राष्ट्र बैंकले १ अर्ब २० करोड रकम मुद्दती निक्षेपमा राख्ने, यस्ता छन् सर्त

A+ A A-

नेपाल राष्ट्र बैंकले १ अर्ब २० करोड रुपैयाँ मुद्दती निक्षेपमा लगानी गर्ने भएको छ । केन्द्रीय बैंकले उपदान तथा पेन्सन कोषको रकममध्ये १ अर्ब २० करोड लगानी गर्न लागेको हो ।

राष्ट्र बैंकले उक्त परिमाणको रकम एक वर्षका लागि वाणिज्य बैंक, विकास बैंक र फाइनान्स कम्पनीमा जम्मा गर्ने भएको हो । राष्ट्र बैंकले मुद्दती निक्षेपमा लगानी गर्ने भनेको सो रकममध्ये वाणिज्य बैंकमा ९६ करोड, राष्ट्रियस्तरका विकास बैंकमा १८ करोड र राष्ट्रियस्तरका वित्त कम्पनीमा ६ करोड रुपैयाँ छुट्याएको छ ।

केन्द्रीय बैंकले २०७९ भदौ २ गतेदेखि २०८० भदौ २ गतेसम्मका लागि मुद्दती निक्षेपमा लगानी गर्ने जनाएको छ । यो निक्षेप रकम लिन चाहने बैंक तथा वित्तीय संस्थाले ब्याजदरसहितको आवेदन केन्द्रीय बैंकमा बुझाउन भनिएको छ ।

बैंक तथा वित्तीय संस्थाले साउन १२ गतेसम्म आफूले लिन चाहेको रकम तथा उक्त रकमका लागि प्रस्ताव गरिएको ब्याजदरसमेत खुलाएर राष्ट्र बैंकमा निवेदन दिनुपर्नेछ ।

केन्द्रीय बैंकले लगानी गर्न चाहेको रकम निक्षेप राख्ने संस्थाले तोकिएको सर्त पूरा भएको हुनुपर्ने जनाएको छ । बैंक तथा वित्तीय संस्था सञ्चालनमा आएको कम्तीमा २ वर्ष पूरा गरेको संस्था मात्र यसका लागि योग्य हुनेछ ।

त्यसैगरी, राष्ट्र बैंकबाट तोकिएको न्यूनतम पुँजीकोष कायम रहेको, अघिल्लो आर्थिक वर्षमा सञ्चालन मुनाफामा रहेको, निष्क्रिय कर्जा कुल सापटीको ५ प्रतिशतभन्दा कम रहेको, खुद तरल सम्पत्ति २० प्रतिशत भन्दा कम नभएको र रियल इस्टेट कर्जा बैंकबाट तोकिएको सीमाभन्दा बढी नभएको हुनुपर्नेछ ।

यस्तै, निक्षेप लिने बैंकका प्रमुख कार्यकारी अधिकृत वा सञ्चालक कारबाहीमा परेको नपरेको हुनुपर्ने सर्त सूचनामा तोकिएको छ ।

उक्त मुद्दती निक्षेपलाई केन्द्रीय बैंकले त्रैमासिक रूपमा ब्याज लिनेछ ।

प्रकाशित मिति: मंगलबार, साउन १०, २०७९ १८:२५