनन् ।

प्रकाशित मिति: बिहीबार, साउन १२, २०७९ १७:३९