राष्ट्र बैंकको सर्भेः तीन महिनामा १४.२ प्रतिशतको मूल्य वृद्धि, घरजग्गाको मूल्य नबढ्ने

राष्ट्र बैंकको सर्भेः तीन महिनामा १४.२ प्रतिशतको मूल्य वृद्धि, घरजग्गाको मूल्य नबढ्ने

A+ A A-

नेपाल राष्ट्र बैंकको सर्वेक्षणले आगामी ३ महिनाभित्र १४.२ प्रतिशतको मूल्य वृद्धिदर पुग्ने देखाएको छ । आगामी तीन महिनामा औसत मुद्रास्फीतिदर १४.२ प्रतिशत पुग्ने प्रक्षेपण गरिएको हो ।

गत असार २० देखि २७ गतेसम्म २८ शहरका ३१ बजार क्षेत्रका बासिन्दासँग अन्तर्वार्ता लिएर उक्त तथ्यांक तयार गरिएको राष्ट्र बैंकले जनाएको छ । ११ सय ४१ जनाको प्रतिक्रियालाई आधार बनाएर मुद्रास्फीतिले दोहोरो अंक छुने तथ्यांक सार्वजनिक गरिएको छ ।

अघिल्लो सर्वेक्षणको तुलनामा अहिलेको सर्वेक्षणमा २ सय १० थप भएको बताइएको छ । सर्वेक्षणमा सहभागी भएकामध्ये ९४.७ प्रतिशत उत्तरदाताले आगामी तीन महिनामा मूल्यवृद्धि हुने अपेक्षा गरेका छन् । त्यसैगरी, ९४.४ प्रतिशत उत्तरदाताले आगामी एक वर्षमा मूल्यवृद्धि हुने अपेक्षा गरेका छन् ।

आगामी तीन महिनामा मूल्यवृद्धि हुने अपेक्षा गर्ने उत्तरदाताको अंश गत चैतको तुलनामा केही बढेको राष्ट्र बैंकले जनाएको छ । अर्को एक वर्षमा मूल्यवृद्धि हुने अपेक्षा गर्ने उत्तरदाताहरूको अंश थोरै घटेको बताइएको छ ।

गैरखाद्य र सेवा तथा घरजग्गा (आवास) बाहेकका सम्पूर्ण उपभोग समूहहरूमा आगामी तीन महिनामा मूल्यवृद्धि हुने अपेक्षा गर्ने उत्तरदाताको अंश गत चैतको तुलनामा बढेको छ । तरकारी र फलफूल तथा माछा, मासु, दूध, घ्यू र तेल उपभोग समूहबाहेकका सबै समूहहरूमा एक वर्षअगाडि मूल्य बढ्ने अपेक्षा गर्ने उत्तरदाताहरूको अंश गत चैतको तुलनामा घटेको राष्ट्र बैंकले जनाएको छ ।

सर्वेक्षण गरिएका २८ वटा शहरहरूमध्ये सबैभन्दा धेरै मूल्यवृद्धि जुम्लामा हुने देखिएको छ । आगामी तीन महिनामा त्यहाँ मूल्यवृद्धिदर ७७.३ प्रतिशत पुग्ने अनुमान छ । आगामी एक वर्षमा मूल्यवृद्धिदर घटेर ९.३ प्रतिशतमा सीमित हुने देखिन्छ । असारमा मूल्यवृद्धिदर २९ प्रतिशत रहने देखिन्छ ।

प्रकाशित मिति: सोमबार, साउन ९, २०७९ १५:१२