बिजुली गाडी आयात गर्दा मात्रै उठ्यो डेढ अर्ब राजस्व

A+ A A-

गत आर्थिक वर्ष २०७८/७९ मा बिजुली गाडी आयातमा मात्रै झण्डै डेढ अर्ब राजस्व संकलन भएको छ । सो आर्थिक वर्षमा विद्युतीय कार, जिप र भ्यान आयात गर्दा १ अर्ब ४३ करोड ९२ लाख ३ हजार राजस्व संकलन भएको हो ।

यातायात विभागका अनुसार सो वर्ष ५ अर्ब ३२ करोड ५ लाख ५० हजार रुपैयाँबराबरका १ हजार ८ सय सातवटा विद्युतीय कार, जिप र भ्यान भित्रिएका थिए । १०० देखि ३ सय किलोवाटसम्मका यी गाडी चीन, फ्रान्स, भारत, दक्षिण कोरिया, अमेरिका, जापानबाट आयात भएका हुन् ।

आर्थिक वर्ष २०७८/७९ मा आयात भएका विद्युतीय सवारीसाधनको संख्या आर्थिक वर्ष २०७६/७७ मा आयात भएको भन्दा बढी हो । भन्सार विभागको तथ्याङ्कअनुसार आर्थिक वर्ष २०७६/७७ मा चीन, भारत, दक्षिण कोरिया र भारतबाट २ सय ४९ वटा मात्र विद्युतीय सवारीसाधन आयात भएका थिए ।

उक्त वर्ष ६५ करोड ७८ लाख ४३ हजार रुपैयाँबराबरका विद्युतीय सवारीसाधन आयात भएका थिए भने ३४ करोड २ लाख ९८ हजार मात्र राजस्व उठेको थियो ।

तत्कालीन अर्थमन्त्री डा. युवराज खतिवडाले बजेटमा बिजुली गाडीको कर बढाइदिएपछि ग्राहकले व्यापारीहरूले गाडी भन्सार कटाउन नसकेका कारण आर्थिक वर्ष २०७६/७७ मा बिजुली गाडीको व्यापार निराशाजनक बनेको थियो । बजेटमार्फत उनले बिजुली गाडी नेपाल ल्याउँदा एउटै गाडीमा ३० लाखसम्म अतिरिक्त भार थपेका थिए ।

पहिले सबै प्रकारका बिजुली गाडी आयातमा १० प्रतिशत भन्सार, थप ५ प्रतिशत सडक दस्तुर र १३ प्रतिशत मूल्यअभिवृद्धि कर मात्र लाग्थ्यो । डा. खतिवडाले बजेटमार्फत भन्सार महसुल १० प्रतिशतबाट ८० प्रतिशत पुर्‍याइदिए । त्यस्तै, अन्तशुल्क पनि सवारीसाधनको क्षमताअनुसार ३० देखि ८० प्रतिशत पुर्‍याएका थिए ।

पछि, अर्थमन्त्री विष्णु पौडेलले अध्यादेशमार्फत ल्याइएको बजेटमार्फत विद्युतीय सवारीसाधनमा अन्तशुल्क पूरै मिनाहा गरे भने भन्सार शुल्क पनि उल्लेख्य रूपमा घटाए । त्यसपछि भने व्यापारीहरूले सीमापारि थन्किएर बसेका गाडी नेपाल भित्र्याएका थिए ।

पछि २०७९/८० को बजेटमार्फत अर्थमन्त्री जर्नादन शर्माले यसअघि अर्थमन्त्री विष्णु पौडेलले पूरै मिनाहा गरेको विद्युतीय सवारीसाधनको आयातमा ३० देखि ६० प्रतिशतसम्म अन्तशुल्क लगाएका छन् ।

उनले मोटर पिक पावर १ सय किलोवाटदेखि २ सयसम्म ३० प्रतिशत, २ सयदेखि ३ किलोवाटसम्म ४५ प्रतिशत र ३ सयभन्दा माथि ६० प्रतिशत अन्तःशुल्क लगाएका थिए । हाल नेपालका सडकमा एमजी, हुन्डाई, किया, टेस्ला, प्युजो, निसान, टाटा, दिगोलगायतका विद्युतीय सवारीसाधन चलिरहेका छन् ।

आर्थिक वर्ष २०७८/७९ मा सबै प्रकारका सवारीसाधन गरेर कुल ९९ अर्ब ४२ करोड ९५ लाख ५० हजार रुपैयाँका सवारीसाधन आयात भएका छन् । जसबाट सरकारी ढुकुटीमा ९० अर्ब ५ करोड ४७ लाख ५१ हजार राजस्व संकलन भएको छ ।

प्रकाशित मिति: बुधबार, साउन ११, २०७९ २१:०६